ජාතික ජන බලවේගයේ දූත කණ්ඩායමක් ඉන්දියානු රජයේ ආරාධනය පිට ඉන්දියාවේ කරන සංචාරය පිළිබඳව ආණ්ඩුවේ සහ විපක්ෂයේ ඇතැම් දේශපාලන කණ්ඩායම් කලබලවීම සම්බන්ධව පුදුම නොවන බවත්, මෙම සංචාරය ඉන්දීය රජයේ ආරාධනය මත කෙරෙන රාජ්ය තාන්ත්රික සංචාරයක් මිස ජනාධිපතිගේ හෝ වෙන කාගේ හෝ මැදිහත්වීමෙන් ලැබුන වරදානයක් නොවන බවත් ජාතික ජන බලවේගයේ පාර්ලිමේන්තු මන්ත්රී ආචාර්ය හරිනී අමරසූරිය අද පාර්ලිමේන්තුවේ දී පැවසුවාය.
මන්ත්රීවරිය මේ බව පැවසුවේ මේ වනවිට ජාතික ජන බලවේගයේ දූත පිරිසක් යෙදී ඇති ඉන්දීය සංචාරය සම්බන්ධව සමාජය තුළ මතුවෙමින් පවතිනා කතාබහ සම්බන්ධව පැහැදිලි කිරීමක් කරමිනි.
එහිදී මන්ත්රීවරිය මෙසේ ද කීවාය.
අපේ නායක අනුර කුමාර දිසානායක මන්ත්රී තුමා ඇතුළු අපේ කණ්ඩායමක් මේ වනවිට ඉන්දීය රජයේ ආරාධනාවක් පිට ඉන්දියාවේ සංචාරය කිරීම පළිබඳ ආණ්ඩුව පැත්තෙන් සහ අනෙක් පාර්ශවවලින් විශාල කතාබහක් ඇතිවෙලා තියනවා.
සමහර පාර්ශවවලින් කියන්න උත්සාහ කරනවා මේක රනිල් වික්රමසිංහ ජනාධිපතිගේ මැදිහත්වීම තුළින් සිද්ධ වෙච්චි දෙයක් කියලා. ඒක කිසිසේත්ම එහෙම නෑ. මේක ඉන්දීය රජයෙන් ජාතික ජන බලවේගයට ආපු ආරාධනාවක් මත ගිය සංචාරයක්.
විවිධ පාර්ශවයන් ඒ පිළිබඳ කලබල වෙන එක අපට තේරුම් ගන්න පුලුවන්. මේ රාජ්ය තාන්ත්රික ආරාධනාව ඒ අයගේ බල ව්යාපෘතිවලට සහ දේශපාලනයට විශාල අභියෝගයක් කියන එක රහසක් නෙමෙයි.
ජාතික ජන බලවේගයට ජාත්යාන්තර පිළිගැනීමක් සහ පක්ෂයේ ජාත්යාන්තර ගනුදෙනුව මේ සංචාරය හරහා තවත් ශක්තිමත් වෙනවා කියන එක රහසක් නෙමෙයි. ඒක පිළිබඳ අපේ ප්රතිවාදී කලබල වීම ගැන අපට පුදුම වෙන්න දෙයක් නෑ.
නමුත් මේක කියන්න අවශ්යයයි. විවිධ කතන්දර හරහා මේක බාල්දු කරන්න උත්සාහ කරන එක තුළ අප කියන්න ඕන ජාතික ජන බලවේගය කියන්නේ වෙනස්වන ලෝක තත්ත්වයන් එක්ක ඒ අනුව යමින්, ඒවා තේරුම් ගනිමින්, ඒවාට මැදිහත් වෙන්න පුලුවන් දේශපාලන ව්යාපාරයක් කියන එක.
ඔබට අතීතයේ ඇලිලා ගැලීල වෙනස් නොවී ඉන්න පුලුවන් ඇති. නමුත් අපි මේ මොහොතේ වැඩ කරන දේශපාලන ව්යාපාරයක්. අද තියන දේශීය තත්ත්වයත් එක්ක වැඩ කරන දේශපාලන ව්යාපාරයක්. අපි අපේ රටේ සහ අපේ ජනතාවගේ අවශ්යතාවය වෙනුවෙන් මේ රටේ ජනතාව නියෝජනය කරමින් ජාත්යාන්තර සම්බන්ධතා තුළ අපේ ප්රතිපත්ති වෙනුවෙන් පෙනී සිටින්න කිසිසේත්ම බය වෙන්නෙත් නෑ.
අවශ්ය තැන්වල දි තියන තත්ත්වයන් අනුව වෙනස් වෙන්නත් අපි කිසිසේතම බය නෑ. මොකද ඒක තමයි දේශපාලනය කියන්නේ. තියන තත්ත්වයන් එක්ක වැඩ කිරීම. මනංකල්පිත දේවල් ගැන හිතමින් වැඩ කරන එක නෙමෙයි. ආචාර්ය හරිනී අමරසූරිය කීවාය.
