ජනාධිපති තුමා… වැඩ මෙහෙමනම් අනුර ගෝ ගම හදන්නේ මොණරාගල… සෙවනගල උක් ගොවීහු පාරට බැස කියති!

සූරියවැව නුවන් ජයසේකර –

• ඇමතියා  ටොම් පචයෙක්.  ඔයා මේ වෙනකොටම ෆේල් වෙලා ඉවරයි.තවදුරටත් මේක කරගෙන යන්න බැරි නම් වහාම ඔයා ඉල්ලලා අස්වෙන්න… ගොවීහු හඳුන්නෙත්තිට කියති

• ඉතිහාසයේ ප්‍රථම වරට ආණ්ඩුවක් ගොවියට රුපියල් ලක්ෂ 200ක් ණයයි. ගොවියට කෙළවලා කවදාවත් අණ්ඩුවක් වැඩි කල් දිව්වේ නෑ… නාමල් කරුණාරත්න දවස් 25ක් මිනී පෙට්ටියක් තියාගෙන අපිත් එක්ක උද්ඝෝෂණය කළේ මේ ටික කරන්න… ගොවීහු අසති…

• අම්මණ්ඩිලා දෙන්නෙක් පත් කරලා තියනවා කම්හලට… මෙලෝ හසරක් දන්නේ නෑ වෙළෙඳාම ගැන… ඒ වට්ටි අම්මලා යවපල්ලා පොලේ කීර විකුණන්න… සෙවනගල ගොවීහු මාළිමා ආණ්ඩුව කුජීත කරති…

තම උක් අස්වැන්න සෙවනගල සීනි ආයතනයට නිසි පරිදි ලබා නොගැනීම ඇතුළු කරුණු කිහිපයක් මුල් කරගනිමින් සෙවනගල උක් ගොවීන් ඊයේ ( 26 )   පෙරවරුවේ සෙවනගල දණ්ඩුම මංසන්දියේදී විරෝධතාවයක නිරත වීය.

සෙවනගල ගොවිසෙත ඒකාබද්ධ උක්ගොවි සුභ සාධක සංගමය,ට්‍රැක්ටර් රියදුරු සංගමය, සෙවනගල උක්ගොවි  බලමණ්ඩලය ඇතුළු සංවිධාන කිහිපයක් විසින්  මෙම විරෝධතාවය සංවිධානය කර තිබූ අතර මේ සදහා  උක් ගොවීන් හා ට්‍රැක්ටර් රථ රියදුරන් හා උක්කර්මාන්තයෙන් ජිවත්වන දහසකට වැඩි පිරිසක් එක්ව සිටියහ.

උක් ගොවීන්ගේ අස්වැන්න නිසියාකාරව සෙවනගල සීනි ආයතනයට ලබා නොගැනීම, ප්‍රවාහන වියදම් වෙනුවෙන් ලබා දිය යුතු රුපියල් මිලියන හතක මුදල මෙතෙක් ලබා නොදීම හා සෙවනගල සීනි ආයතනය බංකොලොත් නොකර එය ගමේ උක් ගොවියාට ආරක්ෂා කරදීම ඇතුළු ඉල්ලිම් කිහිපයක් මුල් කර ගනිමින් මෙම විරෝධතාවය පැවැත්විණි.

විරෝධතාකරුවන් සෙවනගල දණ්ඩුම මංසන්දිය අසලදී විරෝධතාවය ආරම්භ කර පසුව පා ගමනින් සෙවනගල සීනි ආයතනය දක්වා යාමට උත්සාහ කිරීමේදී පොලිසිය විසින් එය නැවැත්විමට පියවර ගත් අතර පසුව විරෝධතා කරුවන් වාහනවල නැගී උක්පැක්ටේරිය හංදිය දක්වා   ගොස් එතැන් සිට පා ගමනින් සෙවනගල සීනි ආයතනය දක්වා පැමිණ විරෝධතාවයේ නිරත වූහ.

සිය ගැටළු ඉදිරිපත් කිරිමට විරෝධතාකරුවන් සෙවනගල සීනි ආයතනයට පැමිණි නමුත් කිසිදු බලධාරියෙක් එහි නොසිටීම නිසා එහි දැඩි උණුසුම් තත්වයක්ද ඇති විය. විරෝධතාකරුවන් සීනි ආයතනයට පැමිණෙන විට එම ආයතනය සදහා විශේෂ පොලිස් ආරක්ෂාවක්ද යොදවා තිබුණි.

මෙහිදී විරෝධතාවයට එක්ව සිටි සෙවනගල ඒකාබද්ධ ගොවි බලමණ්ඩලයේ සභාපති රුවන් සංජීව කුමාර මෙලෙස පැවසීය.

මේ ආයතනය මේ වන විට මාස ගණනාවක් තිස්සේ රුපියල් මිලියන 200කට ආසන්න මුදලක් ගොවියට ලබා දීමට තියෙනවා. අද දෙනවා හෙට දෙනවා කිය කියා බලධාරීන් හැමදාම ගොවියා රැවැට්ටුවා. ඉවසලා බැරිම තැන තමයි මේ පාරට බැස්සේ. මේ ගොවියෝ දහදුක් විඳලා උක් වගා කරලා කපලා පැකටේරියට ගෙනාවම ඒක බාරගන්න කෙනෙක් නෑ. දවසක් උක් බාර ගත්තොත් දවස් දෙකක් තුනක් යනකම් ආයේ උක් ගස් බාරගන්නේ නෑ. මේ ආණුඩුව දැන් හදන්නේ මේ සෙවනගල සීනි ආයතනයේ අර්බුදයක් හදලා මේක විකුණුලා දමන්න යැයි” පැවසිය.

සෙවනගල ට්‍රැක්ටර් රථ රියදුරු සංගමයේ සභාපති එස්.පී.නලින්ද කුමාර කීවේ මෙවැන්නකි.

විෂය භාර ඇමති   පසුගිය දවසේ පාර්ලිමේන්තුවේ කිව්වා රියදුරු සංගමයට අදාල සියළුම මුදල් දමලා ඉවරයි කියලා. ඇමති තුමා පාර්ලිමේන්තුවෙදි  සල්ලි දැම්මා කිව්වට අපේ ගිණුම්වලට නම් මේ වෙනකම් ශත පනහක මුදලක් වත් වැටිලා නෑ. ඇමතිතුමාගේ කාගේ හරි ගිණුම් වලට ඒවා වැටිලද නම් දන්නේ නෑ. ඒ නිසා අපි ඇමති තුමාට කියනවා මේක කරන්න තේරෙන්නේ නැත්නම් මේක කරන්න පුළුන් එකෙකුට දීලා පලයව් ගෙදර කියලා. සෙවනගල කියන්නේ ඇමතිගේ හෝ එයාගේ හෙන්චයියන්ගේ බූදලයක් නෙමේ .සෙවනගල උක් පැක්ටේරිය මේ ගමේ මිනිස්සුන්ගේ ජීවනාලිය. අපි ජීවත් වුනේ මේකෙන්. ඇමති හරකෙක් වුනාට අපි හරක් නෙමේ” යැයි පැවසිය.

ගොවිසෙත ඒකාබද්ධ බලමණ්ඩලයේ භාණ්ඩාගාරික පී.ඒ.ප්‍රියන්ත සුරාජ් මෙසේ කීවේය.

“ඇමතිතුමා ඔයා මේ වෙනකොටම ෆේල් වෙලා ඉවරයි.තවදුරටත් මේක කරගෙන යන්න බැරි නම් වහාම ඔයා ඉල්ලලා අස්වෙන්න. හදුන්නෙත්ති ඇමති තුමා මේ ගොවින්ට එක රැස්වීමක් තියලා මේ තියෙන අඩුපාඩු ගැටළු මොනවද කියලා හොයලා බලලා තියෙනවද මේ වෙනකම්. මාස අටක් වෙනවා පත් වෙලා. මෙහෙට ආවේ එකම එක දවසයි. ඒකත් විනාඩි පහයි. ඇමති මිසින්. එහෙම ඇමතිවරු අපිට පොල්පිති වලින් කපා ගන්න පුළුවන්.

ඉතිහාසේ ප්‍රථම වතාවට ආණ්ඩුවක් ගොවීන්ට රුපියල් ලක්ෂ 200කට  වැඩි මුදලක් ණයයි. ආණ්ඩුව ලැජ්ජවෙන්න ඕනි. ඇමති අපි දැක්කා මාධ්‍යට කියනවා එයා අමාත්‍යංශය ගන්නකොට ස්ප්‍රිතු ලිටර් මිලියන 05ක් තිබ්බලු. සීනි ටොන් තිස්තුන්දාහක් තිබ්බලු. ඇමතිට කියනවා අපි මේ වගේ වටිනාකම ගණන් හදලා බලන්න කියලා.

අද සෙවනග තියෙන්නේ සිනි ටොන් 1750යි. අපි අහනවා කෝ මේකේ තිබිච්ච සීනි. මුන් මේකේ තිබ්බ සිනි ටික විකුණලා උන්ගේ පඩි ගෙවාගෙන සුර සැප විදලා. පසුගිය ආණ්ඩු පාඩු ලබල හරි ලාබ ලබල හරි මේ ගොවියට ගෙවිය යුතු මුදල් ගෙව්වා. බෝනස් ටික දුන්නා. පාරවල් ටික හදලා දුන්නා. හැබැයි මේ ඇමතියා මේ ආයතනය හදන්නෙත් නෑ. ගොවියගේ උක් ටික ගන්නෙත් නෑ. ගොවිට එන්න තියෙන සල්ලි දෙන්නෙත් නෑ. ඒ වුනාට නිශ්පානය කරපු සීනි, ස්ප්‍රිතු ආදිය විකුණලා ලැබුණ සල්ලි ටික උන් බෙදාගෙන නම් තියෙනවා. මුන්ට ඕනේ කොහොමත් මේක වහන්න. මේක විකුණන්න. ඒක මේ ආණ්ඩුව දැන් ටික ටික කරගෙන එනවා. ඇමති කියන්නේ ටොම් පච විතරයි. ඒ නිසා අපි ආණ්ඩුවට කියනවා මේ සෙවනගල සීනි ආයතනයට අත තියන්න නම් එන්න එපා කියලා.” යැයි පැවසිය.

නාමල් කරුණාරත්ටත් අතීතය මතක් කළ ගොවියෙක්…

නාමල් කරුණාරත්නලා ඇවිල්ලා මේ දණ්ඩුම හන්දියේම මිනී පෙට්ටියක් තියාගෙන එවකට පැවති රජයට විරෝධය පාමින් අපිත් එක්ක දවස් 45ක් උපවාස කලා උක් ටොන් එකකට රුපියල් 15000ක්  ගෙවන්න ඕනි කියලා. උපවාස කරලා ලැබුනේ රුපියල් 10,000යි. දැන් මේ අය කෙකරගානවා ඒකත් කපන්න. අපි කියනවා වරෙල්ලකෝ ගෙවන දහදාහ කපලා බලන්න කියලා.

“අනුර කුමාර ජනාධිපති තුමාටත් අපි කියනවා “අනුර ගෝ ගම“ කොළඹින් නෙමේ මොණරාගලින් කියලා මතක තියාගන්න කියලා. ගොවිට වින කරපු, ගොවියට රිද්දපු කිසිම ආණ්ඩුවකට වැඩිකල් යන්න ලැබෙන්නේ නෑ. ඒ නිසා ගොවියට නම් පුතෝ අතතියන්න හිතන්න එපා.

“අද මේ ආයතනයට ගෑනු  දෙන්නෙක් පත් කරලා තියෙනවා. උන්ට තේරෙන්නේ නෑ වෙළදාම මොකද්ද කියලා. ඔය මේ ආයතනයට පත් කරලා එවලා තියෙන වට්ටි අම්මලා දෙන්නා  යවපල්ලා පොලේ කීර විකුණන්න.”

විරෝධතා කරුවන් සිනි ආයතනය ඉදිරිපිට පැය කිහිපයක් විරෝධතාවයේ නිරතව සිටියත් කිසිදු බලධාරියෙක් එහි නොපැමිණීම නිසා විරෝධතා කරුවෝ යළි මේ මස 30 වන දින මොණරාගල සම්බන්ධීකරණ කමිටුව අසලට යාමට සැළසුම් කර ගැනීමෙන් පසු විසිර ගියහ.