චාමර සම්පත් දසනායක අත් අඩංගුවට ගෙන බන්ධනාගාරගත කළ ක්රියාවලියට මුල් වූ සිදුවීම සම්බන්ධව අල්ලස් හෝ දූෂණ විමර්ශන කොමිසම පවරා ඇති නඩුවේ දී චාමර සම්පත් දසනායක ගලවා ගැනීම සඳහා හිටපු ජනාධිපති රනිල් වික්රමසිංහ අල්ලස් කොමිසමට පැමිණ අමූලික බොරු කී බව අල්ලස් හෝ දූෂණ විමර්ශන කොමිසම අද කොළඹ ප්රධාන මහේස්ත්රාත් අධිකරණය ඉදිරියේ අනාවරණය කළේය.
අල්ලස් හෝ දූෂණ විමර්ශන කොමිසම පැවසුවේ තම කොමිසම ඉදිරියට පැමිණීමෙන් පසු ඔහු මාධ්ය හමුවේ දී එම බරපතල බොරුව ප්රකාශ කර සමාජයක් නොමග යැවූ බවය.
කෙසේ වෙතත් මෙම සිද්ධියට අදාලව චාමර සම්පත් දසනායකට විරුද්ධව අල්ලස් හෝ දූෂණ විමර්ශන කොමිසම මහාධිකරණයේ නඩු පවරන බව ද කොළඹ මහේස්ත්රාත් අධිකරණය ඉදිරියේ දී කීවේය.
ඌව පළාත් මහ ඇමතිවරයාව කටයුතු කරන වකවානුවේ දී රාජ්ය බැංකුවක පවත්වාගෙන ගිය ඌව පළාත් සභාවට අයත් ස්ථිවර තැන්පතු ගිනුම් හයක් කල් පිරෙන්නට පෙර එම බැංකුවෙන් ඉවත් කරගැනීමෙන් රජයට ලක්ෂ 173ක මුදලක් පාඩු කර ඇතැයි චාමර සම්පත් දසනායකට චෝදනා එල්ල විය.
ඔහුට එරෙහිව පොදු දේපල පනත යටතේ පැනවූ මෙම නඩුවට අදාලව මන්ත්රීවරයා මේ වනවිට සිටින්නේ රක්ෂිත බන්ධනාගාරගතවය. බදුල්ල මහේස්ත්රාත් අධිකරණය මන්ත්රීවරයා රක්ෂිත බන්ධනාගාරගත කිරීමෙන් පසු හිටපු ජනාධිපතිවරයා ප්රකාශයක් කරමින් පැවසුවේ අදාල ස්ථාවර තැන්පත් ඉවත් කර ගැනීමට තමන් එවක උපදෙස් දුන් බව පැවසුවේය. හිටපු ජනාධිපතිවරයා පැවසුවේ පළාත් සභා වෙත නිකුත් කරන මුදල් වර්ෂයක් තුළ වැය කිරීම කළ යුතු බවත්, වැය නොකළ මුදල් ආපසු භාණ්ඩාගාරය වෙත යොමු කළ යුතු බවත්ය. මුදල් ස්ථාවර තැන්පතුවල තබා ගැනීම නීති විරෝධී බව තමන් චාමර සම්පත් දසනායක ඇතුළු මහ ඇමතිවරුන් කීප දෙනෙකුට දන්වා ඊට අදාලව චක්ර ලේඛයක් ද නිකුත් කළ බවය.
අල්ලස් හෝ දූෂණ විමර්ශන කොමිසම පසුගිය 28 වැනිදා හිටපු ජනාධිපතිවරයා සිදුකළ ප්රකාශය සම්බන්ධව ඔහුව කැඳවා කරුණු විමසීමක් සිදු කළේය. මේ සම්බන්ධව අද අල්ලස් කොමිසමේ නිලධාරීන් අධිකරණයට කරුණු දක්වමින් ප්රකාශ කළේ හිටපු ජනාධිපති රනිල් වික්රමසිංහ චාමර සම්පත් දසනායකගේ බිරිය විසින් කළ ඉල්ලීමක් මත අදාල මාධ්ය සාකච්ඡාව පවත්වමින් ප්රශ්නගත සිද්ධිය පිළිබඳ ප්රකාශයක් කළේ යැයි තම කොමිසම ඉදිරියේ දී දැනුම් දුන් බවය.
අල්ලස් කොමිසම අධිකරණයට පැහැදිලි කළේ අදාල රාජ්ය බැංකුවේ ස්ථාවර ගිනුම් ඉවත් කර එම මුදල සංවර්ධන කටයුතු සඳහා යොදවන ලෙස චක්රලේඛය නිකුත් කර ඇත්තෙද් 2016 නොවැම්බර් මස 22 දින නමුත් චාමර සම්පත් ප්රශ්නගත ස්ථාවර තැන්පතු ගිනුම් ඉවත් කරගෙන ඇත්තේ එම චක්රලේඛය නිකුත් වීමට මාස 09කට පෙර එනම්, 2016 පෙබරවාරි 29 වැනිදා බවය.
අල්ලස් හෝ දූෂණ විමර්ශන කොමිසම කියා සිටියේ සැකකරු අදාල ස්ථාවර තැන්පත් ඉවත් කරගන්න අවස්ථාව වනවිට රනිල් වික්රමසිංහ ප්රකාශ කරන ආකාරයේ චක්රලේඛයක් නිකුත් කර තිබුණේ නැති බවය.
අල්ලස් කොමිසම තවදුරටත් අධිකරණයට දැන්වූයේ හිටපු ජනාධිපතිවරයා තමන් විසින්ම නිකුත් කළ බව කියන චක්රලේඛ සම්බන්ධව නිසි අවබෝධයකින් තොරව මාධ්ය සාකච්ඡාවක් පවත්වා වැරදි තොරතුරු සමාජගත කරමින් අගතියක් සිදුකර ඇති ආකාරයය.
මේ වැරදි සගහත ප්රකාශ මගින් අල්ලස් කොමිසමේ කටයුතුවලට ද බාධාවක් වූ බව එම කොමිසම අධිකරණයට කීවේය. එමෙන්ම ඉදිරි නඩු දිනය වනවිට විමර්ශනය නිමා කර වාර්තාව අධිකරණයට ඉදිරිපත් කරන බව ද විමර්ශන නිලධාරීහු පැවසූහ.
