මනම්පිටිය නිමල් ජයරත්න
-
ගොවි පවුල් සිය ගණනක් බඩගින්නේ තබා මිලියන ගණනක් ජාතියට පාඩු කළ අපරාධයක්! ඒ්ත් නඩු නෑ.
පොලොන්නරුව වැලිකන්ද නෙළුම්වැව ගොවි සංවිධානයේ නිලධාරීන් කිහිපදෙනෙකු අපවාහන ඇලක් කඩා දැමීම හේතුවෙන් පිඹුරත්තෑව ජලාශයේ පිටාර ජලයෙන් ඩී 08 ගොවි සංවිධානයට අයත් පීදිමට ආසන්න කුඹුරු අක්කර සීයකට වැඩි ප්රමාණයක් සම්පූර්ණයෙන්ම විනාශ වී ඇති බව වාර්තා වේ.
ගොවීන් පවසන්නේ කුඹුරු අක්කර 40ක වැලි පිරී කුඹුරු මුලුමනින්ම වැනසී ගොස් ඇති බවය.
ඩී 09 ප්රදේශයේ පවතින කුඹුරු බිම් කීපයක් අලුතින් අස්වැද්දීමේ අරමුණින් බල පුළුවන්කාරකම පෙන්වා නෙළුම්වැව ගොවි සංවිධානයේ නිලධාරීන් කිහිපදෙනෙකු විසින් අපවාහන ඇල කපා මේ විනාශය සිදුකර ඇතැයි වින්දිතයෝ කියති.
මෙම තත්ත්වය සමග පිඹුරත්තෑව ජලාශයේ පිටවානෙන් එන ජල කඳෙන් නිරන්තරව තම කුඹුරු බිම් යටවන බවත්, ගත වූ කාලය තුළ අවස්ථා අටකදී කුඹුරු බිම් යට වු බවත් එම ගොවීහු අප සමග පැවසුහ.
මේ සම්බන්ධව ශ්රී ලංකා මහවැලි අධිකාරියේ නිලධාරීන්ට මෙන්ම අරලගංවිල පොලිසියට පැමිණිලි කළද කිසිදු පළක් නොමැති බව පෙන්වා දෙන වින්දිත ගොවීන් සඳහන් කරන්නේ තමන්ගේ විනාශ වූ කුඹුරු බිම් සඳහා වන්දි මුදලක් ලබා දීමට කටයුතු කරන ලෙසයි.
කුඹුරක් යනු වී සහ ගොයම පමණක් නොව, තමන්ගේ එකම ජීවන වෘත්තිය සහ ආර්ථික පදනම බව ගොවීහු කියති, අනෙක් අතට රුපියල්වලින් නම් මිලියන ගණක අස්වැන්න ජාතියට අහිමි කිරීමේ අපරාධයට මේ පුද්ගලයින් වග කිවයුතු බවද එම ගොවීහු පෙන්වා දෙති.
එක් කුඹුරක් වී වගා කිරීමට තමන් රුපියල් ලක්ෂ තුනහමාරක් පමණ මුදලක් වැය කළ බව ගොවීහු ගණන් හදා පෙන්වති. ඒ සඳහා බැංකුවලට පොහොර කඩවල්වලට ණය වී වු බව පෙන්වා දෙන වින්දිත ගොවීන් කියා සිටින්නේ මේ අත්තනෝමතික ගොවි සංගම් සිදුකර ඇත්තේ බරපතල ජාතික අපරාධයක් බවත් ඔවුන් විෂයෙහි නීතිය ක්රියාත්මක කර වින්දිතයින්ට වන්දි ගෙවීමට රජය මැදිහත් විය යුතු බවත්ය.
