ඉන්දීය රජය විසින් ශ්රී ලංකාවට ලබාදී ඇති ඩෝනියර් 228 සමුද්රීය නිරීක්ෂණ ගුවන් යානය වාර්ෂික නඩත්තු සේවා කටයුතු සඳහා ඉන්දියාවට පිටත් කර හැරීම නිසා ඒ වෙනුවෙන් අනුයුක්ත කරනු ලැබූ ඩෝනියර් සමුද්රීය නිරීක්ෂණ ගුවන් යානය ශ්රී ලංකා ගුවන් හමුදාව වෙත භාරදීම වෙනුවෙන් අද (16) පෙරවරුවේ කටුනායක ශ්රී ලංකා ගුවන් හමුදා කඳවුරේ විශේෂ උත්සවයක් පැවැත්විනි.
ජාතික ආරක්ෂාව පිළිබඳ ජනාධිපති ජ්යෙෂ්ඨ උපදේශක හා ජනාධිපති කාර්ය මණ්ඩල ප්රධානි සාගල රත්නායකගේ ප්රධානත්වයෙන් එම උත්සවය පැවැත්වුනේය.
ශ්රී ලංකා රජයේ ඉල්ලීමකට ප්රතිචාර දක්වමින් ඉන්දියානු නාවික හමුදාවට අයත් ඩෝනියර් 228 සමුද්රීය නිරීක්ෂණ ගුවන් යානය වසර දෙකක කාලයක් සඳහා 2022 අගෝස්තු 15 වන දින ශ්රී ලංකා ගුවන් හමුදාවට භාර දෙනු ලැබීය.
එම සමුද්රීය නිරීක්ෂණ ගුවන් යානය වසරක කාලයක් සක්රීය සේවයේ යෙදෙමින් සුවිශේෂී සේවාවක් ඉටු කරනු ලැබූ අතර එම ගුවන් යානයේ වාර්ෂික අනිවාර්ය නඩත්තු සේවා කටයුතු සඳහා ඉන්දියාව වෙත යැවීමට කටයුතු කරන ලදී.
එම ගුවන් යානය වෙනුවට අනුප්රාප්තික ඩෝනියර් 228 සමුද්රීය නිරීක්ෂණ ගුවන් යානය මෙලෙස ශ්රී ලංකා ගුවන් හමුදාව වෙත ලබා දී තිබේ.
ශ්රී ලංකාවේ ඉන්දීය මහ කොමසාරිස් ගෝපාල් බග්ලේ, ආරක්ෂක අමාත්යාංශයේ ලේකම් විශ්රාමික ජෙනරල් කමල් ගුණරත්න ඇතුළු ඉන්දීය මහකොමසාරිස් කාර්යාලයේ නියෝජිත පිරිසක් මෙම අවස්ථාවට එක්ව සිටියහ.
