තමා බලශක්ති අමාත්යවරයා ලෙස සිටින සමයේ රුසියාවෙන් අඩු මිලට ඉන්ධන ආනයනය කිරීමට අවස්ථාවක් නො ලැබුණ හේතුව පාසල් දරුවෙකුගෙන් වුවද අසා දැනගත හැකි බව හිටපු බලශක්ති ඇමති පාර්ලිමේන්තු මන්ත්රී උදය ගම්මන්පිල වත්මන් බලශක්ති ඇමති කාංචන විජේසේකර වෙත දන්වා තිබේ.
ඒ අඩු මිල ගණන් යටතේ රුසියාවෙන් ඉන්ධන මිලට නොගැනීම සම්බන්ධව පසුගිය 22 දා පාර්ලිමේන්තුවේ දී විමල් වීරවංශ මන්ත්රීවරයා සහ විදුලිබල හා බලශක්ති අමාත්ය කංචන විජේසේකර අතර ඇති වූ විවාදයක දී මතු වූ කරුණක් සම්බන්ධයෙන් පිළිතුරු දෙමිනි.
මෙම විවාදය අතර කාංචන විජේසේකර බලශක්ති ඇමතිවරයා “ඔබතුමාගේ සංධානයේ සිටින හිටපු බලශක්ති ඇමතිවරයා තමයි පසුගිය වසර එකහමාරක් කටයුතු කලේ. එතුමා රුසියාවෙන් තෙල් නොගත්තේ ඇයි” යනුවෙන් ප්රශ්න කළේය.
ඊට පිළිතුරු දෙමින් උදය ගම්මන්පිල මන්ත්රීවරයා ප්රකාශයක් නිකුත් කර ඇත .
“රුසියාව සහ යුක්රේනය අතර යුද්ධය අරඹන්නේ 2022 පෙබරවාරි 24 දිනය. යුරෝපීය රටවල් විසින් රුසියාවට සීමිත වෙළඳ සම්බාධක පනවන්නේ පෙබරවාරි 26 දිනය. රුසියාව විසින් ඈත පෙරදිග රටවලට තම ඉන්ධන සැපයීම ඇරඹුවේ සමීපයේ තිබෙන යුරෝපියානු වෙලඳපොල අහිමි වීමෙන් පසුවය.
ජනාධිපතිතුමා විසින් මා බලශක්ති ඇමති ධූරයෙන් ඉවත් කරන්නේ මාර්තු 3 දිනය. එනම් රුසියාවට සම්බාධක පනවා දින පහකට පසුවය. එබැවින් අඩු මිලට රුසියානු ඛනිජතෙල් මිල දී ගැනීමේ ස්වර්ණමය අවස්ථාව මා ඇමති ධූරය දරණ සමයේ නොතිබුණු බව දිනපතා ප්රවෘත්ති නරඹන පාසල් දරුවන් පවා දන්නා කරුණකි.”
උදය ගම්මන්පිල මන්ත්රීවරයා එසේ පවසා තිබිණි. එම සම්පූර්ණ නිවේදනය පහත දැක්වේ…
