පොදු ව්යාපාර කාරක සභාවට ( කෝප්) සභාපතිවරයෙක් පත් කිරීමේ ඡන්දයේ දී විදේශගතව සිටින විපක්ෂ කෝප් කමිටු සාමාජිකයින්ට සිය ඡන්දය ප්රකාශ කිරීම සඳහා අන්තර්ජාලය මාර්ගයෙන් අවකාශය සලසා දෙන ලෙස විපක්ෂ ප්රධාන සංවිධායක ලක්ෂ්මන් කිරිඇල්ල අද (05) කථානායකවරයාගෙන් ඉල්ලීමක් කළේය.
ඔහු මෙම ඉල්ලීම කරන්නේ මහාචාර්ය චරිත හේරත්ගෙන් හිස් වූ කෝප් කමිටු සභාපති තනතුර සඳහා විපක්ෂයෙන් හා ආණ්ඩු පක්ෂයෙන් අපේක්ෂකයින් දෙපළක් ඉදිරිපත් වී ඡන්දයකට අවස්ථාවක් නිර්මාණය වී ඇති පසුබිම තුළය.
අද පෙරවරුවේ පාර්ලිමේන්තුවේදී මෙම ඉල්ලීම ඔහු විසින් කරන ලද අතර එහිදී කථානායකවරයා එක්වරම ප්රකාශ කෙළේ ඒ සඳහා ප්රතිපාදන නොමැති බවය.
එහිදී ලකෂ්මන් කිරිඇල්ල මන්ත්රිවරයා ප්රශ්න කළේ පසුගිය දිනවල සූම් තාක්ෂණයෙන් පක්ෂ නායකයන් කැඳවීමට කථානායකවරයා කටයතු කළේ කවර ප්රතිපාදනයක් මතද යන්නය.
එමෙන්ම අද ලෝකය නව තාක්ෂණය භාවිත කරන බවත් මෙම තාක්ෂණය භාවිත කොට සථාවර නියෝගවලට අනුකූලවව කට හඬින් හෝ අත් එසවීමෙන් ඡන්දය ලබා දිය හැකි බවත් එය සූම් තාක්ෂණයෙන් කළ හැකි බවත් ප්රකාශ කළේය.
ඊට ප්රතිචාර දැක්වූ කථානායකවරයා දෙපාර්ශ්වය කැමැති නම් සභාපතිවරයා පත් කිරීම කල් දැමිය හැකි බව සඳහන් කළේය.
පොදු ව්යාපාර පිළිබඳ කාරක සභාවේ (කෝප්) නව සභාපති තේරීම හෙට(06) පැවැත්වෙන අතර එම තනතුර සඳහා පොදුජන පෙරමුණේ පාර්ලිමේන්තු මන්ත්රී මහාචාර්ය රන්ජිත් බණ්ඩාර හා සමඟි ජන බලවේගයේ පාර්ලිමේන්තු මන්ත්රී එරාන් වික්රමරත්න නම් කර තිබේ.
“අපි කෝප් එකේ සභාපති තනතුරට තරඟ වදින්න මහාචාර්ය බණ්ඩාරව නම් කළා. අපිට කරන්න පුළුවන් අපේක්ෂකයා නම් කරන එක විතරයි. ඔහු තෝරාගන්න එක කරන්නේ කෝප් සාමාජිකයින් විසින්…”
ශ්රී ලංකා පොදුජන පෙරමුණේ මහලේකම් පාර්ලිමේන්තු මන්ත්රී නීතිඥ සාගර කාරියවසම් ද මෝනිං පුවත් පතට අදහස් දක්වමින් පවසා තිබේ.
ඒ සම්බන්ධයෙන් අදහස් පළ කළ සමඟි ජනබලවේගයේ පාර්ලිමේන්තු මන්ත්රී, නීතිඥ ලක්ෂ්මන් කිරිඇල්ල සඳහන් කළේ කෝප් සභාපති තනතුර සඳහා එරාන් වික්රමරත්න නම් කළ බවය.
