කොළඹ මහ නගර සභාවේ මංගල අයවැය පරාජයට පත්වූ පාලක ජාතික ජන බලවේගය අද (31) දිනයේ දෙවනවරට අය වැය ජයග්රහණ කළේ විපක්ෂයට බහුතරය නොමැති නිසා නොව, විවිධ තත්ත්ව මත විපක්ෂයේ මන්ත්රීවරුන්ගේ ඡන්දය භාවිතයා කිරීම මග හැරවීමෙන් බව කොළඹ මහ නගර සභාවේ විපක්ෂය නියෝජනය කරන සභික රීසා සරූක් සඳහන් කළේය.
අය – වැය විමසන අවස්ථාවේ දී මන්ත්රීවරුන් දෙදෙනෙකු අතුරුදන්වී ඇති බවත් තවත් මන්ත්රීවරයෙකුට පෞද්ගලික හේතුවක් නිසා ඡන්දය විමසීමට පෙර සභාවෙන් නික්මයෑමට සිදුවූ බවත් ඔහු සඳහන් කළේය.
තවත් අයෙකුව නාරාහේන්පිට පොලීසියෙන් රඳවාගෙන සිටි බවටද ඔහු චෝදනා කළේය.
රීසා සාරුක් කීවේ මෙවැන්නකි.
“කොළඹ අයවැය අද පාලක පක්ෂය ජයග්රහණය කළා. අපේ මන්ත්රීතුමියක්ව නාරාහේන්පිට පොලීසියෙන් උදෙන්ම ගෙදර ගිහින් අරගෙන රඳවගෙන තිබ්බා. තවත් මන්ත්රීවරු දෙන්නෙක් අතුරුදන්. ගෙදරත් ගිහින් බැලුවා ඒ මන්ත්රීවරුන් දෙදෙනා නැහැ. එතකොට එතනත් අපිට ඡන්ද 2ක් නැහැ. ඒ වගේම තවත් මන්ත්රීතුමෙකුගේ භාර්යාවට හෘදයාබාධයක් කියලා ඡන්දය භාවිත කිරීම කිට්ටු කරලා එතුමට නික්ම යන්න වුණා. ඒ වගේම අපිත් එක්ක හිටපු මන්ත්රීතුමියක් ඡන්දය පාවිච්චි කළේ ආණ්ඩු පක්ෂයට. අපිට හිතාගන්න පුළුවන් මොකක්ද මෙතන වෙලා තියෙන්නේ කියලා.”
“එදා පළමුවර අයවැය පරාජයට පත්වූ මොහොතේ නගරාධිපතිතුමිය ප්රකාශ කළා හෘද සාක්ෂියට තට්ටු කරලා බලන්න කියලා. අපි එතුමියට කියනවා අද දිනයේ බහුතරය ලබාගත්තේ කොහොමද කියලා තට්ටු කරලා අහන්න.”
“අපිට බහුතරය නැති නිසා නෙමෙයි අපි අද පැරදුණේ. මන්ත්රීවරුන් මෙතන නොසිටි නිසා තමයි අපි පරාජයට පත් වුණේ. අපි ඉදිරියටත් අපේ බහුතරය රැක ගනිමින් අපේ කටයුතු කරනවා.”
ජාතික ජන බලවේගය බලය හොබවන කොළඹ මහ නගර සභාවේ 2026 අයවැය දෙවන වර කියවීම වැඩි ඡන්ද දෙකකින් අද ජයග්රහණය කළේය.
