-
පොඩි පක්ෂ එක්ක සාකච්ඡා කරලා එකඟ වෙලා ඉවරයි… ලබන සතියේ බලය පිහිටුවනවා… තිස්ස අත්තනායකගෙන් ප්රකාශයක්!
ආණ්ඩුව බහුතර බලය දිනා නොගත් ප්රාදේශීය සභා සඳහා සමගි ජන බලවේගය සහ එක්සත් ජාතික පක්ෂය සෙසු පක්ෂය හා එක්ව බලය පිහිටුවීමට තිරණය කරන ලද බව එම පක්ෂ දෙක ඒකාබද්ධ නිවේදනයක් නිකුත් කරමින් ප්රකාශ කරයි.
කොළඹ නගරසභාවේ බලය පිහිටුවීම මුල් කරගෙන මෙම නිවේදනය නිකුත් කරනු ලබන්දේ අද පෙරවරුවේ දී විපක්ෂ නායක කාර්යාලයේ දී සමගි ජන බලවේගය සහ එක්සත් ජාතික පක්ෂය එක්ව සිදුකළ සාකච්ඡාවලින් අනතුරුවය. එම ඒකාබද්ධ නිවේදනය මෙසේය.
සමගි ජන බලවේගයේ ජාතික සංවිධායක තිස්ස අත්තනායක මෙම හමුව අවසානයේ දී පැවසුවේ ලබන සතියවනවිට එක්සත් ජාතික පක්ෂය සහ සෙසු පක්ෂ සමග එක්ව පළාත් පාලන ආයතන 132ක බලය පිහිටුවීමට මේ වනවිට සියල්ල සූදානම් බවය.
විපක්ෂ නායක කාර්යාලයේ පැවති මෙම රැස්වීමට එක්සත් ජාතික පක්ෂයේ මහ ලේකම් තලතා අතුකෝරල, සභාපති වජිර අබේවර්ධන, සාගල රත්නායක ඇතුළු ප්රබලයින් සහභාගී වූහ. සමගි ජන බලවේගය පාර්ශවයෙන් සමගි ජනබලවේගයේ නායක සහ විපක්ෂ නායක සජිත් ප්රේමදාස, මහලේකම් රන්ජිත් මද්දුමබණ්ඩාර, ජාතික සංවිධායක තිස්ස අත්තනායක, ඇතුළු නායකයින් සහභාගී වුව ද එම අවස්ථාවට පක්ෂයේ අනාගත තරුණ නායකත්වය ලෙස ජනතා අපේක්ෂා දිනාගත් ආචාර්ය හර්ෂ ද සිල්වා සහභාගී වී සිටියේ නැත. තමන් ඒ සාකච්ඡාව පිළිබඳ කිසිවක් නොදන්නා බව ද හර්ෂ මාධ්යයට පැවසුවේය.
තිස්ස අත්තනායක මෙම හමුව අවසානයේ දී මාධ්ය වෙත පැවසුවේ අනෙක් පක්ෂ සමග මේ වනවිට සාකච්ඡා කර තීන්දුවකට පැමිණ අවසන් බවත්, සාකච්ඡා පවත්වමින් තිබුණේ පොඩි පොඩි ගැටලු ඇති පක්ෂ සමග බවත්ය. ලබන සතිය වනවිට මාලිමාව විසින් බහුතරය දිනාගත්තේ නැති පළාත් පාලන ආයතනවල බලය ඒකාබද්ධ විපක්ෂය විසින් පිහිටුවනු ලබන බවද තිස්ස අත්තනායක තහවුරු කළේය.
ඔහු මාධ්යයට පැවසුවේ මෙවැන්නකි.
“පලාත් පාලන ආයතනවල බලය පිහිටුවීම සිදුකළ යුත්තේ කොයි ආකාරයෙන්ද කියන ගැන තමයි සාකච්ඡා පැවැත්වෙමින් තිබෙන්නේ. අපි උත්සාහ කරනවා බලය පිහිටුවීමට ආසන 132ක අවස්ථාව තියනවා. ඉතින් කොහොමද මේ අවස්ථාව පාලනය කරන්නේ, අනෙක් අයත් එක්ක එකඟතා පවත්වන්නේ කොහොමද කියන එක ගැනත් සාකච්ඡා පැවැත්වෙමින් තිබෙනවා.”
“බලාපොරොත්තු වෙන්නේ මේ සතිය ඇතුළෙ සියලුම සාකච්ඡා අවසන් කරන්න. මොකද අනෙක් දේශපාලන පක්ෂ එක්ක තියන අදහස් හුවමාරුව අවසන් වෙලා තියෙන්නේ. පුංචි පුංචි ගැටලු තියන ඒව එක්ක තමයි නැවත සාකච්ඡා කරන්නේ.” සමගි ජන බලවේගයේ ජාතික සංවිධායක තිස්ස අත්තනායක පැවසුවේය. ඔහු පවසන්නේ කොළඹ නගරසභාවට මූලික තැනක් දී මේ වනවිට ක්රියාත්මක වෙමින් පවතින බවය.
