මනම්පිටිය නිමල් ජයරත්න –
ඛනිජ තෙල් සංස්ථාවට අයත්ව කදුරුවෙල පිහිටි තෙල් ගබඩා කිරීමේ ටැංකි අබිලි යකඩ බවට හුවා දක්වමින් එම තෙල් ගබඩා කිරීමේ මධ්යස්ථානයේ තෙල් ටැංකි දෙකක් අඩු මුදලට ටෙන්ඩර් කොට විකිණීම හා එම තෙල් ගබඩා කිරීමේ මධ්යස්ථානයේ විශාල තෙල් ගබඩා කිරීමේ තෙල් ටැංකියක් ටෙන්ඩර් පටිපාටියකින් තොරව හොර රහසේ ගොඩට ගෙන විකිණීමේ සැලසුම පිලිබඳ සොයා බැලීම සඳහා ජාතික ජනබලවේගයේ පොළොන්නරුව දිස්ත්රීක් පාර්ලිමේන්තු මන්ත්රී සුනිල් රත්නසිරි ඇතුළු කණ්ඩායමක් එම තෙල් ටැංකි පිහිටි කදුරුවෙල නගරයට ආසන්න ප්රදේශයේ විශේෂ නිරීක්ෂණ චාරිකාවක ඊයේ (07) නිරත වූහ.
කදුරුවෙල ප්රධාන දුම්රිය ස්ථානායට පිටිපස පිහිටි මෙම තෙල් ගබඩා සංකීර්ණය 1986-87 කාලවලදී එවකට පැවති රජය විසින් පොළොන්නරුව දිස්ත්රීක්කයේ ඉන්ධන අවශ්යතාව වෙනුවෙන් ඉන්ධන බෙදා හැරීමේ මධ්යස්ථානයක් ලෙසට භාවිතා කර
තිබේ.
මෙම ඉන්ධන ගබඩා සංකීර්ණය තුළ ලීටර් 50,000ක් හා ලීටර් 28,000ක් ගබඩා කළ හැකි බාහිර ටැංකි දෙකක් හා ලීටර් 45,000ක් ගබඩා කල හැකි භූගත ටැංකියකින් සමන්විතව පැවතුණි. මෙපමණ ධාරිතාවයක් සහිත ටැංකි තුනක සාමාන්ය වෙළෙඳපල වටිනාකම රුපියල් කෝටි 3ක් ඉක්මවන්නේය.
කෙසේ නමුදු ඛනිජතෙල් නීති ගත සංස්ථාව විසින් එම මධ්යස්ථානයෙන් තෙල් බෙදා හැරීම් කටයුතු වසර ගණනාවක සිට නවතා දැමීමත් සමග එම තෙල් ටැංකි කිසිදු ප්රයෝජනයකින් තොරව අත් හැර දැමීම මත එම තෙල් ගබඩා කිරීමේ ටැංකි කැලෑ වැදී තිබුණි.
මේ අතර වාරයේ පසුගිය රජය මගින් 2024 වර්ෂයේ සැප්තැම්බර් මස 18 වෙනි දින මෙම ඉන්ධන ගබඩාව සතු ඉන්ධන ටැංකි 03 න් 02ක් අබිලි යකඩ වලට රුපියල් ලක්ෂ 13 කට ආසන්න මුදලකට කොළඹ ප්රදේශයේ පෞද්ගලික යකඩ සමාගමකට අලෙවි කර ඇත.
එම ටෙන්ඩර් කර විකිනීමට කටයුතු කළ තෙල් ටැංකි දෙක ටෙන්ඩර් ලබාගත් සමාගම විසින් ටැංකි දෙක එම ස්ථානයෙන් ඉවත් කිරීමට කටයුතු කර ඇති අතර ටෙන්ඩර් නොකළ පොළොව යට තිබූ භූගත ටෙල් ටැංකිය කිසියම් පිරිසක් විසින් හොර රහසේ ගොඩට ගෙන එම ටැංකිය කපා දමා විනාශ කිරීමට පසුගිය සතියේ කටයුතු කර තිබේ.
එම විනාශය හා රජය සතුව තිබූ තෙල් ටැංකි විකිණීම පිලිබද සොයා බැලීමට පාර්ලිමේන්තු මන්ත්රී සුනිල් රත්නසිරි ඇතුළු පිරිසක් එම තෙල් ටැංකි පිහිටුවා තිබූ ප්රදේශයේ විශේෂ නිරීක්ෂණ චාරිකාවක නිරත වූහ.
මෙහිදී මාධ්ය වෙත අදහස් දක්වමින් පාර්ලිමේන්තු මන්ත්රී සුනිල් රත්නසිරි මෙලෙස කීය.
“මෙම තෙල් ටැංකි විකිණීම සම්බන්ධයෙන් වත්මන් රජයේ කිසිදු මැදිහත්වීමක් සිදුකර නැහැ. පසුගිය රජය මගින් මෙම ඛනිජ තෙල් සංස්ථාව සතුව තිබූ ඉතා වටිනා තෙල් ටැංකි දෙකක් ඉතා අඩු මිළට අබිලි යකඩ බවට හඟවමින් ටෙන්ඩර් කර පෞද්ගලික ආයතනයකට විකුණා තිබෙනවා.”
“මෙතන භූගත ටැංකියක් කිසිදු ටෙන්ඩර් දැමීමකින් තොරව තිබියදී කිසියම් පිරිසක් විසින් එම ටැංකිය පොළොවෙන් ගොඩට ගෙන විනාශ කරලා .මෙම නීති විරෝධී ක්රියාව සම්බන්ධයෙන් මේ වනවිට පොළොන්නරුව පොලීසියට පැමිණිලි කර තිබෙනවා, තිබෙනවා මේ සම්බන්ධයෙන් විශේෂ විමර්ශනයක් මේ වනවිට ආරම්භ කර තිබෙනවා.” මන්ත්රීවරයා මෙහිදි පවසා සිටියේය.
