දිට්වා සුළි කුණාටුව සමග ඇතිවූ අධික වර්ෂාව නිසා පිටාර ගලන කලා ඔය පාලම මතින් බස් රථයක් ධාවනය කරමින් මගීන් දෙදෙනෙකුට මරු කැඳවා මහාධිකරණ විනිසුරුවරයෙක් ඇතුළු මගීන් 66 දෙනෙකුගේ ජීවිත අනතුරේ දැමූ බස් රථයේ රියදුරු මිනී මැරීම සහ මිනී මැරීමට තැත් කිරීමේ චෝදනා යටතේ රක්ෂිත බන්ධනාගාරගත කළ බව පොලිසිය අද (14) ප්රකාශ කළේය.
පොලිසිය පවසන්නේ මේ රියදුරු අනතුරුදායක තත්ත්වය සම්බන්ධ පොලිස් නියෝග සහ නැවත නැවතත් නිකුත කළ මහජන අනතුරු ඇඟවීම් නොතකා මෙම අනතුරු දායක පියවර ගෙන තිබුණු බවය. පොලිසිය විසින් දණ්ඩනීති සංග්රහයේ 269 සහ 300 වගන්ති යටතේ මිනී මැරිම සහ මිනී මැරීමට තැත් කිරීමේ චෝදනා රියදුරෙකුට ගොනු කිරීම මාර්ග අනතුරු නඩු සඳහා ලංකාවේදී ගත් අසාමාන්ය දැඩි පියවරක් ලෙස වාර්තා වී තිබේ.
බලගොල්ලාගම, සාලියවැව ප්රදේශයේ පදිංචි ධනුෂ්ක කුමාරසිංහ ලෙස හඳුනාගෙන ඇති මෙම සැකකාර රියදුරු මිනී මැරීම සහ මිනී මැරීමට තැත් කිරීමේ චෝදනා මත ජනවාරි 21 වන දින දක්වා රිමාන්ඩ් භාරයට පත් කිරීමට නොච්චියාගම මහේස්ත්රාත් අධිකරණය අද (14) නියෝග කර තිබේ.
සුළි කුණාටු ආශ්රිත ගංවතුර අතරතුර පාලම හරහා ගමන් කිරීමෙන් රියදුරු දැනුවත්ව මගීන්ගේ ජීවිත අනතුරේ හෙළා ඇති බව තඹුත්තේගම සහකාර පොලිස් අධිකාරීවරයා අධිකරණයට දන්වා සිටියේය. එබැවින් මේ තැනැත්තා මිනී මැරීමක් සහ මිනී මැරීමට තැත් කිරීමක් සිදුකර ඇති බවද පොලිසිය අධිකරණයට පැහැදිලි කළේය.
සැකකරු වෙනුවෙන් පෙනී සිටි නීතිඥයින් තර්ක කළේ මිනී මැරීමට හෝ ජීවිත අනතුරේ හෙළීමට කිසිදු අදහසක් මේ රියදුරාට නොමැති බවත්, මිනීමැරුම් චෝදනා ප්රමාණය ඉක්මවා යෑමක් බවත්ය. ඒ අනුව සැකකරුට එරෙහිව මිනී මැරුම් සහ මිනී මැරීමට තැත් කිරීමේ චෝදනා එල්ල කිරීම යුක්ති සහගත සහ සාධාරණ නොවන බවද ප්රකාශ කල නීතිඥයින් සැකකරුට එරෙහිව එල්ල කර ඇති ලංකා දණ්ඩ නීති සංග්රහයේ 296 වන වගන්තිය මගින් කියැවෙන මිනී මැරුම් චෝදනා සහ ලංකා දණ්ඩ නීති සංග්රහයේ 300 වගන්තිය මගින් කියැවෙන මිනී මැරීමට තැත් කිරීමේ චෝදනා ඉවත් කර සැකකරු ඔනෑම ඇප කොන්දේසියක් මත මුදා හරින ලෙස අධිකරණයෙන් ඉල්ලා සිටියේය.
දෙපාර්ශවයේ කරුණු දැක්වීම් සැලකිල්ලට ගත් මහේස්ත්රාත්වරයා නීතිඥවරුන්ගේ එම ඉල්ලීම් ප්රතික්ෂේප කර මිනී මැරුම් සහ මිනී මැරීමට තැත්කිරීමේ චෝදනා යටතේ මෙම නඩුව සැකකරුට එරෙහිව පවත්වා ගෙන යාමට තීන්දු කරනු ලැබුවේය. මෙම අවස්ථාවේදී චෝදනා ඉල්ලා අස්කර ගත නොහැකි බවත්, ඕනෑම ඇප අයදුම්පතක් මහාධිකරණයට ඉදිරිපත් කළ යුතු බවත් මහේස්ත්රාත්වරයා සඳහන් කළේය.
සිද්ධිය සම්බන්ධයෙන් පරීක්ෂණ දිගටම පවතින බව පොලිසිය පැවසීය. පැමිණිල්ල වෙනුවෙන් රාජාංගනය පොලීසියේ ස්ථානාධිපති ප්රධාන පොලිස් පරීක්ෂක රණසිංහගේ උපදෙස් මත සැරයන්වරුන් වන (28004) තිලක් සහ (71992) දිසානායක පෙනී සිටියහ.
