ඖෂධ ගෙන්වීමේදී ව්යාජ ලේඛන ඉදිරිපත් කිරීමේ සිද්ධිය ඇතුළු චෝදනා කිහිපයකට ලක්ව පසුගිය 07 වැනිදා ජාතික ඖෂධ නියාමන අධිකාරියේ ප්රධාන විධායක නිලධාරී තනතුරින් ඉවත් කළ වෛද්ය විජිත් ගුණසේකර වෛද්ය පර්යේණ ආයතනයේ ප්රධානියා ලෙස නැවත පත් කිරීමට සෞඛ්ය අමාත්යාංශය පියවර ගෙන තිබේ.
ඖෂධ නියාමන අධිකාරියේ අධ්යක්ෂ මණ්ඩලය විසින් වෛද්ය විජිත් ගුණසේකරව එම තනතුරින් ඉවත් කිරීමට තීරණය ගෙන තිබුණේ ව්යාජ ලේඛන ඉදිරිපතකර ශ්රි ලංකාවට ඉමියුනෝග්ලෝබියුලින් ඖෂධ ගෙන්වීමේ සිද්ධිය ඇතුළු සිද්ධි ගණනාවක් මුල් කරගනිමිනි.
ඉමියුනෝග්ලෝබියුලින් ඖෂධ වංචාව සම්බන්ධව මේ වනවිටත් ඔහු විදෙස් ගමන් තහනමකට ද ලක්ව සිටී.
ජාතික ඖෂධ නියාමන අධිකාරියේ වැදගත් ලේඛණ තොගයක් විනාශ කිරීම සම්බන්ධයෙන්ද වෛද්ය විජිත් ගුණසේකර චෝදනා ලැබ තිබිණි.
ඔහු ඉවත් කරනු ලැබුවේ ප්රධාන විධායක නිලධාරි ධුරයෙන් ඉවත් වන ලෙස කීපවරක්ම කළ ඉල්ලීම් ප්රතික්ෂේප කර තනතුරේ බලහත්කාරයෙන් රැඳී සිටියදී ය.
ඔහුට ලබා දී ඇති නව පත්වීම සම්බන්ධව ඊයේ පාර්ලිමේන්තුවේ දී විපක්ෂ නායකවරයා සෞඛ්ය ඇමතිවරයාගෙන් ප්රශ්න කර සිටි අතර ඇමතිවරයා පාර්ලිමේන්තුවේ දී ප්රකාශ කළේ ඒ සම්බන්ධව සොයා බලා නීත්යානුකූලව කළ යුතු දෙයක් වේ නම් සිදුකරන බවය.
