දෙමටගොඩ රුවන් නැමැති මහාපරිමාණ කුඩු ජාවාරම්කරු සමග සම්බන්ධකම් පවත්වමින් ලාබ සත්කාර ලබමින් සිටින පොලීසියේ ඉහළ නිලධාරීන් රැසකගේ තොරතුරු මේ වන විට හෙළිවෙමින් ඇත.
ඒ අතර නියෝජ්ය පොලිස්පතිවරයෙක් රුවන් සමග ක්ලබ් එකක රැඳී සිටින ඡායාරූප කිහිපයක් ද අපරාධ පරීක්ෂණ දෙපාර්තමේන්තුවට ලැබී තිබේ.
රුවන්ට මචං යැයි අමතන මෙම නියෝජ්ය පොලිස්පතිවරයා මහනදම් පුරා එය හරි හැට කරගන්නට බැරිව පොලිසියට පැමිණි අයෙක් බව පොලීසියේ තොරතුරු අනාවරණය කළේය.
ඌරු මස් කෑමට දැඩි ලොල් කමක් දක්වන නිලධාරියෙක් ලෙස ප්රසිද්ධ මෙම නිලධාරියා රටේ ප්රධාන දිස්ත්රික්කයක් භාර පොලිස් ප්රධානියා ලෙස ද කටයුතු කරයි.
එම දිස්ත්රික්කයට එම නිලධාරියාව පත්කිරීමට පොලිස්පතිවරයා දැඩි විරෝධයක් දක්වා ඇතත් රුවන්ගේ දේශපාලන හයියෙන් පොලිස්පතිවරයාට බලපෑම්කර එම ස්ථානයට ඔහු පත්වී ඇති බව පොලිස් තොරතුරු අනාවරණය කළේය.
ඉතිහාසය පුරාම මෙම නිලධාරියා සම්බන්ධයෙන් ගැටලු ඇති බවත් ඔහු දෙමටගොඩ රුවන් සමග එකට වාහනවල නැගී ගමන් කරන බවත් දෙමටගොඩ රුවන්ගේ වාහන පරිහරණය කරන අයෙක් බවට පොලිස් මූලස්ථානයට තොරතුරු ලැබී ඇති බවත් සඳහන්ය.
දෙමටගොඩ පොලීසියේ නිලධාරියෙකුගේ විවාහ මංගල්ය උත්සවයකට දෙමටගොඩ රුවන් ලක්ෂ දෙකහමාරක මත්පැන් ලබාදීමක් ගැන ද තොරතුරු මේ වන විට හෙළි වී තිබේ. ඊට අමතරව රුවන් සමග ඉතා කිට්ටුවෙන් ඇසුරුකරන තවත් නියෝජ්ය පොලිස්පතිවරයෙක් ගැනද තොරතුරු හෙළි වී ඇතැයි අපරාධ පරීක්ෂණ දෙපාර්තමේන්තු තොරතුරු සඳහන් කළේය.
අපරාධ පරීක්ෂණ දෙපාර්තමේන්තුව විසින් දෙමටගොඩ රුවන්ගේ නිවස පරීක්ෂා කර සොයාගත් සුඛෝපභෝගී වාහන අතර ඇති එක් වාහනයක් ලියාපදිංචි නොකර ධාවනය කරමින් තිබිය දී දෙමටගොඩ පොලීසියේ රථවාහන අංශයට අලුතින් පැමිණි නිලධාරියෙක් විසින් අල්ලා තිබුණි. එම අවස්ථාවේ දී එම රථය පදවා ඇතැයි පැවසෙන්නේ රුවන්ගේ පුතාය.
එහි අයිස් නැමැති මත්ද්රව්ය සහ කේරල ගංජා තිබුණද රුවන්ගේ දේශපාලන හයියෙන් ඔහුගේ පුතාත් වාහනයත් නිදහස් වූ බවට ද තොරතුරු මේ වන විට පොලිස් මූලස්ථානයට ලැබෙන්නට පටන්ගෙන තිබේ.
