දැනට පවතින කාලසටහනට අනුව දෙසැම්බර් 4 වැනිදා සිට අ.පො.ස උසස් පෙළ විභාගය නැවත ආරම්භ වන බවත් කාලගුණික බාධාව හේතුවෙන් මග හැරුණු විෂයයන් සඳහා නව දින නියම කරන බවත් විභාග දෙපාර්තමේන්තුව පවසයි.
අද (28 ) මේ උදේ පැවැත්වුන මාධ්ය හමුවකට එක් වෙමින් විභාග කොමසාරිස් ජනරාල් අමිත් ජයසුන්දර පැවසුවේ නොවැම්බර් 30, දෙසැම්බර් 2, සහ දෙසැම්බර් 3 වනදා ද උසස් පෙළ විභාගය නොපැවැත්වීමට විභාග දෙපාර්තමේන්තුව තීරණය කර ඇති බවය. මින් පෙර තීරණය කර තිබුණෙ අයහපත් කාලගුණ තත්ත්වය හේතුවේ ඊයේ (27) අද(28) සහ හෙට(29) විභාගය නොපවැත්වීම සඳහාය.
මේ වනවිට අයහපත් කාලගුණ තත්ත්වය පහව යමින් තිබුණ ද බලපෑමට ලක්වූ සිසුන් වෙනුවෙන් මෙම තීරණය ගත් බව විභාග කොමසාරිස්වරයා වැඩිදුරටත් පැවසීය.
“නොවැම්බර් 27 සිට දෙසැම්බර් 3 වන දා දක්වා අපි පවත්වන්නේ නෑ. එතකොට දින 6ක් විභාගය නෑ. එතකොට විභාගය නැවත පැවැත්වෙන්නේ දෙසැම්බර් මස 4 වෙනි බදාදා. ඒ එක්කම දෙසැම්බර් 4 වෙනිදා විභාගය පැවැත්වෙන්නේ එදිනට පැවැත්වීමට නියමිත විෂයන්. මේ වනවිට නිකුත් කර ඇති කාලසටහන අනුව දෙසැම්බර් 4 වෙනි බදාදා පැවැත්වීමට නියමිත විෂයන් තමා එදිනට පැවැත්වීමට කටයුතු කරන්නේ. විෂයන් වශයෙන් උදේ වරුවේ රසායන විද්යාව පළමු පත්රය තාක්ෂණවේදයේ පළමු පත්රය, නාට්ය හා රංග කලාව සඳහා සිංහල, දෙමළ හා ඉංග්රීසි පළමු පත්ර, සවස් වරුවේ දේශපාලන විද්යාව පළමු පත්රය තමයි 4 වෙනි බදාදා පැවැත්වෙන්නේ.” ඔහු පැවසුවේය.
ඒ අනුව විභාගය අත් හිටවූ දිනවලට අදාල විෂයයන් පැවැත්වෙන දිනය ඉදිරියේ දී තීන්දු කිරීමට නියමිතය.
