දිනසේන රතුගමගේ –
උතුරු පළාතේ පිහිටි සියළුම ජලාශ හා විශාල වැව් සියල්ලක්ම අද (18 )දා උදෑසන වන විට පිටාර ගලන්නට පටන් ගෙන තිබේ.
ඉරණමඩු ජලාශය පාවක්කුලම ජලාශය වවුනිකුලම වැව මුත්තයන්කට්ටුව වැව අක්කරායන්කුලම වැව මේ වන විට පිටාර ගලමින් පවතින අතර එම පිටාර ජලයට හසු වී උතුරේ ගම්මාන 67 ක් ජලයෙන් යට වී පවුල් 7890 ක් අවතැන් වී සිටිති.
කුඹුරු අක්කර 30000 ක් පමණ ජලයෙන් යට වී ඇති බවත් ඉන් කුඹුරු අක්කර 22000 ක පමණ ගොයම හා වගා කළ වී කුණු වී ඇති බවත් කෘෂිකර්ම නිලධාරීන් සදහන් කරයි.
උතුරේ ජලාශ හා මහා වැව් වලට අමතරව පළාතේ කුඩා වැව් සියල්ලක්ම පිටාර ගලමින් පවතින අතර කුඩා වැව් 21 ක වැව් කණ්ඩු කැඩී ගොස් තිබේ. එම කුඩා වැව් වලින් ගලා ගිය ජලයෙන් විශාල වැව් හා ජලාශ පිරීම නිසා මේ වන විට උතුරේ සියළුම ජලාශ හා වැව් පිටාර ගලන්නට පටන්ගෙන තිබේ.
මේ අතර වර්ෂාව නිසා උතුරේ වැසියන්ගේ ගව පට්ටිවල සිටින ගවයින් ලක්ෂ අටක පමණ ප්රමාණයක්ද එලුවන් ලක්ෂ තුනක් පමණද එළිමහනට යැවීමට නොහැකි නිසා ගව හා එළු පාලනයේ යෙදී සිටින සත්ත්ව ගොවීන් දඩි අර්බුදයකට මුහුණ පා සිටිති.
එම සතුන්ට තණ කැවීම හා අවශ්ය සත්කාර කිරීමට සත්ත්ව ගොවීන්ට නොහැකි වී තිබේ.
මේ මස 8 වෙනිදා සිට උතුරු පළාතට ඇද හැලුණු ධාරානිපාත වර්ෂාව මේ දක්වා පහව ගොස් නොමැති අතර දිනපතාම මිලි මීටර් 75 ත් 100 ත් අතර වර්ෂාපතනයක් එම පළාත් වලට ලැබෙමින් පවතී.
