ශ්රී ලංකා මුහුදු සීමාව තුළදී මෙරට ධීවරයින් පිරිසකට ඉන්දීය වෙරළාරක්ෂක නිලධාරීන් විසින් අමානුෂික ලෙස පහරදීමේ සිද්ධිය සම්බන්ධයෙන් රජය සිය දැඩි විරෝධය පළ කර සිටියි.
ධීවර අමාත්ය රාමලින්ගම් චන්ද්රසේකර් අවධාරණය කළේ අසත්ය චෝදනා එල්ල කරමින් සිදුකළ මෙම ප්රහාරය පිළිබඳව දැනටමත් ඉන්දීය මහ කොමසාරිස් කාර්යාලය දැනුවත් කර ඇති බවයි.
වෙන්නප්පුව සහ වෙල්ලමන්කරය ප්රදේශවලින් පිටත්ව ගිය යාත්රා දෙකක සිටි ධීවරයින් 12 දෙනෙකු මෙරට මුහුදු සීමාව තුළ දී ඉන්දීය වෙරළ ආරක්ෂකයින්ගේ අමානුෂික ප්රහාරයට ලක් වන්නේ පසුගිය 29 වැනිදා ය.
ඉන්දීය වෙරළ ආරක්ෂකයින් මෙම ප්රහාරය එල්ල කරන්නේ ජාත්යන්තර මුහුදේ මසුන් අල්ලා යළි දිවයිනට පැමිණෙමින් සිටිය මෙම ධීවර කණ්ඩායමටය.
සහන සේවා සහ වෛද්ය ප්රතිකාර
නාවික හමුදා මාධ්ය ප්රකාශක කමාන්ඩර් බුද්ධික සම්පත් මහතා සඳහන් කළේ, ප්රහාරයෙන් තුවාල ලැබූ ධීවරයින් සිව්දෙනෙකු මේ වන විටත් කරාපිටිය රෝහලට ඇතුළත් කර ඇති බවය. පහර කෑමට ලක් වූ තවත් ධීවරයින් 06 දෙනෙකු රැගෙන ඒම සඳහා නාවික හමුදා නෞකාවක් මුහුදට පිටත්ව ගොස් ඇති බවත් ඔහු පැවසුවේය.
“ලංකාවේ සීමාව ඇතුළට ඇවිත් අපේ මිනිස්සුන්ට අමානුෂික ලෙස ගහනකල් බලධාරීන් මොනවද කළේ? මේ ගැන වහාම විධිමත් පරීක්ෂණයක් අවශ්යයි.” සමස්ත ලංකා බහුදින ධීවර යාත්රා හිමියන්ගේ සංගමයේ සභාපති ටිරෝන් මෙන්ඩිස් පවසයි.
“යාත්රා තුනකට පහර දීලා තියනවා. දෙකකට පහර දීලා තියෙන්නේ ලංකාවේ මුහුදු තීරයේදී..ලංකාවේ බෝඩරේ ඉඳන් අපේ මුහුදු සීමාව ඇතුළට ඇවිල්ලා තමා ගහලා තියෙන්නේ. එහෙම පහර දෙනෙකල් අපේ බලධාරීන් මොනවද කළේ කියලා අපි මුලින්ම අහන්න ඕනේ. ඒ ගැන විදිමත් පරීක්ෂණයක් කරන්න ඕනේ. පහර දීලා තියෙන්නේ අමානුෂික විදිහට. ඒ ගැන හොයා බලන්න කියලා අපි අපේ ඇමතිවරු දෙන්නට කියනවා. නාවික හමුදාවෙනුත් අපි ඉල්ලා සිටිනවා මේ ගැන විදිමත් පරීක්ෂණයක් කරන්න කියලා. අපේ ධීවරයින්ට පහර දීලා යනකල් මොනවද කළේ කියලා අපි නාවික හමුදාවෙනුත් අහනවා.” ලංකා බහුදින ධීවර යාත්රා හිමියන්ගේ සංගමයේ සභාපතිවරයා ප්රශ්න කරයි.
ධීවරයින්ගේ ආරක්ෂාව තහවුරු කිරීමට අපොහොසත් වූ බවට එල්ල වන චෝදනා හමුවේ නාවික හමුදාව ප්රකාශ කළේ, මෙරට මුහුදු සීමාව පුරා සෑම ස්ථානයක්ම එකවර ආවේක්ෂණය කිරීම (Surveillance) ප්රායෝගිකව අපහසු කාර්යයක් බවයි.
කෙසේ වෙතත්, ධීවර සංගම් අවධාරණය කරන්නේ මෙරට ස්වෛරීභාවය සහ ධීවරයින්ගේ ජීවිත ආරක්ෂා කිරීම වෙනුවෙන් රජය මීට වඩා මැදිහත් විය යුතු බවයි.
