ආපදාවෙන් හානි වූ නිවාසවලට අදාල වන්දි මුදල් හැර සෙසු සියලුම දීමනා දෙසැම්බර් 31දාට පෙර ලබා දී අවසන් කරන බව ජාතික ආපදා සහන සේවා මධ්යස්ථානය පවසයි.
ආරක්ෂක අමාත්යාංශයේ ආපදා කළමනාකරණ අතිරේක ලේකම් කේ.ජේ.ධර්මතිලක පැවසුවේ නිවාස හානි සඳහාවන වන්දි මුදල් ලබන වසරේ මුල ලබා දෙන බවය.
අර්ධ හානි නිවාස සඳහා සෑම නිවසකටම ලක්ෂ 05 බැගින් ලබා දෙන බවත්, තාවකාලික අමුද්රව්යවලින් හදා ගත් බොහෝ නිවාස කඩිනමින් හානියට පත්වන බැවින් ස්ථිර අමුද්රව්ය යොදා නැවත මෙම නිවාස සකස් කරගැනීමට අවස්ථාව සැලසීම මෙම ලක්ෂ 05ක මුදල ලබා දීමේ අපේක්ෂාව බවත් ඔහු පෙන්වා දුන්නේය. මුලින්ම ලක්ෂ 03ක මුදලක් හා එම ඉදිකිරීම් අධීක්ෂණය කිරීමෙන් දෙවනුව ලක්ෂ 2ක් ද වශයෙන් මෙම ලක්ෂ 05 ලබා දීමට නියමිතව ඇත.
ලක්ෂ 05කට වඩා වැඩි හානියක් සිදුවී ඇතැයි අපේක්ෂා කරන අයෙකුට මෙම ලක්ෂ 05ක මුදල ලබා නොගෙන තක්සේරුවක් කර හානි පූර්ණය කරන ලෙස ඉල්ලා සිටිය හැකි අතර එම හානිය ලක්ෂ 25ක් දක්වා තක්සේරු කර ගෙවීම් කිරීමට නියමිතව තිබේ.
පූර්ණ නිවාස හානියක් සිදුවන කෙනෙකු වෙත ලක්ෂ පනහක මුදලක් ලබා දීමට නියමිතව ඇත.
“ නිවාස වැනි දිගු කාලීන වැඩසටහන් ලබන අවුරුද්ද දක්වා ගමන් කරනවා. පොඩි පොඩි වන්දි ඇතුළත්වන කෘෂි වන්දි, සත්ත්ව පාලනය සඳහා ගෙවන වන්දි, දරුවන්ගේ දීමනා, නිවාසවල ගෘහ උපකරණ ලබා ගන්න දෙන දීමනා ඇතුළු සියලු දේවවල් අයත්වන කෙටි කාලීන වැඩසටහන් සියල්ලම මේ දෙසැම්බර් 31 ට කලින් අවසන් කරන්න කියලා උපදෙස් ලැබිලා තියනවා. “ අතිරේක ලේකම්වරයා පැවසුවේය.
ඔහු පෙන්වා දුන්නේ නිවාස පිරිසිදු කරගැනීම සදහා ලබා දෙන රුපියල් විසි පන්දහසේ දීමනාව මෙතෙක් ලැබී නැතිනම් ප්රාදේශීය ලේකම්වරයාට හෝ දිස්ත්රික් ලේකම්වරයාට අභියාචනා කළ හැකි බවද හෙතෙම කීවේය.
