දිට්වා සුළි කුණාටුවෙන් හානි වූ ප්රදේශ නැවත ගොඩනැගීම සඳහා ඉන්දියාව ඇමරිකානු ඩොලර් මිලියන 450 ක සහන පැකේජයක් ලබා දෙනු ඇති බව ඉන්දීය අග්රාමාත්යවරයාගේ විශේෂ නියෝජිතයෙක් ලෙස ශ්රී ලංකාවට පැමිණි ඉන්දීය විදේශ කටයුතු ඇමති ආචාර්ය එස්.ජයිශංකර් අද ප්රකාශ කළේය.
එයට අමෙරිකානු ඩොලර් මිලියන 350ක සහනදායී ණය සහ අමෙරිකානු ඩොලර් මිලියන 100 ක ප්රදාන ඇතුළත් බව විදේශ කටයුතු ඇමතිවරයා කීවේය.
ජනාධිපතිවරයා සමග කළ ද්වී පාර්ශවික සාකච්ඡාවකින් අනතුරුව විදේශ කටයුතු ඇමති විජිත හේරත් සමග ඒකාබද්ධ මාධ්ය හමුවකට එක් වෙමින් ඉන්දීය විදේශකටයුතු ඇමතිවරයා මෙම නිවේදනය නිකුත් කළේය.
දිත්වා සුළි කුණාටුවෙන් විපතට පත් වූ අවස්ථාවේදී මුල්ම උපකාර කරන්නා ලෙස ඉදිරිපත් වූ ඉන්දියාව නොවැම්බර් මස 28 වැනිදා ම සාගර්බන්ධු මෙහෙයුම ආරම්භ කළේය. ඉන්දීය වෛද්ය කණ්ඩායම් අට දහසකට ආසන්න පිරිසකට ලබා දුන් සෞඛ්ය ආධාර, හමුදා ඉංජිනේරු කණ්ඩායම් පාලම් පද්ධතිය නවීකරණය කිරීමට කළ දායකත්වය ඇතුළු ඉන්දියාව මැදිහත්ව සිදුකළ මෙහෙයුම් ස්වරූපය සිහි කළ ඉන්දීය විදේශ ඇමතිවරයා 2022 දී ආර්ථිකය බිඳ වැටුණ අවස්ථාවේ සිදුකළ මැදිහත්වීමට සමාන මැදිහත්වීමක් මේ ආපදාවේදීත් සිදුකරන බව තහවුරු කළේය.
සංචාරක ව්යාපාරය රට තුළ ප්රවර්ධනය කිරීමට ඉන්දියාව තමන්ට ලබා දිය හැකි උපරිම සහයෝගය ලබා දෙන බව ද ඇමතිවරයා පැවසුවේය.
ජනාධිපතිවරයා මෙන්ම විදේශ කටයුතු ඇමති විජිත හේරත් ද මේ මැදිහත්වීම සම්බන්ධව ස්තුතිය ඉන්දීය අගමැතිවරයාට පිළි ගන්වනු ලැබුවේය.
