පොලිස් කොමිසම විසින් කොමිසම සතු එක් බලතයක් වූ පොලිස් ස්ථානාධිපතිවරුන් පත් කිරීම පොලිස්පතිවරයා වෙත පැවරීමට තීරණය කර ඇත්තේ මේ වනවිට මත්ද්රව්ය පාතාලය සහ දේශපාලනය එක් ජාලයක්ව සිදුකරන බරපතල අපරාධය වළක්වා ගැනීම සඳහා පොලිසිය භූමියේ මෙහෙයවන විශාල මෙහෙයුම ප්රායෝගික කරගැනීමට බව අගමැතිනිය අද (10) පාර්ලිමේන්තුවේ දී ප්රකාශ කළාය.
ඇය පැහැදිලි කළේ මේ කිසිම අවස්ථාවක ව්යවස්ථානුකූල පොලිස් කොමිසමේ බලය අවභාවිතා වීමක්, කප්පාදු වීමක්, කිසිසේත්ම සිදුවී නැති බවය. එමෙන්ම ජාලයට පොලිසිය මෙන්ම හමුදාවත් යම් පිරිස් වශයෙන් සම්බන්ධ වී ඇති බැවින් මෙහෙයුම සඳහා තමන්ට විශ්වාසනීය කණ්ඩායම් පත් කරගැනීමේ ප්රායෝගික අවශ්යතාවය පොලිස්පතිවරයා වෙත පැන නගින බව ඇය පෙන්වා දුන්නාය.
ඇය පැවසුවේ මේ වනවිට අනවශ්ය ලෙස කලබල වී ඇත්තේ තමන් වෙත විමර්ශන ලං වනවිට කලබල වන පිරිස්වල ඝෝෂාව බවය.
අගමැතිනිය මේ කතාව සිදුකරන විට පාර්ලිමේන්තුවේ විපක්ෂය ලෙස යෝජනාව ඉදිරිපත් කළ සුජීව සේනසිංහ මන්ත්රීවරයා ඇතුළු තවත් කීප දෙනෙක් පමණක් ඉතිරිව සිටියේය. අනතුරුව සුජීව සේනසිංහ සහ අගමැතිනී හරිනි අතර ඇති වන්නේ ඉතාම සංයමයකින් යුතු විදග්ධ සංවාදයකි.
අගමැතිනියගේ වෙලාව ලබා දෙමින් සුජීව සේනසිංහ ප්රශ්න ඇසීමට ඉඩ සලස්වා ආණ්ඩුවේ මතය ප්රකාශ කිරීමේ පරිණත අවස්ථාවක් බොහෝ කාලයකට පසු පාර්ලිමේන්තුවේ දක්නට ලැබුණ බව කිව යුතුය.
අගමැතිනිය මෙසේ කීවාය.
“ව්යවස්ථාව උල්ලංඝණය වන කිසිම දෙයක් වෙලා නෑ. පොලිස් කොමිසමේ බලයටයටත් අයි.ජී.පී. පොලිස් කොමිසම අයි.ජි.පි. ට බලය ලබා දීලා තිබෙන්නේ ස්ථානාධිපතිවරුන් ස්ථාන මාරු කිරීමට. එම මාරුවිම් කළ යුත්තේ පොලිස් කොමිසමෙන් දෙන ගයිඩ් ලයින්වලට අනුව. ඒ තීරණවලට විරුද්ධ නම් ඇපීල් කරන්න ඒ හා සමාන අවස්ථා තුනක් තියනවා. පොලිස් කොමිසමට, පරිපාලන විනිශ්චයාධිකරණයට. නැතිනම් එෆ්ආර් එකක් දාන්න පුලුවන්. පොලිස්පතිට තනි මතයට කටයුතු කරන්න බෑ”
එහිදී සුජීව සේනසිංහ මන්ත්රීවරයා ඇසුවේ ස්වාධීන කොමිෂන් සභා පිහිටවූයේ කොමිසම සතු බලය පිටතට බෙදා දීමට නොවන බවය. එය විය නොහැකි බවත් මේ යෝජනාව අතිශය වැදගත් වීමට ප්රබල හේතුවක් තිබිය යුතු බවත් ඒ හේතුව කුමක්දැයි පැහැදිලි කරන ලෙසත් මන්ත්රීවරයා අගමැතිනියගෙන් ඉල්ලුවේය.
“රටේ පොලිසිය කරන කාර්ය භාර්ය ගැන තේරුම් ගනිමු. ඔවුන් මේ වෙලාවේ මත්ද්රව්යයට එරෙහිව කරන වැටලීම් ඉතාම වැදගත්. අපි හොදින්ම දන්නවා මත්ද්රව්ය නිකම් ගේන එකක් නෙමෙයි. එම මත් ද්රව්ය ජාලය පාතාලය එක්ක සම්බන්ධයි. දේශපාලනය එක්කත් සම්බන්ධයි. ඒක මේ සියලු දෙනා දන්නවා. මෙන්න මේ මත්ද්රව්යත් පාතාලයත් දේශපාලනයත් අතර තියන නෙට්වර්ක් එක කඩන එක තමයි මේ වෙලාවේ අපට කරන්න පුලුවන් ලොකුම දේ. ප්රමුඛතාවයක් ඇතිව කරන්න ඕන වැඩේ. “
“දරුවන් ගලවා ගන්න නම් තරුණ පරපුර ගලවා ගන්න නම්, ගෘහස්ථ හිංසනය නවත්වා ගන්න නම්, අපේ සමාජ අර්බුදය වළක්වා ගන්න නම් මෙන්න මේ තුන අතර තියන සම්බන්ධය අපි කඩන්න ඕන. අන්න ඒක වෙනුවෙන් තමයි අපි මේ වෙලාවේ මැදිහත් වෙන්නේ. “
“මේ වෙලාවේ පොලිසිය මැදිහත් වෙන විදිහට ඒ හා කාර්යක්ෂමව පොලිස් කොමිසමත් වැඩ කරන්න ඕන. ඒක නිසා තමයි පොලිස් කොමිෂන් එක ඔවුන්ගේ මේ ඕඅයිසී කෙනෙක් පත් කිරීමේ බලය පමණයි මේ පොලිස් කොමිසම ලබා දීලා තියෙන්නෙ අයි.ජී.පීට. “
“සභාපති තුමා… මේ ත්රිත්වයට එරෙහිව කරන මේ සටනේදි අපි හොඳින් දන්නවා ඇතුළත් මේකට සම්බන්ධයි කියලා. අපි කැමති උනත් නැති වුනත් පොලිසියේ සම්බන්ධතා තියනවා. බන්ධනාගාරයේ සම්බන්ධතා තියනවා. අධිකරණයේ සම්බන්ධතා තියනවා. මේ වනවිටත් පොලිසියේ 400කගේ වැඩ තහනම් කරලා තියනවා. 2000කට චාජ් ෂීට් භාරදීලා තියනවා. “
“හමුදාවෙ කට්ටියත් මේකට සම්බන්ධයි. එවැනි තත්ත්වයක් තුළ ඇතුළත් අපට සුද්ද කරන්න සිද්ධ වෙලා තියනවා. ඇතුළ සුද්ද කරන්න නම් ඒ තමන් භාරයේ ඉන්න පොලිසියෙ කණ්ඩායම ගැන හොඳම ඇගයීම තියෙන්නේ පොලිස්පති තුමාට. පොලිස්පති තුමාට පුලුවන්වෙන්න ඕන මේ විදිහට චාර්ජ් සීට් නැති දක්ෂ ඉක්මනින් වැඩ කරන්න පුලුවන් ඔහුට විශ්වාස අය මේ වෙනුවෙන් පත් කරගන්න. ඒක හොඳ දෙයක්. “
“එහෙම නැතිනම් දේශපාලකයෙකුගේ කැමැත්තට කවුරුවත් මාරු කරනවා නෙමෙයි. අයි.ජී.පී මේ වෙලාවේ කරන මේ මෙහෙයුමට උපකාරයක් ලෙසයි මේක වෙන්නේ.”
නැවත වරක් සුජීව සේනසිංහ මන්ත්රීවරයා නැගී සිට පැවසුවේ රටේ මීට වඩා ව්යසනකාරී අවස්ථා තිබුණු බවය. ඊට එරෙහිව දැන් ආණ්ඩුවේ පිරිස් සමග තමන් එක්ව සටන් කළ බවය. “ ඔබ තුමිය කියන්නේ පොලිස් කොමිසමේ ඉන්න ඒ.එම්. ලලිත්, ඒ කරුණාරකරන්, ඩිල්ශාන් ජයසූරිය, ඒ.එම්.ඉල්ලියාස් , ජයන්ත ජයසිංහ සහ තනූජා ප්රනාන්දුට මේ කට්ටියට ඔබතුමිය කියන හැකියාව නැද්ද?”
අගමැතිනිය ඒ සම්බන්ධව මෙසේ කීවාය.
“මම එය කියන්නේ නෑ. මම නෙමෙයි ඒක කරලා තියෙන්නේ. අපි කවුරුවත් මේ ගැසට් එක ගහලා නෑ. මේ පොලිස් කොමිසම තමයි මේක තීරණය කරලා තියෙන්නේ. අපි කවුරුවත් කියලා නෑ ඒ ගොල්ලන්ට මේ හැකියාව නෑ කියලා. ඔවුන් ගත්ත තීරණයක් තමයි මේ බලය පැවරීම. අපි කවුරුවත් කියපු දෙයක් නෙමෙයි. පොලිස් කොමිස කරපු දෙයක්. අපි හිතනවා මේ වෙලාවේ පොලිස් කොමිසම මේ කරන්නේ පොලිසිය තවත් ශක්තිමත් කරන්නත්, දිරි ගන්වන්නත් පොලිස්පතිට ශක්තිමත්ව වැඩ කරන්නත් දෙන බලයක්. “
“දේශපාලන ඕනෑකම් මත පොලිසියට නටන්න දෙන්නේ නෑ කියන විශ්වාසය ගරුත්වය අපි පොලිස් කොමිසමට ලබා දීලා තියනවා. පොලිස් කොමිසමට හිතෙනවා නම් ඕන වෙලාවක මේක දේශපාලන අධිකාරිය විසින් අවභාවිතා කරනවා කියලා මේ බලය නැවත ගැසට් ප්රකාශනයක් මගින් පවරා ගන්නත් පුලුවන්. ඒ විශ්වාසය තියනවා අපට මේ පොලිස් කොමිසම ගැන. “
“මම හිතන්නේ නෑ සුජීව මේක ඔයාට ප්රශ්නයක් ද කියලා. නමුත් මේ වෙලාවේ සිද්ධ වෙන වැටලීම්, විමර්ශන එන්න එන්න තමන්ට කිට්ටු වෙනකොට කලබල වෙනවා. ඒ කලබලය එක්ක වැරදි තැනින් මේක අල්ල ගන්නවා. “
“ඇත්තටම මේ ස්වාධීන කොමිෂන් සභා ගැන කැක්කුමක් තියනවා නම් මම යෝජනා කරන්නේ මේ කොමිෂන් සභා තව ශක්තිමත් කරන්න අවශ්ය පියවර ගැන අපි කතා කරමු. මේ කොමිෂන් සභා සම්බන්ධව ව්යවස්ථාවේ වෙනස් වෙන්න ඕන යෝජනා ගැන ඉදිරිපත් කරමු. “
“ අපට ඉතාම සන්තෝෂයි විපක්ෂයත් ආණ්ඩුවත් එකම තැනකට ඇවිත් තියනවා. කොමිෂන් සභාවේ ස්වාධීනත්වය රැකගන්න ඕන කියලා. ඒ අවස්ථාව මුල් කරගෙන අපට එකට වැඩ කරන්න පුලුවන් වේවි කියලත් අප හිතනවා.”
මෙම යෝජනාව ගෙනා සුජීව සේනසිංහ මන්ත්රීවරයා කොමිෂන් සභාවල බල රහිත කළ 18 වැනි ව්යවස්ථා සංශෝධනයට ඡන්දය දීමට නොපැමිණ මග හැරිය නමුත් ඉදිරියේ දී එවැනි මගහැරීම් නොකර අවංකව කොමිෂන් සභා ශක්තිමත් කිරීමේ අවස්ථාවට එක්වනු ඇතැයි විශ්වාස කරන බව ද අගමැතිනිය කීවාය.
