වන අලින් පළවා හැරීම සඳහා අවශ්ය අලි වෙඩි සදහා වසරක රුපියල් මිලියන 2800ක් වැය වන බව වනජීවී දෙපාර්තමේන්තුව සඳහන් කරයි.
මෙම අලිවෙඩි දේශීය ගිනිකෙළි කර්මාන්තකරුවන්ගෙන් මිල දී ගන්නා අතර වසරකට අලි වෙඩි ලක්ෂ 14ක් මිල දි ගන්නා බව එම දෙපාර්තමේන්තුව කියයි.
කෙසේ වෙතත් දැනට පවතින අමුද්රව්ය මිල ඉහළ යාම හේතුවෙන් අලි වෙඩි සඳහා දැනට වැය වන මුදලට වඩා වැඩි මුදලක් වැය කිරීමට සිදු විය හැකි බව ද වනජීවී නිලධාරීහු අවධාරණය කළහ.
අලින්ගේ වාසස්ථාන පිහිටි කැළෑ ඉඩම්වල මිනිසුන් පදිංචිවීමත්, වගාව සඳහා යොදා ගැනීමත් මෙන්ම වනබිම්වලට ගවයින් මුදා හැරීම නිසා වන අලින්ට අවශ්ය ආහාර පාන හිඟවීමත් වන අලින් ගම්වැදීමට ප්රධාන වශයෙන් හේතු වී තිබෙන බව එම නිලධාරීන් පෙන්වාදේ.
ඇතැම් ගම්මානවල ජනතාව වන අලින් ගම් වැදුනු අවස්ථාවල ඔවුන් පළවා හැරීම සඳහා වනජීවි නිලධාරින්ගෙන් නිසි සහයෝගයක් නොලැබෙන බවට කරන චෝදනා සම්බන්ධයෙන් කෘෂිකර්ම , වනජීවී හා වනසම්පත් සංරක්ෂණ අමාත්ය මහින්ද අමරවීර වනජීවි හා වනසංරක්ෂණ අමාත්යාංශයේ නිලධාරින්ගෙන් කරුණු විමසු අවස්ථාවේදී එම නිලධාරීන් සඳහන් කර ඇත්තේ ගම්වලට වන අලින් ගම්වැදුනු අවස්ථාවල එම ගම්වල ජනතාව වනජීවි නිලධාරින්ට දැනුම් දුන්නත්, මේ වනවිට පවතින ඉන්ධන සීමාවන් නිසා ඇතැම් අවස්ථාවල නියමිත වේලාවට අදාල ස්ථානයට ගමන් කිරීමේ නොහැකි වී ඇති බවයි.
.
