බලාපොරොත්තු රහිත බිහිසුණු ගංවතුර තත්ත්වයක් හේතුවෙන් එක්සත් ජනපදයේ ටෙක්සාස් හි ගැහැණු ළමයින් සඳහා වූ ගිම්හාන කඳවුරකට එක් වී සිටි නව යොවුන් වියේ ගැහැණු දරුවන් විස්සකට වැඩි පිරිසක් අතුරු දහන් වී ඇති බව විදෙස් මාධ්ය වාර්තා කරයි.
එක්සත් ජනපදයේ ඇති වූ ගිගුරුම් සහිත වැසි සහ ධාරානිපාත වර්ෂාව හේතුවෙන් දකුණු-මධ්යම ටෙක්සාස් හි ග්වාඩලූප් ගඟ දිගේ මාරාන්තික හදිසි ගංවතුරක් ඇති වී මෙම ඛේදවාචකය සිදුවී තිබේ.
300mm (අඟල් 12) දක්වා වූ අධික වර්ෂාපතනයක් හේතුවෙන්, සැන් ඇන්ටෝනියෝ සිට වයඹ දෙසින් කිලෝමීටර් 105 (සැතපුම් 65) ක් පමණ දුරින් පිහිටි දකුණු-මධ්යම ටෙක්සාස් කඳුකරයේ පිහිටි කර් ප්රාන්තයේ සමහර ප්රදේශ සඳහා එක්සත් ජනපද ජාතික කාලගුණ සේවය හදිසි ගංවතුර හදිසි අවස්ථාවක් ප්රකාශයට පත් කර තිබිණි.
කර්විල් ප්රාන්තය ආසනයේ නගර කළමනාකරු ඩල්ටන් රයිස් වාර්තාකරුවන්ට පැවසුවේ අලුයම උදාවීමට පෙර සුළු හෝ අනතුරු ඇඟවීමකින් තොරව අධික ගංවතුර ඇති වූ බවය. ඒ තත්ත්ව තුළ බලධාරීන් කිසිදු ඉවත් කිරීමේ නියෝගයක් නිකුත් කිරීමට අවස්ථාව ලැබී නැත.
“ රේඩාර් සමඟ පවා පුරෝකථනය කළ නොහැකි ඉතා කෙටි කාලයක් තුළ, එනම් පැය දෙකකට අඩු කාලයක් තුළ මේ අනතුර සිදුවුනා.” ඩල්ටන් රයිස් කීවේය.
ටෙක්සාස් හි කර්විල් අසල ගංවතුර මාපකයක් මිනිත්තු 45 ක් ඇතුළත ගඟේ අඩි 26 ක බිහිසුනු නැගීමක් පෙන්නුම් කළ බව බීබීසී වාර්තා කරයි.
මේ වනවිට කර ඇති තක්සේරුව අනුව අවම වශයෙන් ජීවිත 24ක් අහිමි වී ඇත. හදිසි ප්රතිචාර දක්වන්නන් මේ වන විට දැඩි සෝදිසි කිරීමේ සහ ගලවා ගැනීමේ මෙහෙයුමක නිරතව සිටිති.
ප්රදේශයට ප්රමාණවත් ගංවතුර අනතුරු ඇඟවීමේ පද්ධතියක් තිබී නැත. ඒ තත්ත්වය තුළ පදිංචිකරුවන් සහ කඳවුරුකරුවන් අවදානමට ලක් වී තිබේ.
ප්රාන්තය පුරා හදිසි තත්ත්වයක් ප්රකාශ කාරීමත් සමග ප්රජාව දැඩි ලෙස පීඩාවට පත්ව ඇත. අර්බුදයට සහාය වීම සඳහා එක්සත් ජනපද වෙරළාරක්ෂක සහ FEMA නිලධාරීන් බලමුලු ගැන්වී ඇත.
