කොවිඩ්-19 වසංගත තත්ත්වය හේතුවෙන් මෙවර කවර හෝ සිද්ධස්ථානයකින් පැවැත්වෙන පෙරහරට සහභාගීවීමට සහ එය නැරඹීමට මහජනතාවට අවසර නොදීමට රජය තීරණය කර තිබේ.
ඒ අනුව යාපනයේ නල්ලූර්, ත්රිකුණාමලය සහ නැගෙනහිර සෙසු ප්රදේශවල සිට පාද යාත්රාවෙන් කතරගම පෙරහරට පැමිණෙන පිරිසටද මෙවර අවසර නැත.
එමෙන්ම මහනුවර දළදා මාළිගාව සහ කතරගම, දෙවිනුවර, සබරගමුව ඇතුළු දේවාල මුල්කර ගනිමින් පැවැත්වෙන පෙරහර කොවිඩ් මර්දනයට සහාය වෙමින් සෞඛ්ය මාර්ගෝපදේශ අනුව සිදුවිය යුතු බව ජනාධිපතිවරයා අද අදාළ අංශ වෙත උපදෙස් දී තිබේ.
මෙම තීරණ ගන්න ලද්දේ වාර්ෂික පෙරහර මෙවර සංවිධාන කළයුතු ආකාරය පිළිබඳව කොවිඩ් මර්දන ජනාධිපති කාර්ය සාධක බලකායේ සහභාගීත්වයෙන් අද (12) දහවල් ජනාධිපති කාර්යාලයේ පැවති සාකච්ඡාවේදී ය.
සාම්ප්රදායික සහ ආගමික චාරිත්රවලට ප්රමුඛත්වය දෙමින් ප්රධාන පූජ්යස්ථානවල හා දේවාලවල මෙවර පෙරහර සංවිධාන කරන ලෙස ජනාධිපතිවරයා විසින් දියවඩන නිලමේ ඇතුළු බස්නායක නිළමේවරුන්ට එහිදී උපදෙස් දී ඇත.
සියලු පෙරහර පැවැත්විය යුත්තේ අඩුම කලාකරුවන් පිරිසකගේ සහභාගීත්වයෙන් සෞඛ්ය නිර්දේශ පිළිපදිමින් බව සිදු කිරීමේ අවශ්යතාව කොවිඩ් මර්දන කාර්ය සාධක බලකාය අවධාරණය කළේය.
විවිධ ප්රදේශවලින් පෙරහරට සහභාගීවන කලාකරුවන් අදාළ ප්රදේශයේ සෞඛ්ය බලධාරීන්ගෙන් වාර්තාවක් ලබාගත යුතු බවට ද තීරණය කෙරිණ.
දිය කැපීමේ උත්සව ද අවම සංඛ්යාවකගේ සහභාගීත්වයෙන් කළයුතුය. දළදා පෙරහරේ කුඹල් සහ රන්දෝලි පෙරහර වීථි සංචාරය කරන දින 10ම සජීවිව රූපවාහිනියෙන් විකාශය කිරීමට සැලසුම් කර ඇත.
ඇමතිණි පවිත්රා වන්නිආරච්චි මහත්මිය, ජනාධිපති ලේකම් පී.බී. ජයසුන්දර, බුද්ධ ශාසන අමාත්යාංශයේ ලේකම් බන්දුල හරිස්චන්ද්ර මහත්වරු සහ ජනාධිපති කාර්ය සාධක බලකායේ සාමාජිකයෝ සහ දළදා මාළිගාවේ දියවඩන නිලමේ සහ දේවාලවල ප්රධාන බස්නායක නිලමේවරු සාකච්ඡාවට එක්ව සිටියහ.
