ප්රභාත් මනම්පේරි
මියැන්මාරයේ යුධ හමුදාව අද අළුයම් කාලයේ සිදු කරන ද මෙහයුමකින් අනතුරුව අවුන්සාන් සුකී ඇතුළු දේශපාලන නායකයින් අත්අඩංගුවට ගෙන හමුදා පාලනයක් පිහිටුවා තිබේ. මැතිවරණයේ ප්රතිඵල ගැන සිවිල් පරිපාලනය සහ හමුදාව අතර ඇති වූ ආරවුලක් මේ සඳහා හේතු වී ඇත. මේ අත්අඩංගුවට ගැනීම එරට මිලිටරියට අයත් රූපවාහිනී නාලිකාව තහවුරු කර ඇති අතර එක් අවුරුද්දකට හදිසි තත්ත්වයක් ද ප්රකාශයට පත් කර තිබේ.
2011 ප්රජාතන්තවාදී ප්රතිසංස්කරණ හඳුන්වා දුන් අවස්ථාවට ප්රථම දීර්ඝ කාලයක් එරට පාලනය කළේ මිලිටරි පාලනයයි. යුද හමුදා අණදෙන නිලධාරී මින් අවුන් හ්ලැයින්ග්ට රටේ පාලන බලය ලබාදුන් බව හමුදාව අද සඳුදා (01දා) ප්රකාශ කළේය. නායි පියි තව් අගනුවර සහ යැන්ගොන් ප්රධාන නගරයේ වීදිවලට යුද හමුදාව යොදවා තිබිණි. අළුයම් කාලයේ ආණ්ඩුවේ අනෙකුත් නායකයින්ගේ ද නිවෙස්වලට ගොස් ඔවුන් ද අත්අඩංගුවට ගෙන තිබේ.
නොවැම්බර් පැවැති මැතිවරණයේ දී සුකීගේ ජාතික ප්රජාතන්ත්රවාදී ලීගය ආණ්ඩුවක් පිහිටුවීමට තරම් ආසන දිනාගත්තේය. මේ මැතිවරණය දූෂිත බැව් හමුදාව කියයි. මීට දශකයකට පමණ පෙර මිලිටරිය විසින් ම ඉදිරිපත් කරන ලද ව්යවස්ථාව මේ සිද්ධිය නිසා උල්ලංඝනය වී ඇතැයි බීබීසී ගිනිකොන දිග ආසියා වාර්තාකරු ජොනතන් හෙඩ් පෙන්වා දෙයි. අමෙරිකාව, ඕස්ට්රේලියාව ඇතුළු රටවල් රැසක්ම මේ ක්රියාව හෙළාදැක ඇති අතර මානව හිමිකම් සංවිධාන රැසක් ද එය හෙළාදැක තිබේ.
