ලලිත් චාමින්ද –
හබරාදුව, කොක්වත්ත ප්රදේශයේ නිවසකට අද (03) අළුයම එල්ල වූ අකුණු සැර වැදීමකින් කොග්ගල නිදහස් වෙළඳ කලාපයේ සේවය කළ ඇඟලුම් සේවිකාවක මියගොස් තවත් සේවිකාවක බරපතළ තුවාල ලබා තිබේ.
අද අළුයම 12.30ට පමණ ඇද හැළුණු අධික වර්ෂාවත් සමඟ මොවුන් නේවාසිකව සිටි හබරාදුව, කොක්වත්ත අංක 72/ඒ දරන නිවසට අකුණු පහර වැදී ඇති බව පොලිසිය පවසයි. අනතුර සිදු වූ වහාම ක්රියාත්මක වූ ප්රදේශවාසීන් 1990 ගිලන් රථ සේවාව මගින් තරුණියන් දෙදෙනා ගාල්ල කරාපිටිය ජාතික රෝහලට ඇතුළත් කිරීමට පියවර ගෙන තිබුණි.
රෝහල්ගත කරන විටත් එක් තරුණියක මියගොස් සිටි අතර, බරපතළ පිළිස්සුම් තුවාල ලැබූ අනෙක් තරුණිය කරාපිටිය රෝහලේ හදිසි ප්රතිකාර ඒකකයේ ප්රතිකාර ලබමින් සිටියි.
මෙලෙස අවාසනාවන්ත ලෙස ජීවිතක්ෂයට පත්ව ඇත්තේ 26 හැවිරිදි ඉමාෂා මධුභාෂිනි හිතවංශ නැමැති තරුණියකි. තුවාල ලබා ඇත්තේ 25 හැවිරිදි ජී. ඒ. පියුමි නැමැති තරුණියකි. මියගිය සේවිකාවගේ පශ්චාත් මරණ පරීක්ෂණය අද කරාපිටිය ජාතික රෝහලේදී පැවැත්වීමට නියමිතය.
සිද්ධිය සම්බන්ධයෙන් හබරාදුව පොලිසිය වැඩිදුර විමර්ශන සිදු කරයි.
