වැව් රක්ෂිත බලහත්කාරයෙන් අත්පත් කරගෙන සිටින සියලුම දේශපාලකයින්ට එරෙහිව නීතිය ක්රියාත්මක කරන බවත් එම රක්ෂිත යළිත් අත්පත් කරගන්නා බවත් ඉඩම් , වාරිමාර්ග සහ මහවැලි නියෝජ්ය අමාත්ය වෛද්ය සුසිල් රණසිංහ ප්රකාශ කළේය.
එස්.එම්.චන්ද්රසේනගේ සිට ඤාණක්කා දක්වා පිරිස් අනුරාධපුර නුවරවැව රක්ෂිතය දේශපාලන බලය මත බලහත්කාරයෙන් අත්පත් කරගෙන සිටින ආකාරයත් මේ හේතුවෙන් වැවේ මුළු ධාරිතාවට සරිලන ලෙස ජලය රැස්කර තැබීමට නොහැකි වී තිබුණ ආකාරයත් සම්බන්ධව පසුගිය වකවානුව පුරාම බලවත් විරෝධයක් ගොනුවී තිබිණි.
එවන් වටපිටාවක ඊයේ මාධ්ය අමතමින් නියෝජ්ය අමාත්යවරයා මෙසේ කීවේය.
“වැව් රක්ෂිත අල්ලගෙන ඉන්න දේශපාලකයින්ට නම් අනිවාර්යයෙන් ෂොට් එක දෙනවා. ඒවා අත්පත් කරගන්න ඒවට ක්රියා මාර්ග ගන්නවා. ක්ලීන් ශ්රී ලංකා ව්යාපෘතිය යටතේ රුපියල් මිලියන 100ක් වෙන් කරලා තියනවා වැව් රක්ෂිත මැනුම් කටයුතු කරලා ආරක්ෂා කරගැනීම වෙනුවෙන්. ”
“07 වැනිදත් අපි ක්ලීන් ශ්රී ලංකා කාර්යාලයේ දී සාකච්ඡාවක් කරනවා වැඩිම තර්ජනයට ලක් වෙලා තියන වැව් රක්ෂිත මොනවද, ඒවයෙ මැනුම් කටයුතු කරන්නේ කොහොමද කියලා. ”
“විශේෂයෙන්ම අනුරාධපුර නුවරවැව වටේ පදිංචි වෙච්චි අය කවුද කියලා අපි දන්නවා. ඒවා වල ඉන්න දේශපාලකයො කවුද කියලා දන්නවා. දේශපාලකයින්ගේ හයිය ලැබිලා ඉන්නේ කවුද කියලා අපි දන්නවා. මිනින්දෝරු දෙපාර්තමේන්තුවෙන් මැනුම් ලකුණු කරලා තියනවා. ඒවට අදාල මායිම් ලකුණු කරන්න අපි කටයුතු කරනවා.”
“වැව් රක්ෂිත ආරක්ෂා කරගන්න අපි කටයුතු කරනවා. ‘
