මනම්පිටිය නිමල් ජයරත්න –
-
“මත්ද්රව්ය අපරාධකරුවන් අත් අඩංගුවට ගන්න කියලා ඔබට බල කරන්නේ රජය. කිසිම දේශපාලන මැදිහත්වීමක් නෑ… එහෙනම් මොකක්ද තියන ප්රශ්නය… මේ වනවිට හමුදාවටත් පාලනය කරන්න බැරි වැලි ජාවාරම නවත්වන්න කියලා නියෝග කරන්නේ රජය. ඒක කරන්න බැරි ඇයි?… නීතිය ක්රියාත්මක කරන්න බැරි කිසිම කෙනෙකුට ගැලවීමක් නෑ… ඔවුන්ට එරෙහිව රජය නිතිය ක්රියාත්මක කරනවා….” නැවත මේ කතාව කියන්න ඉඩ නොතබන ලෙස නියෝජ්ය ඇමති ටී.බී සරත් පොලිසිය ඇතුළු නිලධාරීන්ට දන්වයි!
පොළොන්නරුව මාදුරුඔය දකුණු ඉවුර ප්රදේශයේ සිදුවන මහා පරිමාණ වැලි ජාවාරමට ශ්රී ලංකා මහවැලි අධිකායේ ආරක්ෂක අංශ මෙන්ම පොලිසිය සම්පූර්ණයෙන්ම වගකිවයුතු බවත්, එම ජාවාරමට මහවැලි ආරක්ෂක අංශය සහ ඇතැම් පොලිස් නිලධාරීන් සහයෝගය ලබාදෙන බවත්, ජාතික ජන බලවේගයේ පොළොන්නරුව දිස්ත්රික් පාර්ලිමේන්තු මන්ත්රී, නිවාස සංවර්ධන නියෝජ්ය අමාත්ය ටී.බී සරත් සඳහන් කළේය.
මේ වනවිට යුද හමුදාවට පවා ජාවාරම මැඩලීමට නොහැකි මට්ටමට පත්ව ඇති හෙයින්, මාදුරුඔය වැලි ජාවාරම්කරුවන් අත්අඩංගුවට ගෙන ඔවුන්ට විරුද්ධව නීතිය ක්රියාත්මක කිරීමට පොලිසිය මැලි වන්නේ නම් ඊට අනුබල දෙන සියලු නිලධාරීන් ජනවාරියේ සිට මාරුවීම් ලබාදීමට පසුබට නොවන බව ද නියෝජ්ය ඇමතිවරයා අවධාරණය කළේය.
පොළොන්නරුව දිස්ත්රික්කය තුළ වසංගතයක් වී ඇති ගංජා, හෙරොයින්, අයිස් මත්ද්රව්ය, ජාවාරම් මර්දනය කිරීමට පොලිසිය වහාම පියවර ගත යුතු බව කී නියෝජ්ය අමාත්යවරයා අවධාරණය කළේ නීතිය ක්රියාත්මක කිරීමේ දී කිසිම දේශපාලන බලපෑමක් ඇති නොවන බවට සහතිකයක් දෙන බවය. ජාවාරම් අත් අඩංගුවට ගැනීමේ දී තම පක්ෂයේ සාමාජිකයෙක් ද නැද්ද යන්න සම්බන්ධව කිසිම ගැටලුවක් නොමැති බව පෙන්වා දුන් ඔහු අපරාධකරුවන් අත්අඩංගුවට ගෙන නීතිය ක්රියාත්මක කිරීමට නොහැකි නිලධාරීන් සිටී නම් ඒ පිළිබඳ තමාව දැනුවත් කරන ලෙසත් එවැනි නිලධාරීන්ට උපරිම නීතික ක්රියාත්මක කිරීමට රජයක් ලෙස කටයුතු කරන බව දන්වා සිටියේය.
නියෝජ්ය අමාත්ය ටී.බී. සරත් පෙරේදා (13 ) පොළොන්නරු දිස්ත්රික් ලේකම් කාර්යාලයේදී පැවති දිස්ත්රික් සංවර්ධන කමිටු රැස්වීමේදි මේ බව ප්රකාශ කළේය. එහිදී නියෝජ්ය ඇමතිවරයා මෙසේ ද කීවේය.
” පොලිසිය ගැන විශ්වාසයක් නැති නිසයි, අපි මාදුරුඔය යුද හමුදාව වැලි වැටලීම් සඳහා යොමු කළේ. නමුත් ඒ අයටත් මේ ජාවාරම නවත්තන්න බැරි තරමට උග්ර වෙලා තියෙනවා. පාර්ලිමේන්තුවේ ආසන තුනක් තිබුණු දේශපාලන ව්යාපාරය, 1978 ව්යවස්ථාවෙන් පසුව ආසන 159 ක් ලැබුණු එකම අවස්ථාව මේක. ඇයි ඒ, අපි හොඳ නිසාද… නෑ, මේ මිනිස්සුන්ට දේශපාලන එපා වෙලා තිබුණේ. ඒ දේශපාලන එපා වීම මත, තෝරාගන්න වෙන පක්ෂයක් තිබුණ නැති නිසා අපි තමයි අපිව තෝරාගත්තේ.
ඒ නිසා අපි ජනතා ප්රශ්න විසඳීමේ කාර්යයට වගකියන්න ඕනේ.
මේ රටේ ජනතාව ඡන්දෙ දීල තියෙන්නේ ඔබේ පරිපාලනයටත් එක්ක, අපිව විශ්වාස කරලා. මේ ජනවරමට වගකියන්න බැරිනම් ගෝඨාභය රාජපක්ෂ මහතා ගිය විදිහට නෙමෙයි අපිට යන්න වෙන්නේ. ඊළඟ පාර මේ රටේ ජනතාව විතරක් නෙවෙයි අපිව එළවන්න පාරට බහින්නේ… රාජ්ය නිලධාරිනුත් පාරට බහිනවා. මේ යථාර්ථය අපි හොඳට දන්නවා. ඒ නිසා රජයක් ලෙස අප ඔබට ඉතාම දැඩිව කියනවා. මේ ජාවාරම්කරුවන්ට ඉඩ තියන්න එපා.
ජාවාරම්කරුවන් අල්ලන්න බෑ කියන්නේ අපි අපොහොසත්. දේශපාලකයින් වන අපිට වැඩිය බලයක් පරිපාලන කටයුතුවල දී ආයතන ප්රධානීන්ට තියෙනවා. ඒ රාජකාරිය අකුරට කරන්න. අපෙන් කිසිම බාධාවක් නෑ. අපි අබමල් රේණුවක මේ රටේ ජනතාවගේ දේපල හොරකම් කරන්නෑ. දූෂණ,ජාවාරම් කරන්නේ නෑ. කුඩු අදින්නෙ නෑ. කිසි ජාවාරමක් අපි කරන්නෑ. ඇයි ඔබට බැරි මේ ජාවාරම්කරුවන්ට නීතිය ක්රියාත්මක කරන්න.
වැලිකන්ද බෝවත්තේ සජබේ කෙනෙක් කියනවලු, එදත් අපි ගනංකාරයෝ, මෙදත් අපි ගනම් කාරයෝ කියලා,උඹලා ඕන දෙයක් කරපල්ලා අපි වැලි ගොඩ දානව කියල, එහෙම ගණන්කාරයෝ ඉන්න පුළුවන්ද?.
ඔය ඕනම ගණනකාරයෙකුට විරුද්ධව අපිට ලැබුන ජලබලයට වැඩ කරන්න පුළුවන්. අපි එහෙම කරන්නෑ. මේ ගරු සභාවේ දිස්ත්රික්කයේ සියලුම ප්රධානීන් ඉන්න සභාවක්. එනිසා ආයේ මම කියපු දේවල් කතා කරන්න ඉඩ තියන්න එපා. අපි අපේ රාජකාරිය අකුරට කරමු. ජාවාරම්කරුවන්ට විරුද්ධව සියලු දෙනාම කටයුතු කරන්න ඕනේ. යැයිද ටී.බී. සරත් මහතා වැඩිදුරටත් සඳහන් කළේය.
