කොරියානු රැකියා අපේක්ෂාවෙන් සිටින තරුණයින් 107 දෙනෙකුට කොරියානු E8 වීසා ලැබී තිබුණත් එම වීසා ඛාණ්ඩය යටතේ අදාල රැකියාවලට යෑමට රජයේ අනුමැතිය නොලැබීම විදේශ සේවා නියුක්ති කාර්යාංශය ඉදිරියේ දී අද පුපුරා ගියේය.
උදේ සිට ඇරඹී තිබුණ විරෝධතාවයක් අවසානයේ දී පොලිසිය සමග ගැටුමකින් කෙළවර වන්නේ විරෝධතාවය සත්යග්රහයක දිගුවක් කරා ගෙන යෑමට රැකියා අපේක්ෂිත තරුණයන් අට්ටාලයක් ඇටවීමට කළ උත්සාහයේ දී පොලිසිය ඊට එරෙහි වී එම උත්සාහය වැළැක්වීමෙනි.
වීසා ලැබී රැකියා සඳහා යෑම මගහැරුණ බව කියමින් මේ පිරිස් විරෝධතා පටන් ගන්නේ පසුගිය ආණ්ඩුව කාලයේදීමය. මේ වනවිට තත්ත්වය තීව්ර වී ඇත්තේ තව දින තුනකින් අදාල E8 ඛාණ්ඩයේ වීසා අවලංගු වීම හේතුවෙනි.
මොනවද මේ E8 වීසා
E8 වීසා ලෙස හැඳින්වෙන්නේ කොරියාව හඳුන්වා දෙන ඍතුමය කම්කරු වීසා ක්රමයකි. එම වීසා නිකුත් කරන්නේ කෘෂිකර්ම සහ ධීවර රැකියාවල නිරත වීම සඳහා මාස 6 – සිට මාස 8 දක්වා කෙටි කාල සීමාවකටය.
කොරියානු රජයේ පළාත් පාලන ආයතනයක්, විදේශයක පළාත් පාලන ආයතනයක් සමග ඇතිකරගන්නා අවබෝධයතා ගිවිසුමක් මගින්තෝ රාගත් ශ්රමිකයින්ට මෙම ඛාණ්ඩයේ වීසා නිකුත් වන්නේය. ඒ හැරුණු කොරියානු පුරවැසියෙක් සමග විවාහ වී F-6 වීසා බලපත්රයක් ලබා ගත් පුද්ගලයෙකුගේ ඥාතියෙක් විසින් නිර්දේශ කිරීමෙන් විදේශිකයෙකුට මෙම ඍතුමය වීසා ඛාණ්ඩය යටතේ ධීවර සහ කෘෂිකාර්මික සේවා සඳහා රැකියා අවස්ථා ලබා ගත හැකිය.
කොරියානු කම්කරු නීතියට අනුව අවම වැටුපට අනුකූල වැටුපක් මෙහිදී ලැබෙන්නේය. නවාතැන් සහ සෞඛ්ය පහසුකම් සැපයෙන්නේ ශ්රමිකයා සේවයේ යොදවන පළාතේ පළාත් පාලන ආයතනවල පරීක්ෂාවට යටත්ව. කාර්මික අනතුරු සඳහා රක්ෂණ ලියාපදිංචිය අනිවාර්යය. මසකට අවම වශයෙන් දින දෙකක නිවාඩුවක් සහතික වන්නේය.
අද විදේශ සේවා නියුක්ති කාර්යාංශය ඉදිරිපිටදී පොලිසිය සමග ගැටුනේ මේ වීසා ලද තරුණ කණ්ඩායමය.
මේ සම්බන්ධව විදේශ සේවා නියුක්ති කාර්යාංශයේ අතිරේක සාමාන්යාධිකාරී ගාමිණී සෙනරත් යාපා පවසන්නේ පැවති රජය මේ සම්බන්ධව නිවැරදි ක්රමවේදයන් ඔස්සේ කටයුතු කර නැති බවය.
කාරණාව නම් රටක් තවත් රටක් සමග කරන රාජ්ය තාන්ත්රික රැකියා ගිවිසුමක නීත්යානුකූල භාවය වලංගු භාවය එවකට කම්කරු අමාත්ය මනුෂ නානායක්කාර විසින් ගිවිසුම්ගත ගිවිසුමේ නොවීමය.
“මේ ගිවිසුමට නීත්යනුකූලභාවයක් නැහැ. කැබිනට් එකෙන් අනුමැතිය අරගෙන නැහැ, නීතිපතිතුමාගෙන් අනුමැතිය අරගෙන නැහැ, විදේශ කටයුතු අමාත්යංශයෙන් අනුමැතියක් අරගෙන නැහැ, විදේශ සේවා එක දන්නේ නෑ, එතකොට ඒක තනි පුද්ගලයෙකුගේ තනි අවශ්යතාව මත වෙච්ච දෙයක්,” යැයි විදේශ සේවා නියුක්ති කාර්යංශයේ අතිරේක සාමාන්යාධිකාරි ගාමිණී සෙනරත් යාපා බීබීසි සිංහල සේවයට පවසා තිබිණි. මේ ගැන හිටපු කමකරු ඇමති මනුෂ නානායක්කා කියා තිබුණේ මෙවැන්නකි.
රජයක් ලෙස E8 වීසා ලියාපදිංචි කිරීම සඳහා අදාල පිරිස ලියාපදිංචි කළ නොහැකි තත්ත්වයක් ඇති වී තිබෙන බව මේ වනවිට විදේශ සේවා නියුක්ති කාර්යාංශ කියන්නේය. මනුෂ කියන්නේ මේ වීසා ඛාණ්ඩයේ රැකියා අවස්ථා ලබා ගැනීම සඳහා ඇමතිකමේ ගර්වය පසකෙ තබා කොරියාවේ නරග සභාවක් පාසා ඇවිද ගිය කතාවකි.
නීත්යානුකූල නොවන ගිවිසුමක් කේන්ද්ර කරගත් අර්බුදය මේ වනවිට අපරාධ විමර්ශන කොට්ඨාසයට යොමු කර ඇත. සඳුදා නීතිපති දෙපාර්තමේන්තුවට ද කරුණු ඉදිරිපත් කිරීමට නියමිතය. එහෙත් අඟහරුවාදා වීසා කැන්සල් වන්නේය.
” වීසා ලැබිලත් අපට කොරියාවට යන්න නෑ. මේ විදේශ සේවා නියුක්ති කාර්යාංශය කියන හොර ගුහාව අපව නවත්වාගෙන ඉන්නවා. අපට රැකියාවට යන්න දෙන්නේ නෑ. මේ සම්බන්ධව මේ මාස තුන පුරාම අපි අරගල කළා. මේ අරගල ආරම්භ කළේ පසුගිය ආණ්ඩුව සමයේ. ” අද විරෝධතාවයේ සිටි තරුණයෙක් කීවේය.
“26 වැනිදා වීසා කැන්සල් වෙනවා. ඊට කලින් මේ ගැන බලන්න. අපට අසාධාරණය කරලා තියෙන්නේ බියුරෝ එකෙන්. E 8 වීසා එක නීත්යානුකූල නැතිනම් එය නීත්යානුකූළ කිරිමේ වගකිම බලධාරීන්ට තියනවා. අපට අසාධාරණය කළේ බියුරෝ එකෙන්. කොරියාවෙන් අපව ගෙන්වා ගන්න කැමතියි. නමුත් බියුරෝ එකෙන් යවන්නේ නෑ.” තරුණියක් කීවාය.
විවිධාකාරයෙන් දේශපාලනය හරහා අවභාවිතා වුන තරුණ පිරිස් අලුත් ආණ්ඩුව සමග අලුත් වටයකින් ස්වකීය බිඳවැටුන අපේක්ෂා සමග පොරබැදීම ආරම්භ කර ඇත. තේරුම් ගත යුත්තේ මේ ගිනි අවුවේ වේලෙමින් උගුර ලේ රහ වනතුරු කෑ ගසා මේ යෞවනයින් ඉල්ලා සිටින්නේ දේශපාලනය විසින් මහා ගර්වයක් මවා පෙන්වූ කොරියාවේ ලාභම කම්කරු වෘත්තියේ මාස හය හතක රැකියා අවස්ථාක් වෙනුවෙනි. විදේශවලින් ආනයනය කරනු ලබන මිනිස් දූවිලි සඳහා ලැබී ඇති ඉඩ තමන්ගෙන් පිරවීමට අවස්ථාව දෙන ලෙස මේ තරුණයින් ඉල්ලා සිටිති. ඔවුන්ගේ ජීවිත අපේක්ෂාවන් ඒ තරම් ඛේදවාචකයක ය. එය හඬා වැටිය යුතු කතාවක් කියන බව විශ්වාස කරමු.
