හොර වාහනයක් සන්තකයේ තබාගෙන රට පලන්නට උත්සාහ කර මේ වනවිට බන්ධනාගාරගතව සිටින ගාල්තැන්න කපුවාට අයත් තවත් හොර වාහනයක් අම්පිටිය ගාල්තැන්නේ ඔහුට හිමි වාහන අංගනයේ තිබියදී තෙල්දෙණිය පොලිසිය විසින් සොයාගෙන තිබේ.
ව්යාජ අංක තහඩු සහිත මෙම වාහනය රුපියල් කෝටි ගණනක් වටිනා සුඛෝපභෝගී මොන්ටෙරෝ ජිප් රථයක් බවත්, ජිප් රථයේ තිබූ අංක තහඩුව මෝටර් රථ ලියාපදිංචි කිරීමේ දෙපාර්තමේන්තුවට යොමු කර සොයා බැලීමේ දී එම අංකය නීත්යානුකූලව ලියාපදිංචි කළ මෝටර් රථය කුලියාපිටිය ප්රදේශයේ ව්යාපාරිකයෙකුට අයත් මෝටර් රථයක ලියාපදිංචි අංකය බවත් තෙල්දෙණිය කොට්ඨාස අපරාධ විමර්ශන අංශය කියයි.
පොලිසිය ඔහුගෙන්ද ප්රකාශයක් සටහන් කරගැනීමෙන් අනතුරුව ඊයේ (06) පස්වරුවේ ගාල්තැන්න දේවාල පරිශයේ වාහන අංගනයේ තිබී අදාල මොන්ටොරෝ ජිප් රථය පොලිස් භාරයට ගෙන ඇත. මෙම අංගනයේ මොන්ටෙරෝ, ප්රාඩෝ, සහ ඩිෆෙන්ඩර් මෙන්ම කාර් ද සහිතව සුඛෝපභෝගී අධි වටිනාකමක් සහිත වාහන 12ක් ඇති බවත්, මේ සෑම වාහනයකම ලියාපදිංචි අංක මෝටර් ලියාපදිංචි කිරීමේ දෙපාර්තමේන්තුව වෙත යොමුකර වාර්තාවක් ලබා ගැනීමට විමර්ශන අංශ කටයුතු කරගෙන යයි.
මින්පෙර දිගන සීඅයිසී නිවාස සංකීරණයට ලොහාන් රත්වත්තේ ගේ සිය දිවි නසා ගත් ලේකම්වරයා විසින් ගෙනත් දැමූ බව කියමින් තමන්ගේ හිමිකම සහිත හොර මිට්ෂුබිෂි ජිප් රථයක් පිළිබඳ විමර්ශන නොමග යවා එම කෝටි ගණනක ජිප් රථය සම්බන්ධ වගකීමෙන් මිදෙන්නට උත්සාහ කළ ගාමිණී ආනන්ද හෙවත් ගාල්තැන්නේ කපුවා තෙල්දෙණිය පොලිසිය විසින් අත් අඩංගුවට ගෙන තෙල්දෙණිය මහේස්ත්රාත් අධිකරණයට ඉදිරිපත් කළේය. ඔහුව ලබන 11 වැනිදා දක්වා රක්ෂිත බන්ධනාගාරගත කිරීමට අධිකරණය නියෝග කළේය.
