සූරියවැව නුවන් ජයසේකර –
දුෂ්කර දීමනාවක් ලබා දිමට විස්තර ලබා ගැනීමට බුද්ධ සාසන අමාත්යංශයෙන් යැයි පවසා විහාරස්ථානයට පැමිණි කාන්තාවක හා පිරිමි පුද්ගලයෙකු හිමි නමගේ දුරකතන සිම්පත සොරකම් කරගෙන ගොස් බැංකු ගිණුමේ තිබූ රුපියල් 80,000ක මුදලක් ඔන්ලයින් ක්රමයට සොරා ගැනීමේ සිද්දියක් සම්බන්ධයෙන් ලද පැමිණිල්ලකට අනුව විමර්ශන ආරම්භ කළ බව ලුණුගම් වෙහෙර පොලිසිය පවසයි.
බෙරලිහෙල,වම් ඉවුර සඳගල ආරණ්ය සේනාසනයේ වැඩ සිටින 59 හැවිරිදි ලාල්පේ බුද්ධරක්ඛිත හිමියන් විසින් ලුණුගම්වෙහෙර පොලිසියට මෙම පැමිණිල්ල සිදුකර තිබේ.
මිට දින කිහිපයකට පෙර තණමල්විල මහජන බැංකුවෙන් බව පවසා මෙම හිමියන්ට දුරකතන ඇමතුමක් ලැබුණු බවත් වැට් එකට ගිණුමෙන් මුදල කැපෙන බවත්, එය නැවැත්විම සඳහා විස්තර අවශ්ය බවත් පවසා ජාතික හැදුනුම්පත් අංක ආදිය ලබා ගැනීමෙන් පසු ගිණුම් මුරපදය ඉල්ලා තිබේ.
එවිට සැක සිතී එම හිමියන් තොරතුර ලබා දිම ප්රතික්ෂේක කර ඇත.
ඉන්පසු යළිත් පසුගිය 01 වන දින වෙනත් දුරකතන අංකයකින් බුද්ධ සාසන අමාත්යංශයෙන් බව පවසා මෙම හිමියන්ට ඇමතුමක් ලැබී තිබේ. එහිදී පවසා ඇත්තේ දුෂ්කර දිමනාවක් ලබා දිම සදහා විස්තර අවශ්ය බවත් ඒ සඳහා පැමිණෙන නිළධාරීන් දෙදෙනාට විස්තර ලබා දෙන ලෙසත්ය.
ඒ අනුව එදිනම දවහල් 10ට පමණ වයස අවුරුදු 30ක පමණ වයසේ පසුවන පිරිමි පුද්ගලයෙකු හා අවුරුදු 45තරම් වයසේ පසුවන කාන්තාවක විහාරස්ථානයට පැමිණි මෙම හිමි නම බැහැදැක තමන් බුද්ධ සාසන අමාත්යංශයේ බව පවසා බැංකු ගිණුම් ඇතුළු විස්තර ඉල්ලා තිබේ.
එම අවස්ථාවේ මෙම හිමි නම සිය ජංගම දුරකතය එම ස්ථානයේම තිබියදී ලිපිගොනු රැගෙන ඒම සදහා ආවාසය තුළට ගොස් ඇත. අදාල ලිපි ලේඛන විස්තර ලබා ගැනීමෙන් පසු දෙදෙනා පිටත්ව ගොස් තිබේ.
මද වේලාවකින් හිමි නම දුරකතනය පරික්ෂා කිරීමේදි එහි සිම්පත් දෙක නොමැති බව දැක සැක සිතී කඩිනමින් තිස්සමහාරාම පිහිටි රාජ්ය බැංකුවකට ගොස් සිය ගිණුම් පරීක්ෂා කර ඇත.
හිදී දැනගැනීමට ලැබී ඇත්තේ ගිණුමේ තිබූ මුදල ඔන්ලයින් ක්රමයට ලබාගෙන ඇති බවය.ඒ අනුව හිමි නම විසින් සිද්ධිය සම්බන්ධයෙන් ලුණුගම් වෙහෙර පොලිසියට පැමිණිල්ලක් ගොනු කර තිබේ.
සිද්ධිය සම්බන්ධයෙන් තංගල්ල කොට්ඨාස භාර ජ්යෙෂ්ඨ පොලිස් අධිකාරී සිසර පෙත්තතන්ත්රි මහතාගේ උපදෙස් පරිදි ලුණුගම්වෙහෙර පොලිස් ස්ථානාධිපති පොලිස් පරික්ෂක චින්තක වික්රමරත්න ඇතුළු නිළධාරීන් පිරිසක් විමර්ශන පවත්වයි.
