පොළොන්නරුව දිස්ත්රික්කයේ සෝමාවතිය ජාතික වනෝද්යානයේ ඉඩම් අක්කර 3000කට ආසන්න ප්රමාණයක් පල්ලියගොඩැල්ල ප්රදේශයේ ජනතාව විසින් බලහත්කාරයෙන් අත්පත් කර ගැනීම සඳහා මැදිහත් වූ මැදිරිගිරිය ප්රාදේශීය ලේකම්වරිය සම්බන්ධයෙන් කිසිදු පියවරක් ගැනීමට වන ජීවී සංරක්ෂණ දෙපාර්තමේන්තුව හෝ අදාළ අමාත්යංශ මෙතෙක් පියවර ගෙන නොමැති අතර බලහත්කාරයෙන් සිදුවූ මෙම අත්පත් කර ගැනිමට ඉඩ ලබා දීම සම්බන්ධයෙන් වන සංරක්ෂණ කැබිනට් අමාත්යශයේ ලේකම් වරයා විසින් සෝමාවතිය අදාළ ප්රදේශය භාර සහකාර වන ජීවී අධ්යක්ෂවරයාගෙන් නිදහසට කරුණු විමසා ඇති බව වාර්තා වේ.
මෙම සහකාර අධ්යක්ෂවරයා මෙම ඉඩම් බලහත්කාරයෙන් අල්ලා ගැනීමට දැඩි සේ විරුද්ධ වූ පුද්ගලයකු වන අතර ඔහුට මේ විරුද්ධ වීම මත වනජීවි රැකවරණය, අලි වැට හා අගල් ඉදිකිරීම් ඇතුළු ආරක්ෂිත වැඩපිළිවෙලවල් හා කැළෑ නැවත වගා කිරීම් හා වන සම්පත් සංවර්ධන අමාත්යංශයේ ලේකම්වරයාගේ දෝෂාරෝපණයට ලක් වීමටද හේතු වී ඇත.
එවැනි තත්ත්වයක් තිබියදි මෙම බලහත්කාරී ක්රියාව මෙහෙයවූ පුද්ගලයින් පසෙක තබා ඊට විරුද්ධ වූ පුද්ගලයන් සම්බන්ධයෙන් නිදහසට කරුණු විමසීම හාස්යජනක කරුණක් බවට පත්ව ඇතැයි ලංකාසරට මේ පිළිබඳව කරුණු අනාවරණය කළ වනජීවී ආරංචි මාර්ග සඳහන් කළේය.
ප්රාදේශීය ලේකම්වරිය අත්තනෝමතික ලෙස ක්රියා කරමින් ජාකික වනෝද්යානයක මායිම් සලකුණු ඉවත් කිරීම සඳහා ජනතාව පොලඹවා ඇති අතර මෙම ජනතාව මෙසේ වනෝද්යානයේ මායිම් ගල් හතරක් පමණක් ඉවත් කර ඇත. මෙම මායිම් ගල් හතරේ වෙනසින් පවා වනෝද්යානයේ අක්කර 3000ක් දින දෙකක් තුළ ආක්රමණය කිරීමට ජනතාවට හැකි වි ඇත.
රටේ පවතින නීති කඩමින් සිදු කරන ලද මෙම ක්රියාව පසුපස ළහල පෙළේ දේශපාලන හස්තයක් ක්රියාත්මක වන බවට වාර්තා වන අතර ඔවුන් මෙයට සෘජුවම සම්බන්ධ නොවී රජයේ නිලධාරීන් හරහා එය සිදු කිරීම ඔවුන්ගේ ක්රමෝපාය වි ඇති බව වාර්තා වෙයි.
ඊයේ (18) සහ පෙරේදා (18) සිදුවූ මෙම සිදුවීම සම්බන්ධයෙන් සොයා බැලිමට වන සංරක්ෂණ අධ්යක්ෂ ජනරාල්වරයා විසින් කමිටුවක් පත් කරනු ලැබ ඇති බව වාර්තා වන අතර මෙම කමිටුවේ නිර්දේශ මත ඉදිරි කටයුතු සිදුවනු ඇති බව වන ජීවී දෙපාර්තමේනතුවේ ප්රකාශකයෙක් ලංකාසර ට පැවසීය.
මේ පිළිබඳව නිවේදනයක් නිකුත් කරන – ශ්රී ලංකාවේ ජෛව විවිධත්ව සංරක්ෂණ හා පර්යේෂණ කවයේ කැඳවුම්කරු සුපුන් ළහිරු ප්රකාශ් මහතා පවසන්නේ
මැදිරිගිරිය ප්රාදේශීය ලේකම්ගේ මෙහෙයවීමෙන් සංවිධානාත්මක පුද්ගලයින් පිරිසක් සෝමාවතිය ජාතික වනෝද්යානයට නීතිවිරෝධී ලෙස ඇතුළු වී උත්සාහ දරා ඇත්තේ පල්ලියගොඩැල්ල ප්රදේශයේ සෝමාවතිය ජාතික වනෝද්යානයට අයත් ඉඩම් නීතිවිරෝධී ලෙස අල්ලා ගැනීමයි.
සෝමාවතිය ජාතික වනෝද්යානය මහවැලි වනජීවී කලාපයේ පිහිටා ඇති ප්රධාන වනජීවී ආරක්ෂිත ප්රදේශවලින් එකක්. එය ඉතා වැදගත් වන අලි වාසභූමියක්. ශ්රී ලංකාවේ වන අලි ගහණයෙන් සියයට තිහක් (30%) මහවැලි වනජීවී කලාපයේ වෙසෙන අතර, මේ ආකාරයේ අනවසරයෙන් ඔවුන්ගේ නිජබිම් කළහොත්, එය අලි- මිනිස් ගැටුම් අවම කිරීම සහ අලි සංරක්ෂණයට අහිතකර ලෙස බලපානු ඇති. අපගේ ප්රකාශිත පර්යේෂණ දත්ත වලට අනුව, පොළොන්නරුව දිවයිනේ දෙවන වැඩිම අලි-ගැටුම් වාර්තාවන දිස්ත්රික්කය වන අතර මෙවැනි නීතිවිරෝධී ආක්රමණයන් එම දිස්ත්රික්කයේ ගැටලුව තවදුරටත් උග්ර කිරීමට හේතු වේ. මෑතකදී ජලගැලුම් නිම්න ජාතික වනෝද්යානයෙන් අක්කර 2000 ක ඉඩමක් අත්පත් කර ගැනීමට මීට සමාන උත්සාහයක් දැරූ ආකාරය අපට මතකය. සෝමාවතිය ජාතික වනෝද්යානයේ සිදුවූ සිදුවීම ද දේශපාලන මැදිහත්වීමෙන් මෙම කලාපයේ වනජීවී ආරක්ෂිත ප්රදේශ ආක්රමණය කිරීමේ දිගුවක් ලෙස හඳුනාගත හැකියි.
මේ ආකාරයේ වන විනාශයන් රටේ පරිසර සංරක්ෂණය හා තිරසාර සංවර්ධනය පිළිබඳ ජනාධිපතිතුමන්ගේ දැක්මට පටහැනි බව අපි තරයේ විශ්වාස කරනවා. ආරක්ෂක ලේකම්වරයාත් මෑතකදී ප්රකාශ කළේ වනාන්තර ඉඩම් අල්ලා ගැනීම සඳහා බලපත්ර නිකුත් කිරීමේදී ප්රාදේශීය ලේකම්වරුන්ගේ යම් යම් විෂමාචාරයන් සිදුකර ඇති බව තමා විසින් සොයාගෙන ඇති බවත් එය වැලැක්විය යුතු බවයි. මැදිරිගිරිය ප්රාදේශීය ලේකම්ගේ මෙම අත්තනෝමතික හා අයුක්ති සහගත හැසිරීම එවැනි විෂමාචාරයක්. එය 2009 අංක 22 දරණ වන සත්ත්ව හා වෘක්ෂලතා ආරක්ෂක (සංශෝධන) පනතට හා 1980 අංක 47 දරණ ජාතික පාරිසරික පනතට පටහැනි යි. කිසිවෙකුට කිසිදු ජාතික උද්යානයකට හෝ අවම වශයෙන් එහි මායිමේ සිට සැතපුමක පරිවාරක කලාපයකට හෝ හානි කළ නොහැකි අතර ජාතික උද්යානයක හෝ ඒ අවට යමෙකුට යම් සංවර්ධනයක් කිරීමට අවශ්ය නම් එය සිදු කළ යුත්තේ පාරිසරික බලපෑම් තක්සේරුවකට අනුවයි. එබැවින්, මැදිරිගිරිය ප්රාදේශීය ය ලේකම්ගේ ක්රියාකලාපය අපි තරයේ හෙළා දකිනවා. ඇයට එරෙහිව විනය ක්රියාමාර්ග ගෙන සෝමාවතිය ජාතික වනෝද්යානය සුරක්ෂිත කරන ලෙස අදාළ බලධාරීන්ගෙන් ඉල්ලා සිටියෙමු. එසේ නොවුවහොත් මෙය රටේ වනජීවී ආරක්ෂිත ප්රදේශ අනවසරයෙන් අල්ලා ගැනීම සඳහා වැරදි පූර්වාදර්ශයක් විය හැකි අතර වර්තමාන වන විනාශය වඩාත් නරක අතට හැරෙනු ඇති.“ යයි පැවසීය.
