සෙල්ල කතරගම පූජා භූමි පරිශ්රයේ කස්තුරි, වලස් තෙල්, ඌරු තෙල්, මොණර තෙල් සමඟ කිඹුල් දත්, මුව හම් හා ඇත් දළ උපයෝගි කර ගනිමින් සකස් කළ මාල, වළලු, පෙන්ඩන් ආදිය විකුණනමින් සිටිය දී ඌව පළාත් වනජීවී නිලධාරීන් විසින් පසුගිය 17 වැනිදා අත් අඩංගුවට ගත් දඹානේ ආදිවාසී පුද්ගලයෙක් සහ ඔහුගේ සහචරයා කතරගම සංචාරක උසාවියට ඉදිරිපත් කිරීමෙන් පසු ඔවුන් දෙදෙනාට රුපියල් හයලක්ෂ පන්දහසක (605000.00) දඩ මුදලක් නියම කර තිබේ.
වන සත්ත්ව හා වෘක්ෂලතා ආරක්ෂක ආඥා පනතේ වගන්ති උල්ලංඝනය කිරීම යටතේ අධිකරණයට ඉදිරිපත් කිරීමෙන් පසු මෙලෙස දඩ මුදල් ගෙවීමට නියම වූ දඹානේ ආදිවාසියෙක් වූ ඌරුවරිගේ උදය කුමාරට සහ ඔහුගේ සහචරයා ලෙස සිටි තඹුත්තේගම පදිංචි බාලක්රිෂ්ණන් රාජු යන දෙදෙනාටය.
දඹානේ ආදිවාසි ඌරුවරිගේ උදය කුමාර නැමැති අයට රුපියල් 405000.00 දඩයක් නියම විය. බාලක්රිෂ්ණන් රාජු නැමැති අයට රුපියල් 200000.00 ක දඩයක් ද නියම වූයේය.
සැකකරුවන් සතුව තිබී ඇත් දළ වලින් සකස් කරන ලද මුදු 12 ක්, මුවෙකු ගේ අස්ථි කොටස් වලින් සකස් කරන ලද මාල,අලි හක්කේ කොටස් වලින් සකස් කරන ලද පෙන්ඩන්, අලි කෙඳි 84 ක්, කිඹුල් දත් 13 ක්, කළුවර ලීයෙන් නිමවන ලද දේව පිළිම ඇතුළු භාණ්ඩ තොගයක් වනජීවි නිලධාරීන් ගේ භාරයට ගෙන තිබේ.
ඌව පළාත් වනජීවි කාර්යාලයේ වනජීවි සහකාර අධ්යක්ෂ ඩබ්ලිව්.ඒ.ඒ.ඩී.යූ ඉන්ද්රජිත් මගේ උපදෙස් මත මෙම වැටලිම සිදුකර ඇත.
