ජානක ලියනආරච්චි –
ඇමති ලාල් කාන්ත සහෝදරයා ඊයේ මෙසේ කීවේය.
“දැන් ඔන්න සිරි දළදා වන්දනාව තියනවනේ මේ දවස්වල. ඔයගොල්ල පිළිගන්න මේ කතාව. මට ඉන්නවා යාලුවො ගොඩාක්. නෑදෑයො ඉන්නවා. දන්න කියන මිනිස්සු ගොඩාක් ඉන්නවා අපේ සමාජයේ. අපේ ටෙලිෆොන් නම්බර්ස් තියනවා ගොඩාක් අය ලඟ. එක්කෙනෙක්වත් කතා කරලා කිව්වෙ නෑ … තමන්ට පෞද්ගලිකව යන්න පුලුවන් ක්රමයක් හදලා දෙන්න කියපු එක්කෙනෙක්වත් නෑ…. එක්කෙනෙක්වත් නෑ.”
“ඇමති තුමා අපට මේක බලන්න යන්න වීඅයිපී… මොකක් හරි ක්රමයක් හදලා දෙන්න කියලා… එහෙම කියපු එක්කෙනෙක්වත් නෑ. මොකක්ද මේ වෙලා තියෙන්නේ… ජාතික වශයෙන් දේශපාලන සංස්කෘතිය හැදෙනකොට පහළිනුත් ජනතාව හැදෙනවා… ඒකයි ඒ තියෙන්නේ.”
“මම ගියා… ජනාධිපති තුමා එක්ක. නුවර භාරව ඉන්න සංවිධායකයා නිසා මම යන්න ඕන ජනාධිපති තුමා එක්ක. ඒ නිසා ගියා. කීප දෙනෙක් මගෙන් අහනවා නෝනලා ආවෙ නැද්ද කියලා. මම කිව්වා නෝනලා නෑ… නෝන කෙනෙක් නම් ඉන්නවා. අපි යනකොට ඒගොල්ල කතා කළත් එන්නේ නෑ. අපි කතා කරන්නෙත් නෑ. ඒ ගොල්ලන්ට එහෙම අහන පුරුද්දකුත් නෑ. ඇහුවත් දන්නවා… එහෙම එක්කගෙන යන්නේ නෑ.”
“ඒ ගොල්ල විතරක් නෙමෙයි… ලඟ ඥාතියෙක් මිත්රයෙක් මන්ත්රීලා… මේ ඡන්දේ ඉල්ලන අය. කිසිකෙනෙක් අර පෝලිමේ ගිහින් සිරි දළදා වන්දනාව කරනවා හැර අපට යන්න වෙන ක්රමයක් නැද්ද කියලා අපහු එක මිනිහෙක් නෑ… මන්දා මගෙන් නම් අහලා නෑ. ඒක අපේ රටේ ජනතාව හොඳ විදිහට හැඩ ගැසෙනවා වෙනස් වෙනවා කියන එකට තියන හොඳම සාක්ෂියක්. ”
ලාල් කාන්ත සහෝදරයාගේ මට්ටමින් ඒ කතාව හරි වෙන්නට පුලුවන. ඔහුගෙන් සිරි දළදා වන්දනාවට පෝලිම් පැන යන්න අහන්නේ නැත. ඉල්ලීමක් කර වැඩක් කරගන්න හැකි ආකාරය මිනිස්සු දන්නේය. ඒ ගේම මේ වනවිටත් ගැහෙන්නේය. කණගාටුවෙන් වුවද ලාල් සහෝදරයාට දන්වන්ට වන්නේ දේශපාලන සංස්කෘතිය වෙනස් වුවද සමාජයේ සංස්කෘතිය වෙනස් වී නැති බවය. එබැවින් දකින හීනයෙන් අවදිවීමත් තුනෙන් දෙකක බලයක් තිබුණද මේ සමාජය තුළ අත තැබිය නොහැකි මුදා ගත නොහැකි කලාප තිබෙන බවට දැනුම්වත් වීමත් ඒ කලාප විධිමත් කිරීමට විධායක ජනාධිපතිවරයාටවත් නොහැකි බව දැනගැනීමත් ලාල් කාන්ත සහෝදරයා ඇතුළු ආණ්ඩුවේ සහෝදරවරුන්ගේ දේශපාලන සංස්කෘතියට යහපත්ය.
එමෙන්ම එම අසංස්කෘතික කලාප සංස්කෘතික කිරීමේ බලය තමන් සතුව ඇති බව වූ අවබෝධාත්මක සංයමයකින් එය වෙනස් කිරීමට මැදිහත්වීම ජනතා අපේක්ෂාවක් බවත් මිනිසුන් ඡන්දය දුන්නේ ඒ උදෙසා බව ද තේරුම් ගැනීමට කාදිනල් තුමා අද කළ විශේෂ ප්රකාශය අසා සිටීම ප්රමාණවත්ය.
වීඅයිපී පෝලිම්
සමහරවිට ජනාධිපතිතුමාගේ ප්රාර්ථනාව නොවෙන්නට පුලුවන. නමුත් මේ වනවිටත් සිරි දළදා වන්දනාවට දින ගණන් පාරවල් වල ලගිමින් පෝලිම් ගැසෙන අසරණ මිනිසුන් නොතකා විශේෂ වරප්රසාදිතයෝ දළදා වඳති.
ඒ පෝලිම් ප්රධාන වශයෙන් දියවඩන නිලමේවරයාගේ පාර්ශවයෙන් එන සම්භාවනීයන් සහ ආණඩුවේ ඉහළ නිලධාරීන්ගේ දැන හැඳුනුම්කම් මත එන විශේෂිත සම්භාවනීයන්ගෙන් යුක්ත බව දළදා මාළිගාවේ අභ්යන්තර ආරංචි මාර්ගම තහවුරු කරයි. කුපාඩිකම වන්නේ මුල් දින තුළ තුළ මේ සම්භාවනීය පිරිස් වෙත දළදා වන්දවනු ලැබුවේ මහ ජනතාවට පැය එක හමාරක කාලයක් පෝලිම්වල ලග්ගවමින් පෙරවරු 11 සිට 12.30 දක්වා අතර කාලය තුළය. මේ කාලයේ දී වරප්රසාදිත පිරිස් දළදා වඳින බව වීඩියෝ දර්ශන සහිතව සමාජ මාධ්ය තුළ ප්රචාරය වෙමින් ඒ සම්බන්ධව ප්රශ්න කරන තුරු ජනතාව දැනුම්වත් වී සිටියේ නැත.
මේ පත්තුවීමත් සමග දැන් අද සිට ජනතාවට පෙරවරු 11 සිට දළදා වැන්ද හැකිය. එහෙත් ඊට සමගාමීව දළදා හොර පාරෙන් දළදා වන්දනා කරවන කටයුත්ත ද සිදුවෙමින් ඇත.
මේ විශේෂිත පුද්ගලයින් දළදා වන්දවන මාර්ග දෙකක් තිබේ. එක් මාර්ගයක් වැටී ඇත්තේ පරණ උසාවිය ඉදිරිපිටින් ගොස් සාරානාත් පිළිමය අසල ගේට්ටුවෙන් ඇතුළු වී අලුත් මාළිගාව හරහා ගමන් කර උඩ මළුවට ඇති පඩිපෙළ ඔස්සේ ගොස් දළදා වහන්සේ වැඩ හිඳනා පිරිත්මණ්ඩපය අසලට ගමන් කිරීමය. මේ ඇත්තන් බොහෝ විට රාජ්ය නිලධාරීන්ගේ ඇතැම් හිටපු ඉන්න දේශපාලකයින්ගේ සහ දියවඩන නිලමේ ගේ අවසේස ඇත්තන්ගේ ඥාති හිතවත් කට්ටිය ය.
දෙවැනි මාර්ගය දියවඩන නිලමේ තැනගේ කිට්ටුම ව්යාපාරිකයින් හිතවතුන් ඔහුගේ දියවඩන නිලමේ ඡන්ද කෙළියේ ඉන්නා ඇත්තන් ඇතුළු ඔහුට සමීප ධන කුවේරයන් ඇතුළු පිරිස්ය. මේ අය රැස්වන්නේ දියවඩන නිලමේ තැනගේ නිල නිවස වෙතය. එතැනින් ඉලෙක්ට්රික් වාහනවලින් මහ ගේටුවෙන් ඇතුළු වී දානශාලාව හරහා මහමළුවට ඇතුළු වේ.
දිනකට මෙසේ දළදා වන්දවන පිරිස්වල ප්රමාණය දෙදහසටක අධිකය. මේ කටයුත්ත මල්වතු මහා නායක හිමිවරුන්ද දැනුම්වත්ව දියවඩන නිලමේ වරයා විසින් සිදුකරනු ලබන බවට චෝදනා එල්ල වන්නේ රටේ රාජ්ය නායකයා වීඅයිපී පෝලිම් නැති බව පුන පුනා කියද්දීය.
දියවඩන නිලමේ පවු
දියවඩන නිලමේ තැන්පත් නිලංග දෑල දළදා වහන්සේ ගේ හිමිකරු නොව භාරකරුය. ඕනෑම වගකීමක් තනතුරක් වුවත් වසර 20ක් පරිහරණය කරන විට එය භුක්තියට සවි වී ඇති බවට යටිහිතට දැනීම පෘතග්ජන ස්වරූපය ය. දියවඩන නිලමේ ධූරයත් එහෙමය. අවුරුදු 20ක් එම තනතුරේ කටයුතු කරන විට හිමිකාරීත්වයේ සහ භාරකාරිත්වයේ වෙනස අමතකවී යෑම පෘතග්ජන ස්වරූපය තැන්පත් නිලංග දෑලටත් පොදු බව අපගේ හැඟීමය. මේ වීඅයිපී පෝලිම් අපට පෙන්නෙන්නේ ඒ මානසික අවුලේ ප්රතිඵලයක් ලෙසය. ඒ අර්ථයෙන් බලනවිට තැන්පත් නිලංග දෑල පවුය.
ඔහුව තවදුරටත් මේ මානසික ප්රකම්පනයේ තැබීමේ අපරාධය ජාතියක් වශයෙන් අප නොකළ යුතුය. මේ ස්වරූපය ගැන අවබෝධයක් නැතිව තවත් වසර 10ක් සඳහා දියවඩන නිලමේ ධූරයේ බලය ලබා ගැනීමට තැම්පත් නිලංග දෑල දැන් ඡන්දයට සූදානම් වන්නේය. ඔහු මෙතෙක් ජාතියට කළ අප්රමාණ සේවය සම්බන්ධව තක්සේරු කර ඔහුට කරන ගෞරවයක් වශයෙන් හෝ මෙවර ඔහු වෙත එම වගකීම නොපැවරීම ජාතික වගකීමක් ලෙස අප අභියස තිබේ. දැනට රට්ටු කතා වෙන්නේ නිලංග දෑල වෙනුවෙන් වැටෙන එක් ඡන්දයක් වෙනුවෙන් මහා සම්පත් උපදින බවය. දළදා වහන්සේ ඒ තරම්ම ආනුභාව සම්පන්නය.
ආණ්ඩුව බලන් ඉන්නවා ද?
වඩාත්ම පැහැදිලිව කියනවා නම් යමෙක් යමක් දිනා ගැනීමට ගහන ගේම රටේ නීතියට පටහැනි නම් පටහැනි තැන් සොයා වැළැක්විය යුතුය. නීතියට අවුලක් නැත්ත් ගහන ගේම අවුල් නම් ඒ ගේම් ගැසීම වළක්වා ගැනීම සඳහා නීති සම්පාදනය කරගත යුතුය. ආණ්ඩුවක් ඉන්නේ ඒ සඳහාය. අප අපේ ජීවිතවල අපට මතක ඇති කාලයක සිට ජීවිත අපේක්ෂා කැපකරමින් අපේ යැයි කියා ආණ්ඩුවක් හදාගත්තේ ඒ සඳහාය.
තමන්ගේ දේශපාලන කලාපයට හානියක් වනු ඇතැයි පූර්ව නිගමන සහිතව ක්රිකට් සභාපති ලෙස ෂම්මි සිල්වා පත් වෙන්නට ඉඩ හැරියා සේ දළදා වහන්සේටත් ඕනෑම ව්යසනයක් වෙන්නට දී භාරකාරයන්ට සූදු කෙළීමට ඉඩ දෙන්නේ නම් අප බලාපොරොත්තු වූ සංස්කෘතික ආණ්ඩුව එතැන නැත. විහාර දේවාලගම් පනතක් තිබේ. ආණ්ඩුවට පාර්ලිමේන්තු මන්ත්රීවරුන් 159කගේ බලයක් පාර්ලිමේන්තුව තුළ තිබේ. මේ පනත් අනාගත ව්යසනයන් වැලැක්වීම සඳහා සංශෝධනය කිරීමට ආණ්ඩුව ඉදිරිපත් වන්නේ නම් ඊට අකුල් හෙළීම විපක්ෂයටත් සිදුකළ හැකි නොවේ.
රාජ්ය බලය සහිතව කළ යුතු දේ කිරීමට තරම් විශ්වාසයක් හෝ ධෛර්යයක් ආණ්ඩුවට නැතිනම් තවත් කළ හැකි දෙයක් තිබේ.
එනම් රටේ හැටි දැනගෙන, ඒ අශිෂ්ට ස්වරූප පිළිගෙන පොර ටෝක් දෙමින් නෝන්ඩි නොවී සද්ද නැතිව ඉඳීමය.
මේ දැක්වෙන්නේ දළදා වන්දනාවට වීඅයිපී නඩ හොරෙන් බැස ඇති අන්දමය.
