හැටන් රංජිත් රාජපක්ෂ –
කොටහේන ප්රදේශයේ පාසල් සිසුවියක් සිය දිවි හානි කර ගැනීම සම්බන්ධයෙන් ශ්රීලංකා මානව හිමිකම් කොමිෂන් සභාව මගින් විමර්ශනයක් ආරම්භ කර ඇති බව ශ්රීලංකා මානව හිමිකම් කොමසාරිස් නීතීඥ නිමල් පුංචිහේවා පැවසීය.
නිමල් පුංචිහේවා ඊයේ (16) ඒ බැව් කියා සිටියේ වතුකම්කරු ප්රජාවගේ මූලික අයිතිවාසිකම් සුරක්ෂිත කිරීම මානව හිමිකම් අයිතිය පිළිබදව වතු පාලන අධිකාරිය දැනුවත් කිරීම සඳහා එම කොමිෂන් සභාවේ හැටන් කාර්යාලය මගින් සංවිධානය කර තිබු හැටන් දික්ඔය ඩී.එම්.සී.සී. ක්රීඩාංගණ සමාජ ශාලාවේ පැවති සම්මන්ත්රණයකින් අනතුරුව මාධ්යට අදහස් දක්වමිනි.
මෙහිදී වැඩි දුරටත් අදහස් දැක්වු නිමල් පුංචිහේවා මෙසේ පැවසීය.
“ඔව් මේ දරුවගේ දිවිනසා ගැනීම පිලිබදව කොමිසම දැනටමත් විමර්ශනයක් ආරම්භ කරලා තියනවා.
ඉතින් ඒ සම්බන්ධයෙන් අධ්යාපන අමාත්යාංශය ඒ වගේම පොලිස් ස්ථාන කිහිපයක් ඒකට සම්බන්ධ අය ගෙනල්ලා දැනට විමර්ශන පටන් අරගෙන තියෙන්නේ. විදුහල්පතිතුමිය ඊයේ (15) ගෙන්නලා වෙනම ප්රකාශයක් ලබා ගත්තා.
එතකොට ඒකට සම්බන්ධය තියන ටියුෂන් ගුරුවරයා වෙනම ගෙන්නලා ඔහුගෙන් ප්රකාශයක් අරන් විමර්ශන කටයුතු කරගෙන යනවා.
ඉදිරියේදි මේ වගේ තත්වයක් ඇති වුනේ කොහොමද, මේ වගේ තත්වයක් පාසල්වල හෝ ඕනෑම තැනක ඇති වීම වලක්වා ගන්න මොන වගේ ක්රියාමාර්ගයක් ගන්න ඕනද ඒ සඳහා රාජ්ය ආයතන සහ වෙනත් ආයතනවල තියන වගකීම පිළිබඳව විමසලා කොමිසම් සභාව බලාපොරොත්තු වෙනවා රජයටත් ඒ අදාල ආයතනවලටත් ඉදිරිපත් කරන්න. ඒ සම්බන්ධයෙන් මේ මේ ආකාර ක්රියා මාර්ග ගත යුතුයි කියලා.” යනුවෙන් පැවසීය.
මෙම සම්මනුත්රණයට ශ්රීලංකා මානව හිමිකම් කොමිසමේ සභාපති විශ්රාමලත් ශ්රේෂ්ඨාධිකරණ විනිසුරු එල්.ටී.බී. දෙහිදෙණිය ඇතුලු අධ්යක්ෂක මණ්ඩලයේ සමාජිකයන් කිහිප දෙනෙකු සහ වතු අධිකාරිවරු රැසක් සහභාගි වූහ.
