සහල් හිඟයට පියවරක් ලෙස නාඩු සහල් මෙට්රික් ටොන් හැත්තෑ දහසක සීමාවකට යටත්ව සහල් ආනයනය කිරීමට තීරණය කළ බව වෙළඳ අමාත්ය වසන්ත සමරසිංහ අද පස්වරුවේ පැවති මාධ්ය හමුවක් අමතමින් ප්රකාශ කළේය.
අමාත්යවරයා පවසන්නේ සහල් හිඟය මගහැරීමට රජයේ ආයතන හරහා මෙම සහල් ප්රමාණය ගෙන්වනු ලබන්නේ රටේ පරිභෝජනයට අවශ්ය සහල් ප්රමාණයට අමතරව තවත් සහල් මෙට්රික් ටොන් ලක්ෂ 480ක දළ සංචිතයක් වෙළෙඳපලට නිකුත් වී නැති පසුබිමක බවය. එය රටක් වශයෙන් අප අත් විඳින ඛේදවාචකයක් බවත් ඇමතිවරයා කීවේය.
“නිශ්පාදන අතිරික්තයක් තියන වග සංඛ්යාලේඛනවලින් පෙන්වනවා. ගොවියා අතේ වී නෑ. වෙළෙදපළේ පාරිභෝගිකයාට සහල් නෑ… ” ඇමතිවරයා කීවේ මේ තත්ත්වය අනාගතයෙ දී නියතවම වෙනස් වන බවය.
මාධ්ය හමුවේ ඇමතිවරයා මෙසේ පැවසුවේය.
“මේ කන්න දෙකේ පමණක් වී මෙට්රික් ටොන් මිලියන 4.8ක් අපේ රටේ වී නිශ්පාදනය තියනවා. මේ වී නිශ්පාදනයෙන් මෙට්රික් ටොන් මිලියන 3.1ක් නාඩු වී තමයි අපි නිශ්පාදනය කරලා තියෙන්නේ. මේ නාඩු වී මෙට්රික් ටොන් 3.1ක හාල් කළාම මේකෙන් හාල් එන්නේ මෙට්රික් ටොන් මිලියන 2.1 ( ලක්ෂ 21) යි. ඒ මෙට්රික් ටොන් මිලියන 2.1 ( ලක්ෂ 21) මාස 12ට බෙදුවම මාසෙකට මෙට්රික් ටොන් 1,83,000ක් පාරිභෝජනයට දල ලෙස අපට ලැබෙනවා. නමුත් මාසිකව අපේ රටේ නාඩු සහල් පරිභෝජනය මෙට්රික් ටොන් එක්ලක්ෂ හතලිස් දාහයි.
ඔබ කල්පනා කරලා බලන්න. අතිරික්තය තියනවා මාසෙකට සහල් මෙට්රික් ටොන් හතලිස් දාහක්. අවරුද්දක අතිරික්තය ගත්තොත් (දළ වශයෙන් මෙට්රික් ටොන් 480ක් )….
සහල්වලින් කොටසක් ගන්නවා අරක්කු නිශ්පාදනයට. බියර් නිශ්පාදනයට. ඒක හරි පොඩි ප්රමාණයක් වී වලින් යන්නේ. එතකොට මේ වී කොහෙද තියෙන්නේ.
වීවලට පාලන මිලකුත් සහල්වලට පාලන මිලකුත් පැනෙව්වට පස්සේ පාරිභෝගිකයාට ලැබෙන්නේ නෑ සහල් ටික. ගොවියා අතේ වී ටික නෑ. නමුත් රටේ නිශ්පාදනයේ තියනවා අතිරික්තයක්…. ඉතින් අද මේ රටේ ඛේදවාචකය බවට පත් වෙලා තියෙන්නේ මේකයි.
ජනවාරි 15 විතර වෙනකොට අපේ රටේ මහ කන්නයේ වී අස්වැන්න එන්න ගන්නවා. මහ කන්න වී අස්වැන්න එන්න පටන් ගන්නකොට ගොවියාගෙ වී මිලට බලපෑමක් නොවෙන්නත් ඕන. පාරිභෝගිකයට සහල් උවමනාකමකුත් තියනවා.
මේ සියල්ල සැලකුවට පස්සේ අපි ගන්න පුලුවන් හොඳම තීරණය අරන් තියනවා. ආණ්ඩුව ප්රතිපත්තිමය තීන්දුවක ඉන්නවා. රාජ්ය ආයතන දෙකක් රජය සතුව තියනවා සහල් ආනයනය සඳහා යොදා ගන්න පුලුවන්. ඒ රාජ්ය ආයතන දෙක සම්බන්ධ කරගෙන මෙට්රික් ටොන් 70000ක සීමාවකට යටත්ව සතොස සහ එස්ටීසී ආයතනයට සහල් ආනයනය සඳහා අවසර ලබා දෙනවා
මේ කෙටි කාලීන සහල් හිඟයට විසඳුම් සෙවීම සඳහා.
ආණ්ඩුව මේ තීරණය ගන්නෙම දෙසැම්බර් මාසේ 15ට පෙර අපි වෙළෙඳපලට සහල් ලබා දීමේ ක්රියාවලිය ආරම්භ කරන්න. සහල් මිල 220 මිලට වඩා උඩින් යන්න බෑ. ඊට අඩු වුනත් වැඩි වෙන්න බෑ. ඇමතිවරයා පැවසුවේය.
