ශ්රී ලංකාවට ආවේනික බත්කූරන්, සමනලුන් ඇතුළු ඒක දේශික කෘමීන් එකතු කරමින් සිටි ඉතාලි ජාතික මහාචාර්වරයෙක් සහ එම මහාචාර්යවරයාගේ පුතා තමන් කළ වනජීවී අපරාධය පිළිගත් පසු ඔවුන් දෙදෙනාට රුපියල් හය කෝටි එක් ලක්ෂ අසු දහසක දඩයක් නියම කිරීමට තිස්සමහාරාම මහේස්ත්රාත් තරිඳු සමීර ද සිල්වා අද (03) නියෝග කළේය.
දඩ මුදල නොගෙවන්නේ නම් බරපතළ වැඩසහිත වසර දෙකක සිරදඬුවමක් නියම වන බව ද මහේස්ත්රාත්වරයා ඔවුන් ට දැනුම් දුන්නේය.
ඉතාලි ජාතික මහාචාර්යයවරයෙකු වන පෙරාරියා ලුවිජි හා ඔහු පුත් පෙරාරියා මාටියා නැමැති මේ දෙදෙනා කතරගම අභය භූමිය ආසන්නයේ කොච්චිපතාන රක්ෂිත ප්රදේශයට ඇතුළු වී මෙම ජිව දර්ශක එකතු කරමින් සිටිය දී වනජීවී දෙපාරත්මේන්තු නිලධාරින්ගේ අත් අඩංගුවට පත් විය.
මෙම මහාචාර්යවරයා සහ ඔහුගේ පුතා අත් අඩංගුවට පත්වන අවස්ථාවේ දී ඔවුන් සතුව සමනල් විශේෂ 92 කට හා බත්කූරු විශේෂ 09 කට අයත් සතුන් 160 කට ආසන්න සංඛ්යාවක් තිබී සොයාගෙන ඇත. සත්ත්ව දර්ශක ලෙස රසායනික සංරක්ෂණයක් කිරීමෙන් පසු මෙම බත්කූරන් හා සමනලුන් රසායනික ද්රව්ය යොදා ඉටි මලු වල ඇසුරුම් කර රටින් රැගෙන යෑමට මොවුන් සැලසුම් කර තිබී ඇත. මහාචාර්යවරයා සහ පුතා මේ සතුන් ඔවුන් ලඟට ගෙන්වා ගෙන ඇත්තේ සත්ත්ව ආකර්ෂණ රසායනිකයක් භාවිත කර බව පරික්ෂණ මගින් අනාවරණය වී තිබිණි.
ආරක්ෂිත සත්ත්ව විශේෂ 101 එකතු කිරිම,සන්තකයේ තබා ගැනීම හා ප්රවාහනය කිරීම යන චෝදනා යටතේ පසුගිය මැයි මස මොවුන් දෙදෙනා වනජීවි දෙපාර්තමේන්තුව මගින් අධිකරණයට ඉදිරිපත්කර තිබුණේ චෝදනා 304 ක් යටතේ ය
වන සත්ත්ව හා වෘක්ෂලතා ආඥා පනතේ හතරවන උප ලේඛනයේ හා 2009 සංශෝධිත පනතේ හත්වන උප ලේඛනය අනුව කොඳු ඇට පෙළ රහිත සතුන් ජාතික රක්ෂිතකදී මෙන්ම ඉන් පිටත දී ආරක්ෂිත සතුන් ලෙස නම්කර තිබේ.
ඌව කලාප භාර සහකාර වනජීවි අධ්යක්ෂ ඒ.ඩී.ඩි ඉන්ද්රජිත් ගේ උපදෙස් මත කොච්චිපතාන අඩවි ආරක්ෂක කේ.සුජීව මහතා මෙහෙයවීමෙන් යාල වනෝද්යාන භාරකාර මනෝජ් විද්යාරතනගේ ද සහය ඇතිව අත්අඩංගුවට ගන්නා ලද සැකකරුවන්ට එරෙහිව වනජීවි නියාමක එච්.කේ සමිත් විසින් අධිකරණයට කරුණු වාර්තා කර තිබිණි.
