මනම්පිටිය නිමල් ජයරත්න –
පොළොන්නරුව මනම්පිටිය ප්රදේශයේදි ඊයේ ( 17 ) වැලි ටිපර් රථ රියදුරුගේ අත්පා හා මුව ගැටගසා ඝාතනය කර ටිපර් රථය පැහැරගෙන අලෙවි කිරීමට හැදූ පුද්ගලයින් පස්දෙනකු සැකපිට 18 වෙනිදා අත්අඩංගුවට ගත් බව පොළොන්නරුව පොලිසිය පැවසුවේය.
මෙලෙස ඝාතනයට ලක්ව ඇත්තේ කුඩාවැව දළුකාන අංක 237 ලිපිනයේ පදිංචිව සිටි 29 වියති දෙදරු පියෙකු, වන එච්.ජී තුෂාර සඳුන් යන අය බව පරීක්ෂණ සිදු කරන පොළොන්නරුව පොලිසිය පවසයි.
අරලගංවිල ප්රදේශයෙන් පැට වූ වැලි කියුබ් 03 ක් කුලියාපිටිය දක්වා ප්රවාහනය කරමින් සිටියදී ඊයේ ( 17 0 අලුයම මනම්පිටිය කොටලීය ප්රදේශයේදී ටිපර් රථය පැහැරගෙන රියදුරු ඝාතනය කොට, ටිපරයේ තිබූ වැලි මනම්පිටිය වනජීවී කාර්යාල අසලට හලා එම ටිපරය කදුරුවෙල දක්වා රැගෙන ගොස් නවතා තිබේ.
මේ අතර ඝාතනයට ලක් වූ පුද්ගලයාගේ බිරිය සිය ස්වාමියාට දුරකථන ඇමතුම් ලබාගෙන ඇති අතර ඊට ප්රතිචාර නොමැති බැවින් ඒ සම්බන්ධව පොළොන්නරුව පොලිසියට පැමිණිලි කර ඇත.
මීට අමතරව ටිපර් රථයේ හිමිකරුද මේ පිළිබඳ පොළොන්නරුව පොලිසිය දැනුවත් කර තිබේ.
ඒ අනුව ටිපර් රථයේ සවිකර තිබූ ජී.පී.එස් උපකරණයෙන් ලැබෙන දත්ත පරීක්ෂා කර පොළොන්නරුව හා මනම්පිටිය පොලිසිය, වනජීවී නිලධාරින්ද එක්ව මනම්පිටිය කොටලීය ප්රදේශයේ රථය සහ රියැදුරු සොයා මෙහෙයුමක් ආරම්භ කෙරිණි.
එහිදි මුව, අත්පා, ලණුවලින් ගැටගසා, මරා දමා තිබූ රියැදුරුගේ සිරුර මනම්පිටිය කොටලීය පාලමට නුදුරින් ලඳු කැලෑවක තිබි සොයා ගැනීමට හැකි වූ බව පරීක්ෂණ සිදුකරන පොළොන්නරුව මූලස්ථාන පොලිස් පරීක්ෂක කේ.පී.පී.පතිරණ අප කළ විමසීමකදී පැවසීය.
මෙම අපරාධයට අදාලව අත්අඩංගුවට ගත් සැකකරුවන් මනම්පිටිය, වවුනියාව, මැදවච්චිය, කදුරුවෙල සහ වැලිකන්ද ප්රදේශයේ පදිංචිකරුවන් බව පොලිසිය පවසයි. ඔවුන් අවුරුදු 30 ත් 40 අතර වයසේ පසුවන බවත්,රඳවාගෙන තවදුරටත් ඔවුන්ගෙන් ප්රශ්න කරන බවද පොලොන්නරුව මූලස්ථාන පොලිස් පරීක්ෂකවරයා කියයි.
සිරුර සම්බන්ධව පශ්චාත් මරණ පරීක්ෂණ කටයුතු වෙනිදා දහවල් සිදුකිරීමට කටයුතු කරන බවද පොලිසිය කියයි.
පොළොන්නරුව ජ්යෙෂ්ඨ පොලිස් අධිකාරී බුද්ධික මනතුංගගේ උපදෙස් මත පොළොන්නරුව මූලස්ථාන පොලිස් පරීක්ෂක කේ.පී.පී. පතිරණ, මනම්පිටිය පොලිස් ස්ථානාධිපති පී.ජී.ඒ.සී ආරියරත්න ඇතුළු පොලිස් නිලධාරී කණ්ඩායමක් මේ පිළිබඳ වැඩිදුර පරීක්ෂණ සිදු කරයි.
