වේරිටේ රිසර්ච් (Verité Research) ආයතනය විසින් පවත්වනු ලබන “රට හිතන හැටි” (Mood of the Nation) නවතම මත විමසුමට අනුව, වත්මන් රජයේ ක්රියාකලාපය පිළිබඳ ජනතා අනුමැතිය 65%ක් දක්වා ඉහළ ගොස් ඇති බව එම ආයතනය නිවේදනයක් නිකුත් කරමින් ප්රකාශ කරයි.
මෙය මීට වසරකට පෙර පැවති 62%ක අගයට සාපේක්ෂව (±3ක ආන්තික දෝෂයකට යටත්ව) සංඛ්යානමය වශයෙන් ස්ථාවර මට්ටමක පවතින බව එම ආයතනය පවසයි.
වැන්ගාඩ් සර්වේ (Vanguard Survey) ආයතනයේ දත්ත දායකත්වයෙන් සිදුකළ මෙම සමීක්ෂණයේදී කැපී පෙනෙන කරුණු කිහිපයක් අනාවරණය වී ඇති ආකාරය වේරිටේ රිසර්ච් පෙන්වා දෙයි.
ආර්ථිකය පිළිබඳ සුබවාදී පෙරනිමිති
- මෙම මත විමසුමේ සිව් වසරක ඉතිහාසය තුළ ප්රථම වතාවට, රටේ ආර්ථික තත්ත්වය “යහපත්” හෝ “විශිෂ්ට” ලෙස ඇගයූ පිරිස, එය “දුර්වල” ලෙස ඇගයූ පිරිස ඉක්මවා ගොස් ඇත. එමෙන්ම ආර්ථිකය “යහපත් වෙමින් පවතින බව” පවසන පිරිස 55% සිට 64% දක්වා ඉහළ ගොස් ඇත.
ආර්ථික විශ්වසනීය දර්ශකය
- පසුගිය වසරේ +14ක් ලෙස සටහන් වූ මෙම දර්ශකය මෙවර +36 දක්වා කැපී පෙනෙන වර්ධනයක් පෙන්වා දී ඇත.
රටේ ගමන් මඟ ගැන තෘප්තිමත් බව
- සමීක්ෂණයට සහභාගී වූවන්ගෙන් බහුතරයක් වන 59%ක් වර්තමානයේ රටේ කටයුතු සිදුවන ආකාරය පිළිබඳව තෘප්තිමත් බව ප්රකාශ කර ඇත. වේරිටේ රිසර්ච් ආයතනය පෙන්වා දෙන්නේ වසර හතරක සමීක්ෂණ ඉතිහාසය තුළ ජනතා තෘප්තිය 50% සීමාව ඉක්මවා ගිය පළමු අවස්ථාව මෙය බවයි.
ඉහළම ඇගයීම අපරාධ මර්දනයට
- පෙර රජයන්ට සාපේක්ෂව වත්මන් රජය සිදුකරන කටයුතු ඇගයීමේදී, මත්ද්රව්ය සහ අපරාධ අවම කිරීම සම්බන්ධයෙන් ජනතාවගෙන් ඉහළම ධනාත්මක ප්රතිචාර ලැබී ඇත. එය දූෂණය මර්දනය කිරීම සම්බන්ධයෙන් පවතින ඇගයීමටත් වඩා ඉහළ මට්ටමක පවතී.
මෙම මත විමසුම 2026 ජනවාරි 24 සිට පෙබරවාරි 03 දක්වා කාලය තුළ දිවයින පුරා විසිරී සිටින වැඩිහිටියන් 1,048 දෙනෙකුගෙන් සමන්විත නියැදියක් ඇසුරින් පවත්වා ඇත. මෙහි ප්රතිඵල 95%ක විශ්වාසනීය මට්ටමක පවතින බවත්, එහි උපරිම ආන්තික දෝෂය ±3.0%ක් බවත් වේරිටේ රිසර්ච් ආයතනය වැඩිදුරටත් සඳහන් කරයි.
වෙරිටේ රිසර්ච් විසින් මේ සම්බන්ධව නිකුත් කළ නිවේදනය පහත දැක්වේ.
