ලලිත් චාමින්ද –
සීමාසහිත ලංකා විදුලි පුද්ගලික සමාගමේ ප්රධාන කාර්යාලය පවත්වාගෙන යාම සඳහා සමාගම සතුව ගොඩනැගිල්ලක් නොමැතිවීම හේතුවෙන් ඉකුත් වසර 19 තුල දී (2002 සිට 2021) ප්රධාන කාර්යාල පරිශ්රයේ කුලී මුදල් වශයෙන් රුපියල් මිලියන 321ක මුදලක් වැය කිරීමට සිදුව ඇති බව ජාතික විගණන කාර්යාලය මගින් නිකුත්කොට ඇති විගණන වාර්තාවක සඳහන් වේ.
විදුලිබල සමාගම සතුව ප්රධාන කාර්යාලය පවත්වාගෙන යාම සඳහා ගොඩනැගිලි පරිශ්රයක් නොතිබූ බැවින් ඒ සඳහා ගොඩනැගිලි පරිශ්ර කුලියට ගැනීමට විදුලි පුද්ගලික සමාගමට සිදුවී ඇති බවද විගණනය මගින් අනාවරණය කොට ඇත.
කෙසේවුවද ලංකා විදුලි පුද්ගලික සමාගම විසින් ප්රධාන කාර්යාල ගොඩනැගිල්ල ඉදිකිරීම සඳහා 2001 වර්ෂයේ දී නාරාහෙන්පිට ඇල්විටිගල මාවතෙන් පර්චස් 73.7 ක විශාලත්වයෙන් යුතු ඉඩමක් රුපියල් මිලියන 53.5 කට මිලදී ගෙන තිබුණි.
මෙකී ඉඩම මිලදිගත් දිනයේ සිට මෙහි ප්රධාන කාර්යාලය සඳහා ගොඩනැගිල්ලක් ඉදිකිරීමේ ප්රසම්පාදන ක්රියාවලිය ආරම්භ කිරීමට වසර 12 ක් ගත වී තිබුණි. ගොඩනැගිල්ලේ ඉදිකිරිම් කටයුතු සඳහා කොන්ත්රාත්කරුවකු තෝරා ගැනීමේ ක්රියාවලිය සඳහා වසර 08 කට ආසන්න කාලයක් ගත ව තිබුණි. මේ නිසා ප්රධාන කාර්යාල ගොඩනැගිල්ල ඉදිකිරීම සඳහා මිලදීගත් මෙකී ඉඩම ආසන්න වශයෙන් වසර 20 කට අධික කාලයක් සමාගමට කිසිදු ප්රතිලාභයක් ලබානොදී නිෂ්ක්රීයව පැවති බවද විගණන වාර්තාවේ සඳහන්වේ.
විදුලිබල පුද්ගලික සමාගමේ කළමණාකාරීත්වය විසින් විගණනයට සඳහන් කොට ඇත්තේ ප්රධාන කාර්යාල ගොඩනැගිල්ල ඉදිකිරීමේ ටෙන්ඩරය 2021 වර්ෂයේ දී පුද්ගලික කොන්ත්රාත් සමාගමක් වෙත ලබා දී ඇති බවය.
