ත්රස්තවාදය වැළැක්වීමේ පනත යටතේ අත්අඩංගුවට ගත් අන්තර් විශ්ව විද්යාල කැඳවුම්කරු වසන්ත මුදලිගේ ගේ මූලික අයිතිවාසිකම් පෙත්සම විභාගයට ගනිමින් එම නඩුවේ වගඋත්තරකාරයෙකු ලෙස බස්නාහිර පළාත් ජ්යෙෂ්ඨ නියෝජ්ය පොලිස්පති දේශබන්දු තෙන්නකෝන් නම් කිරීමට ශ්රේෂ්ඨාධිකරණය අද අවසර ලබා දුන්නේය.
නිසි සාක්ෂි නොමැතිව වසන්ත මුදලිගේව අත්අඩංගුවට ගැනීම ඔහුගේ මූලික අයිතිවාසිකම් කඩ කිරීමක් බැවින් පෙත්සමේ හත්වැනි වගඋත්තරකරු ලෙස ජ්යෙෂ්ඨ නියෝජ්ය පොලිස්පතිවරයා නම් කිරීමට වසන්ත මුදලිගේ වෙනුවෙන් පෙනී සිටි ජනාධිපති නීතිඥ සාලිය පීරිස් අධිකරණයෙන් අවසර ඉල්ලා සිටියේය.
ත්රස්තවාදී ක්රියා සිදු කළා යැයි පවසමින් ත්රස්තවාදී පනත යටතේ වසන්ත මුදලිගේව තවදුරටත් රඳවා ගැනීමට ඉල්ලමින් ජ්යෙෂ්ඨ නියෝජ්ය පොලිස්පතිවරයා, ආරක්ෂක අමාත්යංශයේ ලේකම්වරයාට ලිපියක් යොමු කර ඇති අතර එය පොලිස්පතිවරයා හරහා නොගොස් නියමිත ක්රියා පටිපාටිය උල්ලංඝණය කරමින් සිදු කර ඇති බව ද අධිකරණයේ දී හෙළිදරව් විය.
මෙහිදී නීතිපතිවරයා වෙනුවෙන් පෙනී සිටි නියෝජ්ය සොලිසිටර් ජෙනරාල් මාධව තෙන්නකෝන් කරුණු දක්වමින් සඳහන් කළේ ප්රායෝගික දුෂ්කරතා හා හදිසි අවශ්යතා සැලකිල්ලට ගනිමින් පොලීසිය රැඳවුම් නියෝග ලබා ගැනීම සාමාන්ය සිරිතක් බවයි.
කෙසේ වෙතත් වසන්ත මුදලිගේ ත්රස්තවාදී ක්රියාවලට සම්බන්ධ බවට තහවුරු කරන සාක්ෂි අංශු මාත්රයක්වත් මේ වන තෙක් අධිකරණය හමුවේ ඉදිරිපත් කර නොමැති වීම ශ්රේෂ්ඨාධිකරණයේ වැඩිදුර අවධානයට යොමු වී තිබේ.
