අද (24) පෙරවරුවේ වන අලි රංචුවක් කඩා වැදීම නිසා ගල්ගමුව අතරගල්ල කනිටු විදුහල වසා දමා සිසුන් නිවෙස් වෙත යැවීමට කටයුතු යොදා තිබේ.
පාසලට යාබද කැලෑ ඉඩමේ ඊයේ රාත්රියේ සිට රැඳී සිටි වන අලි රංචුව අද දහවල් කාලය පුරාම ද එහි රැඳී සිට ඇත.
අලි පස්දෙනෙක් සහ පැටවු තිදෙනෙක් පාසලට යාබද කැලෑ භූමිය තුළ සැඟවී සිටින බව පාසලේ දරුවන්ගේ දෙමව්පියන් දැක තිබේ. ඒ බව විදුහල්පතිවරයා සහ ගුරුවරුන් ට දැන්වීමෙන් අනතුරුව මහව කලාප අධ්යාපන අධ්යක්ෂක බන්දුලානි බස්නායක ගේ නියෝගයකට අනුව පාසල වසා දැමීමට තීරණය කළ බව එහි විදුහල්පති ඩබ්ලිව් එම් අනුර වන්නිනායක පවසයි.
මෙම සතියේ ඉදිරි දින දෙක ද පාසල වසා පාසලේ දරුවන් හා ගුරු මහත්ම මහත්මීන් අවට වෙනත් පාසල් වෙත අනුයුක්ත කර තිබේ.
මෙම සිද්ධිය සැලවීමෙන් අනතුරුව අඹන්පොල පොලිස් ස්ථානාධිපති පොලිස් පරීක්ෂක සමන් පෙරේරා ඇතුළු පොලිස් නිලධාරීන් පිරිසක් පැමිණ අලි පන්නා දැමීමට උත්සාහ ගත්තද එය අසාර්ථක විය.
මේ පිළිබඳව සොයා බැලීමට මහව කලාප අධ්යාපන අධ්යක්ෂකවරිය ඇතුළු අධ්යාපන නිලධාරීන් පාසල වෙත පැමිණ අවශ්ය ඉදිරි උපදෙස් ලබා දුන්හ.
අද දහවල් කාලය පුරාවටම වනජීවී නිලධාරීහු එම පාසල් භූමියේ රැඳී සිට පාසලට වන අලින්ගෙන් සිදුවන හානි අවම කර ගැනීමට කරගැනීමට කටයුතු කළහ.
පාසලට යාබදව ඇහැටුවැව ප්රාදේශීය ලේකම් කාර්යාලයට අයත් මෙම කැලෑ ඉඩම තුළ මීට පෙරද කිහිප වතාවක්ම වන අලි ගැවසී ඇත. එම කැලෑ ඉඩමේ කැලෑව ඉවත් කිරීමට ඇහැටුවැව ප්රාදේශීය ලේකම් කාර්යාලය වෙත දැනුම් දී තිබුනද ඉන් පලක් නොවූ බව දෙමව්පියො පවසති.
