රාංචි සිට දිල්ලි බලා පියාසර කරමින් තිබූ ගුවන් ගිලන් රථයක් ඊයේ (23) රාත්රියේ ජාර්කන්ඩ් ප්රාන්තයේ චත්රා දිස්ත්රික්කයේදී කඩා වැටීමෙන් එහි ගමන් කළ පුද්ගලයින් හත් දෙනාම මියගොස් ඇති බව තහවුරු වී තිබේ.
මුලදී එක් මරණයක් පමණක් වාර්තා වූ නමුත්, යානයේ සිටි සියලු දෙනාම සිමාරියා ප්රදේශයේදී මියගොස් ඇති බව චත්රා නියෝජ්ය කොමසාරිස් කීර්තිශ්රී ජී. පසුව තහවුරු කළාය.
අනතුරින් මියගිය පිරිස මෙසේ හඳුනාගෙන ඇත:
- ප්රධාන ගුවන් නියමු: කපිතාන් විවේක් විකාස් භගත්
- සහාය ගුවන් නියමු: කපිතාන් සව්රාජ්දීප් සිං
- රෝගියා: සංජේ කුමාර් (වයස 41)
- රෝගියාගේ සහායකයින්: අර්චනා දේවි සහ ධුරු කුමාර්
- වෛද්ය කණ්ඩායම: වෛද්ය විකාස් කුමාර් ගුප්තා සහ පරිපූරක වෛද්ය සචින් කුමාර් මිෂ්රා
පොලිසිය සඳහන් කළේ යානයේ සිටි සත් දෙනාගේම සිරුරු මේ වන විට සොයාගෙන ඇති බවය.
රෙඩ්බර්ඩ් එයාර්වේස් (Redbird Airways Pvt Ltd) සමාගමට අයත් VT-AJV දරණ බීච්ක්රාෆ්ට් (Beechcraft) C90 වර්ගයේ මෙම ගුවන් යානය, රාංචි සිට දිල්ලි දක්වා රෝගියෙක් රැගෙන යන මෙහෙයුමක් සඳහා පිටත්ව ගොස් සුළු වේලාවකින් කඩා වැටී ඇත.
රාත්රී 7:11 ට රෝගියා ද රැගෙන රාංචි නගරයෙන් පිටත් වූ යානය රාත්රී 10 ට පමණ දිල්ලි වෙත ළඟා වීමට නියමිතව තිබුණි. ඉන්දියා ටුඩේ සිවිල් ගුවන් සේවා අධ්යක්ෂ ජනරාල් (DGCA) කාර්යාලය උපුටා දක්වමින වාර්තා කරන්නේ , රාත්රී 7:34 ට වාරාණසියේ සිට නාවික සැතපුම් 100 ක් පමණ ගිනිකොන දෙසින් පිහිටි ප්රදේශයකදී මෙම යානය කොල්කටා පාලන මැදිරිය සමඟ තිබූ රේඩාර් සහ සන්නිවේදන සබඳතා බිඳී ගොස් ඇති බවය.
මියගිය රෝගියා වූ සංජේ කුමාර්, ජාර්කන්ඩ් හි ලතේහාර් දිස්ත්රික්කයේ පදිංචිකරුවෙකු වන අතර ඔහු සිරුරෙන් සියයට 65 ක් පිළිස්සුම් තුවාල ලබා සිටි අයෙකි. වැඩිදුර ප්රතිකාර සඳහා ඔහුව දිල්ලි වෙත රැගෙන යාමට පවුලේ සාමාජිකයින් තීරණය කර තිබුණි. ඔහු ඊයේ පස්වරු 4:30 ට පමණ රෝහලෙන් මුදා හැර ගුවන් තොටුපළ වෙත රැගෙන ගොස් ඇත.
යානය කඩා වැටීමට හේතුව සෙවීම සඳහා ගුවන් අනතුරු විමර්ශන කාර්යාංශයේ (AAIB) කණ්ඩායමක් එම ස්ථානයට පිටත් කර යවා ඇතැයි ඉන්දිය මාධ්ය වාර්තා කරයි.
