මහනුවර, විලියම් ගොපල්ලව මාවතේ, මත්ස්ය වෙළෙඳපොළ ඉදිරිපිට ඊයේ සිදුවූ ඛේදනීය රිය අනතුරින් මරණයට පත් වූ 17 හැවිරිදි දියණියගේ මළ සිරුර සම්බන්ධව පශ්චාත් මරණ පරීක්ෂණය පොලිසියේ නොසැලකිලිමත්කම හේතුවෙන් දින එක හමාරක් ප්රමාද වී වින්දිතයින් බරපතල පීඩාවට පත්වි ඇතැයි වාර්තා වේ.
ගැටඹේ දෙස සිට මහනුවර දක්වා ගමන්ගත් පියා සහ දියණිය ගමන් කළ යතුරුපැදියක් තවත් වාහනයක ගැටීමට යෑමේදී තිරිංග යෙදීමත් සමග ලිස්සාගොස් මාර්ගයේ ඇද වැටුන පසුව වේගයෙන් ගමන් ගත් පුද්ගලික බස් රථයක් එම දියණිය යටකර ගමන් කිරීම නිසා ඊයේ උදේ ඇය එම ස්ථානයේදීම ජීවිතක්ෂයට පත් විය.
ඇය සම්බන්ධ පශ්චාත් මරණ පරික්ෂණය පැවැත්වීමට අවශ්ය මහේස්ත්රාත් නියෝගය ලබා ගන්නට ගිය මහනුවර පොලිසියේ රථවාහන අංශයේ නිලධාරීන් ඔවුන්ගේ සියලුම උසාවි රාජකාරි නිම කර සවස පැමිණ බලනවිට මහේස්ත්රාත් නියෝගය ලබාගෙන තිබී ඇත්තේ මිය ගිය දියණියගේ නමට නොව වෙනත් නමකටය.
අනතුරුව ඊයේ උදේ සිදුවූ මරණය පිළිබඳ පශ්චාත් මරණ පරීක්ෂණය පැවැත්වීමට මහේස්ත්රාත් නියෝගය ලබාගෙන එනවිට අද (17) දහවල් වී තිබිණි.
මළ සිරුර පිළිබඳ පශ්චාත් මරණ පරීක්ෂණය මහනුවර ජාතික රෝහලේ විශේෂඥ අධිකරණ වෛද්ය, පේරාදෙණිය විශ්වවිද්යාලයේ ජ්යෙෂ්ඨ කථිකාචාර්ය ප්රභාත් සේනසිංහ විසින් සිදු කරනු ලැබීය.
ඉදිරිපත් වූ වෛද්ය වාර්තා සහ සාක්කි මත මහනුවර ජාතික රෝහලේ හදිසි මරණ පරීක්ෂක නෝමන් කොස්තා මෙය රිය අනතුරක් හේතුවෙන් හිසට සහ මොළයට සිදුවූ බරපතළ හානි හේතුවෙන් සිදුවූ හදිසි මරණයක් බවට තීරණය කළේය.
අනතුර සම්බන්ධයෙන් පෞද්ගලික බස් රථයේ රියදුරු පොලීසිය විසින් අත්අඩංගුවට ගනු ලැබීය.
