සූරියවැව නුවන් ජයසේකර –
ඕමානයේ ගෘහ සේවය සඳහා රැගෙන ගොස් එරටදි විවිධ හිරිහැරවලට ලක්ව මියගිය හම්බන්තොට සුචි ගම්මානයේ පදිංචි විසි දෙහැවිරිදි තරුණිය හා ඇගේ වැඩිමහල් සොයුරිය රවටා කූට අන්දමින් මිනිස් වෙළඳාම් සිදු කළ හම්බන්තොට සමෘධි සංවර්ධන නිලධාරියා ඇතුලු සැකකරුවන් තිදෙනකු, ශ්රී ලංකා විදේශ සේවා නියුක්ති කාර්යාංශයේ සභපති කෝශල වික්රමසිංහගේ උපදෙස් මත කාර්යාංශයේ විශේෂ විමර්ශන අංශයේ නිලධාරීන් විසින් සිදුකළ විශේෂ මෙහෙයුමකදී අත්අඩංගුවට ගෙන ඇත.
අදාළ සමෘධි සංවර්ධන නිලධාරියා හා තවත් සැකකරුවකු හම්බන්තොට සිරිබෝපුර ප්රදේශයේදී ඊයේ (4) අත්අඩංගුවට ගෙන ඇති අතර අනෙක් සැකකරු අද(5) හම්බන්තොට නගරයේදි සිදුකල විශේෂ මෙහෙයුමකින් අනතුරුව අත්අඩංගුවට ගෙන තිබේ.
අදාළ තරුණියන් දෙදෙනා ඩුබායි හි සාත්තු සේවිකා රැකියා ලබාදෙන බව පවසා ඕමානයේ ගෘහ සේවිකා රැකියා සඳහා යොමු කිරිමට මෙම සැකකරුවන් කටයුතු කර තිබේ.
සංචාරක වීසා මත පැමිණීම නිසා රැකියා නොමැතිව ඕමානයේ විවිධ ස්ථානවල මෙම තරුණියන් දෙදෙනා රැකියා සඳහා යොදවා ඇති බවට මුලික විමර්ශන වලදි හෙලි වී ඇත.
විවිධ හිරිහැර වලට ලක්ව පසුව 22 හැවිරිදි තුවාන් රාජික් රමිෂා තරුණිය එහිදි මියගිය බවට ඇගේ වැඩිමල් තරුණිය විසින් සිය මවට දන්වා ඇත. බලපත්රයක් නොමැතිව සංචාරක වීසා මගින් රැකියා සඳහා යොමුකළ මෙම ක්රියාව මිනිස් වෙදළාමක් වන අතර එය නීති විරෝධි ක්රියාවක් බවත් මෙවැනි මිනිස් වෙදළාම්වල නිරතවන අයට එරෙහිව තරාතිරම නොබලා නීතිය තදින්ම ක්රියාත්මක කරන බවත් කාර්යාංශයේ සභපති කෝසල වික්රමසිංහ සඳහන් කළේය.
මෙම මරණය සියදිවි හානිකර ගැනීමක් ද එසේ නොමැති නම් ඝාතනයක් ද යන්න තවමත් නිශ්චිත වශයෙන් තහවුරු කරගෙන නොමැති අතර කෙසේ වෙතත් මේ පිළිබඳව ඕමානයේ ශ්රි ලංකා තානාපති කාර්යාල හා ශ්රී ලංකා විදේශ කටයුතු අමත්යාංශය කරුණු සොයා බලමින් සිටී.
අත්අඩංගුවට ගත් සැකකරුවන් තිදෙනා හම්බන්තොට මහේස්ත්රාත් අධිකරණය වෙත ඉදිරිපත් කෙරුණු අතර එහිදී හම්බන්තොට මහේස්ත්රාත් හා අතිරේක දිසා විනිසුරු ඕෂද මිගාර මහආරච්චි සැකකරුවන් ජනවාරි 17 වෙනිදා දක්වා රක්ෂිත බන්ධනාගාර ගත කිරීමට නියෝග කෙරුණි.
කාර්යාංශයේ විශේෂ විමර්ශන අංශයේ කළමනාකරු කපිල කරුණාරත්න ඇතුලු නිලධාරීන් විසින් මෙම සැකකරුවන් අත්අඩංගුවට ගැනිම සිදුකර තිබේ.
