මනම්පිටිය නිමල් ජයරත්න –
මාදුරුඔය ජාතික වනෝද්යානය හරහා ගමන් කරන අරලගංවිල මහඔය ප්රධාන මාර්ගයේ අරලගංවිල මහඔය ප්රදේශයේදි බර වාහනයක ගැටී මියගිය කොටියෙකුගේ සිරුරක් 15 වෙනිදා උදෑසන හමු වී ඇති බව හේනානිගල අඩවි කාර්යාලය සඳහන් කරයි.
මෙම කොටියාගේ මරණ පරීක්ෂණ කටයුතු අම්පාර වනජීවී පශු වෛද්යවරුන් විසින් මේ වනවිට සිදු කරන අතර මෙම කොටියා කුමන වාහනයකට ගැටි මිය යන්නට ඇත්ද යන්න නිශ්චිත වශයෙන් කිව නොහැකි බව හේනානිගල අඩවි ආරක්ෂක කුමාරසිරි විජේකෝන් අප කළ විමසීමකදී පැවසීය.
මේ සම්බන්ධයෙන් අද (16) දෙහිඅත්තකන්ඩිය මහේස්ත්රාත් අධිකරණයට කරුණු දැක්වීමට කටයුතු කරන බවද කුමාරසිර විජේකෝන් කීය.
මාදුරුඔය ජාතික වනෝද්යානය හරහා ගමන් කරන අරලගංවිල මහඔය ප්රධාන මාර්ගයේ මීට පෙරද වන සතුන් මෙන්ම වන අලි බර වාහනවල ගැටී සතුන්ගේ ජීවිත වලට හානි වූ වාර්තා වුනි.
සතුන්ගේ ජීවිත වලට තර්ජන සිදුවීම හේතුවෙන් මෙම මාර්ගය රාත්රි කාලයේදි වසා දැමීමට මාර්ග සංවර්ධන අධිකාරිය මීට පෙර කටයුතු කළ ද වසර කිහිපයක සිට මෙම මාර්ගය රාත්රී කාලයේ දී විවෘත කර තැබීම හේතුවෙන් සතුන්ට දැඩි ලෙස හානි සිදුවන බවද වනජීවී නිලධාරීහු පෙන්වා දෙති.
