මලාවි හි උප ජනාධිපතිවරයා වන සවුලෝස් චිලිමා සහ ඔහුගේ බිරිඳ ඇතුළු පුද්ගලයින් 9 දෙනෙකු ගමන් ගත් ගුවන් යානයක් ඊයේ (10) එරට චිකන්ගාවා නම් කඳුවැටිය ආසන්නයේදී අනතුරට පත් වූ අතර එම අනතුරට මුහුණ දුන් සියල්ලන්ම මියගොස් ඇති බවට මලාවි රජය අද (11) ප්රකාශයක් නිකුත් කර තිබෙනවා.
මලාවි හි ජනාධිපති ලාසරස් චක්වේරා අද, එනම් අඟහරුවාදා ජාතික ශෝක දිනයක් ලෙසට ද ප්රකාශයට පත් කර තිබෙන බව විදෙස් මාධ්ය වාර්තා කර තිබෙනවා.
එරට ජනාධිපති කාර්යාලය සහ කැබිනට් මණ්ඩලය අද උදෑසන නිවේදනයක් නිකුත් කරමින් කියා සිටියේ, උතුරු මලාවි කඳුකරයේ වනාන්තර ප්රදේශයක දිනකට වැඩි කාලයක සෝදිසි කිරීමේ උත්සාහයකින් පසුව මෙම තහවුරු කිරීම සිදු කළ බවයි.
ඊයේ උදෑසන එරට අගනුවර වන ලිලොන්ග්වේ සිට මෙම යානය ගුවන්ගත වී තිබෙනවා. 51 හැවිරිදි උප ජනාධිපතිවරයා සහ අනෙකුත් මගීන් මලාවි හි හිටපු නීතිපතිවරයාගේ අවමංගල්ය උත්සවයට සහභාගී වීමට යමින් සිටියදී යානය රේඩාර් පද්ධතියෙන් ඉවත් වී තිබෙන අතර යානය එලෙස අතුරුදහන් වූ විට නැවත ලිලොන්ග්වේ නගරය වෙත පැමිණෙන ලෙසට එහි නියමුවාට උපදෙස් දුන් බව ද ගුවන් ගමනාගමන නිලධාරීන් පවසා ඇති බව විදෙස් මාධ්ය වාර්තා කර තිබෙනවා.
