අසේල කුරුළුවංශ –
සමාජ මාධ්ය භාවිතයට තරුණ පිරිස ඇබ්බැහි වී ඇති බව පවසමින් ඒවා තහනම් කිරීමට වඩා එම සමාජ මාධ්ය තුළින් තරුණ පිරිසකට තම රට ගැන හැඟීමක් මෙන්ම රටේ ඉතියාසය හා උරුමය කියා දීමේ වැඩපිළිවෙළක් තිබුණා නම් නේපාලය අද මෙවැනි දරුණු තතත්වයට පත් නොවනු ඇතැයි අස්ගිරි පාර්ශවයේ අනුනායක, පොළොන්නරුව සොළොස්මස්ථානාධිපති පූජ්ය වේඬරුවේ උපාලි නාහිමියෝ පවසති.
නේපාලයේ සිදුව තිබෙන ගැටුම්කාරි තත්ත්වය සම්බන්ධයෙන් මාධ්ය නිවේදනයක් නිකුත් කරමින් අනුනායක ස්වාමින්ද්රයන් වහන්සේ මේ බව ප්රකාශ කරන අතර එම නිවේදනයේ වැඩිදුරටත් මෙසේද සඳහන්ය.
නේපාලයේ ඇති වූ අතිශය කණගාටුදායක සිදුවීම් මාලාව පිළිබඳව අප මහත්සේ කම්පනයට පත්වූවා. බුදු පියාණන් වයන්සේ උපන් දේශයේ මේ ආකාර ශෝචනීය දරුණු කැරැල්ලක් නිර්මාණය වී ඇති වූ සංවේගජනක සිදුවීම් මාලාව කිිසිසේත්ම සුළුකොට තැකිය නොහැකිය. දකුණු ආසියාතික රටවල් වැනසීමේ යම් යම් කුමන්ත්රණකාරී වැඩපිළවෙළ කලක පටන් ක්රියාත්මක වන බවක් පැහැදිලිව පෙනී යනවා. විශේෂයෙන් අතීතයේ බෞද්ධ ලෙස පැවැති රටවල මෙන්ම බෞද්ධ උරුමයන් ඇති රටවල ගැටුම් ඇතිකර එම රටවල් වැනසීමට ගන්නා උත්සයක් ඇති බව නේපාලයේ සිදුවීම දෙස බලන විට පෙනි යනවා.
ඛේදවාචකයකට මුහුණ පාන්නේ නැහැ. නේපාලය වැනසීමේ කැරැල්ලේ පෙරමුණ ගත් තරුණ පිරිස තම රට ගැන අගක් මුලක් මෙන්ම ඉතිහාසයක් නොදන්නා පිරිසක් බව පැහැදිලිය. එසේ දැන සිටියා නම් ඔවුන් තමන්ගේ රට මේ අන්දමින් විනාශ නොකරනු ඇත. අද සමාජ මාධ්යයේ වැඩි හරියක්ම දකින්නට ඇත්තේ වෛරය හා ඊර්ෂ්යාව වපුරන ගැටුම් ඇති කරන අදහස් බව බොහෝ දෙනාගේ මතයයි. මේ නිසා සමාජ මාධ්ය සමාජයේ යහපත පිණිස යොදා ගත යුුතුය යන්න අපට නේපාලනය අද පාඩමක් කියා දී තිබේ. නේපාලය යනු දියණු වෙමින් පවතින රටකි. තමන් මේ විනාශ කර දැම්මේ තමන්ගේම දේපොළ බව එම රටේ තරුණ පිරිසකට අවබෝධ වීමට වැඩි දිනක් ගත නොවනු ඇත. අතීතයේ මහ රජවරු පාලනය කළ නේපාලය අද ගිනි ගෙන දැවෙන විට එම රටින් බිහිවූ මහා පුරුෂයෙකුගේ දහම පිළිපදින මිනිසුන් සිටින ශ්රී ලංකාවේ ජනතාවට ඇතිවූයේ මහත් වූ සංවේගකයකි.
නේපාලයේ අරගලය ම්ලේච්ඡ දිශාවකට ඇදී ගොස් අමු අමුවේ මිනිස්සු මරා දමන තත්ත්වයට පත් වුණා. මෙම තරුණ පිරිස පිටුපස සිට ඔවුන් කවුරුන් හෝ මෙහෙයවා ඇති බව පැහැදිලිය. මේ සිදුවීම මහා ඉතිහාසයක් ඇති නේපාලයේ ගෞරවයට සිදුවූ බරපතළ හානියක් බව සිහිපත් කළ යුතුයි. තව ද පාලකයෝ රට පාලනය කරනවා වෙනුවට ඒ ඒ රට විසින් පාලකයෝ පාලනය කරන තත්ත්වයක් උදාවුවහොත් ප්රජාතන්ත්රවාදයත් මිනිස් සංහතියත් මේ මිහිතලයෙන් අතුගෑවි යන දිනය වැඩි ඈතක නොවනු ඇත.ඒ නිසා ගිනි ගන්නා ලොව නිවන්නට අද ලෝක ආගමික නායකයෝ සියල්ල පෙරට ආ යුුත බව සිහිපත් කළ යුතුයි
