බටලන්ද කොමිෂන් සභා වාර්තාවට අනුව බටලන්දේ වධකාගාරයක් පවත්වාගෙන යමින් සමූහ ඝාතනයක් සිදුකළ ම්ලේච්ඡ අපරාධයෙන් රනිල් වික්රමසිංහට ගැලවිය නොහැකි බව බටලන්ද කොමිෂන් සභා වාර්තාවම උපුටා දක්වමින් පෙරටුගාමී සමාජවාදී පක්ෂයේ ප්රචාරක ලේකම් දුමින්ද නාගමුව අද (16) පැහැදිලි කළේය.
බටලන්ද කොමිෂන් සභා වාර්තාව ප්රතික්ෂේප කරමින් රනිල් වික්රමසිංහ විස්න් අද කළ ප්රකාශයට පිළිතුරු දීම සඳහා නුගේගොඩ දී කැඳවූ මාධ්ය සාකච්ඡාවක් අමතමින් දුමින්ද නාගමුව පෙන්වා දුන්නේ බටලන්ද කොමිෂන් සභා වාර්තාවේම නිරීක්ෂණ හා නිර්දේශ අනුව බටලන්ද වධකාගාරය වෙනුවෙන් පොහොර සංස්ථාවට අයිති බටලන්ද නිවාස සංකීර්ණයේ නිවාස ඒකක නීති විරෝධීව වෙන් කර දෙමින් එම වධකාගාරයට මුල් ගල තැබූ අපරාධකරුවා රනිල් වික්රමසිංහ බවය.
බටලන්ද කොමිෂන් සභා වාර්තාව පාර්ලිමේන්තුවට ඉදිරිපත් වී නොතිබුණ බවට ලෝකය ඉදිරියේ රනිල් වික්රමසිංහ කියූ කතාව ඔහු විසින්ම බොරුවක් කර ඇති බවත් මෙම වාර්තාව 2000 වසරේ දී පාර්ලිමේන්තුවට ඉදිරිපත් වී සභා වාර්තාවක් ලෙස පැවති ආකාරය ඔහුටම යළි පිළිගන්නට සිදුවී ඇති බවත් දුමින්ද නාගමුව පෙන්වා දුන්නේය.
රනිල් වික්රමසිංහ තමන්ට එරෙහිව කිසිම නිර්දේශයක් මේ කොමිෂන් සභා වාර්තාවේ නොමැති බවට කී කාරණයත්, නිර්දේශ ක්රියාවට නැගීමට කොමිෂන් සභාව ගොඩනැගූ පනතට අනුව හැකියාවක් නොමැතිය යන කාරණයත් සම්පූර්ණයෙන්ම සාවද්ය බව කී නාගමුව රනිල් වික්රමසිංහගේ සමස්ථ ප්රකාශය තුළම ඇත්තේ ඔහුගේ චූදිත භාවයෙන් ගැලවීමේ දුබල උත්සාහයක් බව ප්රකාශ කළේය.
“බටලන්ද කියන්නෙ වධකාගාරයක්. ඒ වධකාගාරය පොලිසියට වෙන් කරලා ලබා දීලා තියෙන්නේ රනිල් වික්රමසිංහ. බටලන්ද වධකාගාරයේ බී 2 කියන නිවාසය ලබා දීලා තියෙන්නේ කාටද. මෙම වාර්තාවේ ඉතාම පැහැදිලිව මෙහෙම කියනවා… “ 1989 මැයි සිට 1994 අගෝස්තු දක්වා රනිල් වික්රමසිංහ මහත්මයාගේ කාර්යාලය ලෙස පැවතිනි. “
“ඔහුට කාර්යාලයක් විතරක් නෙමෙයි නිවාඩු නිකේතනයක් මෙතන තිබිලා තියනවා. මේ වාර්තාවේ ඒක පැහැදිලිව තියනවා. මේ ස්ථානයේ නීති විරෝධී රැස්වීම් පවත්වලා තියනවා කියලා.
මෙම රැස්විම් පොලිස් දෙපාර්තමේන්තුවේ හෝ ආරක්ෂක අමාත්යාංශයේ අනුදැනුම මත පැවැත්වුන රැස්වීම් නොවන බව සඳහන් වෙලා තියනවා. රැස්විම් තියලා තියෙන්නේ රනිල් වික්රමසිංහගේ නිල නිවසේ සහ බංගලාවේ. ප්රධානත්වය දැරුවේ රනිල් වික්රමසිං කියලා කොමිෂන් වාර්තාවේ පැහැදිලිවම තියනවා.”
“ඉතාම වැදගත් කාරණාවක් මේ කොමිෂන් සභා වාර්තාවේ සඳහන් වෙනවා. එහි කියනවා මෙහෙම.”
“බලය නොලත් රැස්විම් නීති විරෝධි රැස්විම් පැවැත්ම් සහ වධකාගාර පවත්වා ගැනීම් බේරිය නොහැකි ලෙස වෙලී පැටලී ඇත.”
“දැන් ඔහු කියනවා ඇහින් දුටු සාක්ෂි නෑ කියලා. සාක්ෂි තියනවා. මිනිස්සු ඉදිරිපත් වෙනවා දැන්.” දුමින්ද නාගමුව අවධාරණය කලේ මේ ඇසින් දුටු සාක්ෂි සහිත මනුෂ්යයින් මිය යෑමට පෙර මේ තොරතුරු ලබා ගත යුතු බවත් එය නීතිය ඉදිරියට ගොස් විසඳාගත යුතු බවත්ය.
බටලන්ද කොමිෂන් සභා වාර්තාවේ ද නම සඳහන් සුදත් චන්ද්රසේකර ඒ වකවානුවේ උප පොලිස් පරික්ෂකවරයෙකි. ඔහු රනිල් වික්රමසිංහගේ පුද්ගලික ලේකම්වරයා ලෙස සැලකිය යුතු කාලයක් ගත කළේය.
2018/08/10 වැනිදා රනිල් වික්රමසිංහගේ පුද්ගලික ලේකම් ධූරයෙන් ඉල්ලා අස් වෙන සුදත් චන්ද්රසේකර මේසේ ලියා තිබිණි.
“ මම එදා කුරුඳු පොළු හමුදාවට මංගල සමරවීර මැතිතුමා සමග නායකත්වය ලබා දෙමින් සන්නිවේදන බලකාය ප්රමුඛ කණ්ඩායම් මෙහෙයවා ඔබවත් පක්ෂයත් බේරා ගත් බව අද සියල්ලන්ටම මෙන් ඔබතුමන්ට අමතක වී ඇත. “
“ ඔබ නිසා මා බටලන්දේ මිනී මරුවා විය. ගාමිණී අතුකෝරලගේ මිනී මරුවා විය. ඔබ වෙනුවෙන් සිරිකොත ඉදිරියේ ගිනි තබාගෙන මිය ගිය රියන්සි අල්ගමගේ මිනී මරුවා විය… “ පෙරටුගාමී සමාජවාදී පක්ෂය වශයෙන් ඔවුන් ආණ්ඩුවට පවසන්නේ මේ ප්රකාශ පදනම් කරගෙන සුදත් චන්ද්රසේකර අත් අඩංගුවට ගැනීමට නීතිපතිගෙන් අවසර ගන්නට අවශ්ය නැති බවය.
දුමින්ද නාගමුව අද කළ ප්රකාශය පහත දැක්වේ.
