මරා දැමූ තම සැමියාගේ අවසන් කටයුතුවලට සහාය දීමට යැයි කියා අනාරාධිතව පැමිණි හමුදා කණ්ඩායමක් තමන් ඔවුන්ගේ සහාය අනවශ්ය බව ප්රකාශ කරද්දී ටෙන්ට් ගැසූ බවත්, කෑම බීම ගෙනා බවත්, උදව් කරන්නම් යැයි කී බවත් පොලිස් වෙඩි පහරින් මියගිය චමින්ද ලක්ෂාන් බිරියවන සමන් කුමාරි කෑගල්ල මහේස්තාත් වාසනා නවරත්න ඉදිරියේ සාක්ෂි ලබාදෙමින් කීවාය.
ඇය පවසා ඇත්තේ තම සැමියා හමුදාවේ හෝ කිසිම ආරක්ෂ අංශයක වැඩ නොකළ නිසා හමුදාවේ සහාය අවසන් කටයුතු සඳහා අවශ්ය නොවන බවය.
එම හමුදා කණ්ඩායම අද උදේ වරුවේත් මළගෙදරට පැමිණි බවත් ගලවාගෙන යන ලෙස කී නමුත් එම ටෙන්ට් තවමත් ඒ අයුරින්ම ඇති බවත් ඇය කීවාය.
සමන් කුමාරි හැඬූ කඳුලින් ලබා දුන් සාක්ෂිය මෙසේය.
“මට දරුවෝ දෙන්නෙක් ඉන්නවා. මහත්තයා තෙල් ගහන්න සෙඩ් එකට යනවා කියලා ගියා. ඊට පස්සේ කවුද කෙනෙක් මට කතා කරලා කිව්වා ඔයාගේ මහත්තයාට පොලිසියෙන් වෙඩි තියලා කියල. මම කෑගල්ල රෝහලට ගියා. රෝහලේ ට්රොලියක දාලා හිටපු මහත්තයව මම දැක්කා. පස්සේ මම ගෙදර ආවා.“
“ගෙදර ඉදිද්දි අවිගත් හමුදා නිලධාරීන් රැගත් හමුදා ට්රක් රථයක් අපේ ගෙදරට ආවා. එතැන 20 දෙනෙක් විතර හිටියා. ඒ අය අතර තරු පැළදගත්ත උසස් නිලධාරීන් දෙදෙනකුත් හිටියා. ඒ දෙන්නා මට කිව්වා “ අපි ආවේ ඔයාලට උදව් කරන්න. අපි හැමදේම කරන්නම්” කියලා. ඒ අය ටෙන්ට් එකක් ගෙනත් ගැහැව්වා. අපිට කෑම බීම ගෙනාව.
“ටික වෙලාවකින් මම ඒගොල්ලන්ට කිව්වා මගේ මහත්තයා හමුදාවේවත් කිසිම ආරක්ෂක අංශයක හරි වැඩ කරපු කෙනෙක් නෙමෙයි ඒ නිසා ඔයාලගේ උදව් මට එපා කියලා. ඊට පස්සේ ඒ අය ගියා. ඒ කට්ටිය අද උදෙත් අපේ ගෙදරට ආවා. මම ඒ අයට කිව්වා “සර්ලා ඉන්න ඕන නැහැ” කියලා. ඒ ගහපු ටෙන්ට් එක තාමත් තියෙනවා.
මගේ මහත්තයාට වෙඩි තියලා මැරුවා.මේක අවසාන මරණය වෙන්නේ නැහැ. මේගොල්ලේ තවත් මිනිස්සු වෙඩි තියලා මරයි. ඒ නිසා මගේ මහත්තයාට සාධාරණයක් ඉෂ්ඨ කරලා දෙන්න. යුනිෆෝම් ඇදගෙන තරු ගහගෙන හිටියට මේගොල්ලේ මිනීමරුවෝ”
