පොලිස් වෙඩි පහරින් තවත් සැක කරුවෙක් ඝාතනය වී තිබේ. පොලිසිය පවසන්නේ සැකකරු අත් අඩංගුවට ගැනීමට යෑමේ දී සිදු වූ වෙඩි හුවමාරුවකින් පසු ඔහු මිය ගිය බවය.
මෙසේ මිය ගොස් ඇත්තේ ජෙයරාජ් නැමැති අන්වර්ථ නාමයකින් හඳුන්වන පුද්ගලයෙක් බවත් මේ පුද්ගලයා කඳාන පොලිපිති මූකලාන ප්රදේශයේ මාළු ව්යාපාරිකයෙකුගේ නිවසට වෙඩි තැබූ සැකකරු බවත් පොලිසිය පවසයි. නිවසට වෙඩි තැබීමේ සිද්ධියෙන් නිවසේ සිටි කිසිවෙකුට අනතුරක් සිද්ධ වි නැත.
මෙසේ පාතාලය විසින් මෙහෙයවූ වෙඩික්කරුවෙක් විසින් මෙම නිවසට වෙඩි තබා ඇත්තේ ඩුබායිහි සිටින පාතාල අපරාධකරුවන්ගේ ජාලයෙන් ඉල්ලා තිබූ රුපියල් කෝටියක කප්පමක් ව්යාපාරිකයා විසින් ලබා නොදීම හේතුවෙනි.
එම වෙඩි තැබීමට පැමිණි ප්රධාන සැකකරු මිය ගොස් ඇති බව කියන්නේ සපුගස්කන්ද ප්රදේශයේ දී ඔහුව අත් අඩංගුවට ගැනීමට යෑමේ දී සිදුවූ බව කියන වෙඩි හුවමාරුවකදී ය.
වැඩිදුර පොලිස් පරීක්ෂණ පැවැත්වෙයි.
