ශ්රි ලංකා තෝරන්නන් ගැහූ අන්තිම ගේමත් ෆේල්ය. අවසන් පූර්ව තරගයේ ගැට්ටේ සිට කළ තරගයෙන් ඇෆ්ගනිස්ථාන කණ්ඩායමට කඩුළු 07කින් කුජීත ලෙස පරාදය. ඔවුන් ලකුණු 242ක අප ලබා දුන් ඉලක්කය ඉතා පහසුවෙන් පසු කරන්නේ පන්දු ඕවර 45.3ක දීය.
අබාධයට ලක්වෙමින් හෝ ලක් කරමින් නෝන්ඩි පිට කළ ආදේශ කිරීම් වලින් සිද්ධවුන ඉටි ගෙඩියක් නැත. මෙහෙම ක්රිකට් තියා ඇටබෝලවත් ගහන්නට බැරි බව හයි ප්රෆෝමන්ස් මහේල් ඇතුළු ක්රිකට් විශාරදයන්ට නොතේරුනාට දැන් අපේ ගමේ පොල් ගස් නගින ජෙමාටත් තේරුණ බව කිව යුතුය.
ක්රිකට් කියන්නේ ජිමික් එක්ක නොවේ. එය ශාරීරික මානසික කළමනාකරණය සමග ක්රීඩා කෞෂල්ය හා තාක්ෂණය ඒකාබද්ධ කළ විද්යාවකි. මේ විද්යාව තුළ ජිමික් කරන්නට යෑම මහා කුජීත විහිළුවකි.
මැතිව්ස් සහ චමීර සංචිතයේත් නැතිව තෝරාගෙන ඉන්දියාවට රැගෙන එන විට ක්රිකට් ගැන ටිකක් හෝ දන්නා එකෙකුට පැහැදිලි වන්නේ දැනට සංචිතයේ ඉන්නා උන් දෙදෙනෙක් ආබාධයට ලක්වීමට නියමිත බවය. ඒ ලෙසම සිදුවුනේය. ආබාධයට ලක් වීමත් සැලසුමක් අනුව සිදුවී නම් ඒ හොඳම සැලසුම තිබුණේ අපටය.
තරගාවලිය අතර දසුන් ශානක ඉවත් කර කුසල් මෙන්ඩිස් නායකයා කළේය. නායකයා වුන දවසේ සිට කුසල් ගේ බැටින් ෆේල්ය. අන්තිම මොහොතේ මැද පෙළ ශක්තිමත් කිරීමට ගෙනා ස්කොඩ් එකේවත් හිටියේ නැති මැතිව්ස් ෆේල්ය. ඉදිරි පෙළ පීඩනයකට හසුව වැටෙද්දී ඔහු පිටිය මැද ඇඹරෙමින් ලබා ගත්තේ ලකුණු 23කි.
පන්දු යැවීමේ වික්රමය කරන්නට ලහිරු කුමාරට තරගාවලිය අහිමි කර හෝ අහිමි වීමෙන් පසුව ගෙනා දුෂ්මන්ත චමිර හොඳටම ගුටි කෑවේය. කඩුළු ලබා ගත්තේ නැත. ඔහුත් ෆේල්ය.
මේ තරම් නා ගැනීමක් මේ ලෝක කුසලානයේ කවුරුවත්ම නා ගත්තේ නැත. මේ තේරීම් කමිටුව හොඳ ක්රිකට් තෝරන්නට නොව දාං අදින්නටය. දැන් මේ හැත්ත බුරුත්ත අපට කුමක් කියනු ඇති දැයි දන්නේ නැත. අප දන්නේ ක්රිකට්වලට ආදරය කරන මේ රටේ කෝටි ගණනක් මිනිසුන් නියෝජනය කර රට වෙනුවෙන් 15 දෙනෙක් තෝරා ගන්නට බැරිව අවසාන මෙහොතේත් ගංජාකාරයන් ටිකක් බූරු ගහන ආකාරයේ වැඩකි.
පූනේ තණතීරුවේ කාසියේ වාසිය දිනුවේ ඇෆ්ගනිස්ථානය ය. ඔවුහු පන්දු රැකීම තේරූහ. එය ඉතාම නිවැරදි තේරීමක් බව ඇෆ්ගනිස්ථාන පන්දු යවන්නෝ පෙන්වා දුන්හ.
ශ්රී ලංකා කණ්ඩායමේ එකම පිතිකරුවෙක්වත් ලකුණු 50 සීමාව ඉක්මවා ගියේ නැත. ඇෆ්ගනිස්ථානයට එරෙහිව කවදත් හොඳට ක්රීඩා කරන පැතුම් නිශ්ශංක ලකුණු 46ක් ලැබුවේය. කණ්ඩායමේ වැඩිම ලකුණු ඔහුගේය.
කුසල් ජනිත් දිගින් දිගටම ෆේල් වෙද්දී ඒ වෙනුවට තරගය ආරම්භ කිරීමට කැඳවූ දිමුත් කරුණාරත්න ලබා ගන්නේ ලකුණු 15කි. කුසල් මෙන්ඩිස් ලකුණු 39කි. සධීර සමරවික්රම ලකුණු 36කි. චරිත් අසලංක ලකුණු 22කි. යළිත් වරක් ධනංජය ද සිල්වා 6 වැනියා ලෙස පිටියට පැමිණ අසමත් වූයේය. රෂීඩ් ඛාන්ට මැද පොල්ල ගැලවෙන විට ඔහු ලබාගෙන තිබුණේ ලකුණු 14කි. අනතුරුව පිටියට පැමිණි ප්රවීන මැතිව්ස් ලකුණු 23කට දැවී ගියේය. මහීෂ් තීක්ෂණ ලකුණු 29ක් ලැබුවේය.
ශ්රි ලංකා කණ්ඩායම ලකුණු 242කට පන්දු ඕවර 49.3ක දි දැවි ගියේය. කණ්ඩායමට යළි කැඳවූ ෆසාල්හක් ෆාරුකී ශ්රී ලංකා කණ්ඩායම සුන් කළේය. ඔහු පන්දු ඕවර 10 තුළ ලකුණු 34ක් පමණක් ලබා දෙමින් කඩුළු 04ක් දවා ගත්තේය. මුජීබ් උර් රහ්මාන් ලකුණු 38ට කඩුළු 02ක්, හස්මතුල්ලා ඕමාර්සායි සහ රෂීඩ් ඛාන් එක කඩුල්ල බැගින් ලැබූහ.
පිළිතුරු ඉනිම ක්රිඩා කිරීමට පැමිණි ඇෆ්ගනිස්ථාන කණ්ඩායමේ ආරම්භක පිතිකරු රහ්මනුල්ලා ගුර්බාස් සිය සිව්වන පන්දුවේ දී ලකුණු නොදී දවා ගන්නට ඩිල්ෂාන් මධුශංක සමත් වූ බව සැබෑය. ඒ දවා ගැනිම එතැනටම සීමා වුනේය. පුදුමාකාර සංයමයකින් යුතුව අතිශය වෘත්තීය විලාශයෙන් ඇෆ්ගනිස්ථාන පිතිකරුවෝ ක්රීඩා කළහ. ඊබ්රහිම් සඩ්රාන් ලකුනු 39ක් ලැබුවේය. ඔහු දැවී යන්නේ රහ්මඩ් ෂා සමග ලකුණු 73ක සම්බන්ධතාවයක් ගොඩනගමිනි. රහ්මට් ෂා ලකුණු 62කට දැවි යන්නේ කණ්යම ජයග්රහණයේ පදනම මත හොවා තබමිනි. ඔහු දැවී යනවිට කණ්ඩායමේ ලකුනු ගණන 131කි. එතැන් පටන් නායක හස්මතුල්ලා සහීඩි සහ අස්මතුල්ලා ඕමාර්සායි නොදැවි ලකුණු 111ක ජයග්රාහී සම්බන්ධතාවය ගොඩනැගූහ.
විශිෂ්ඨ පිතිකරණයක නිරත වූ මේ පිතිකරුවන් දෙදෙනාම අර්ධ ශතක වාර්තා කළහ. නායක හස්මතුල්ලා සහිඩි දැඩි සංයමකින් යුතුව පන්දු 74ක දි නොදැවි ලකුණු 58ක් ලැබුවේය. ඔහුගේ ලකුණු 58ට ඇතුළත් වූයේ හතරේ පහර දෙකක් සහ එක් හයේ පහරක් පමණි.
අනෙක් අන්තයෙන් අතිශයින්ම ප්රහාරාත්මක පිතිකරණයක නිරත වූ අස්මතුල්ලා ඕමාර්සායි පන්දු 63ක දි නොදැවී ලකුනු 73ක් ලැබුවේ හතරේ පහර 06ක් සහ හයේ පහර 03ක් සමගිනි.
පන්දු 28ක් ඉතිරිව තිබිය දි විකට් 07කින් පරාදය. තරගයේ වීරයා ෆසාල් හක් ෆාරුකීය.
දැන් ඉතින් මේ ලෝක කුසලාන තරගයේ තවත් ගමනක් නැත. දැන් තියෙන්නේ නවසිලන්තය සමගත්, ඉන්දියාව සමගත් ලෝක වාර්තා සහිතව පරාද නොවි ගෙදර එන්නටය.
මේ තරග දෙක තමන් ගේම් ගසා ගෙනා ටීම් එකටම බාර දී තේරීම් බාර පුතාලත්, පුහුණුකාර පුතාලා ටිකත් දැන් දකුණු පැත්තට වෙන්නට. මෙච්චර කල් කළ මාර උදව්වට සන්තෝයි… බුදු සරණයි.
